Deeˈni, baalanti ammaˈno mitte diˈˈikkitino. Qullaawu Maxaafi Magano hagiirsiissannokkiti batinye ammaˈno noota kulanno. Magano hagiirsiissannokki ammaˈno lamewa gaammanni:

Umi Gaamo: Kaphu maganna magansiˈra

 Qullaawu Maxaafi kaphu maganna magansiˈra ‘haafanna kaaˈlitannori nookkita’ ikkitinota kulanno. (Ermiyaasi 10:3-5; 16:19, 20) Maganu Yihowa a hundi Israeele, “Ane agurranna wolu magani heeˈroonkeˈne” yee hajajino. (Fulo 20:3, 23; 23:24) Israeelete manni wole maganna magansiˈri yannara “Kaaliiqi lowo geeshsha [hanqino].”—Kiiro 25:3; Leewaawoota 20:2; Ejjeetto 2:13, 14.

 Maganu xaa yannarano “kaphu maganna” magansiˈnannita dibaxanno. (1 Qorontoosi 8:5, 6; Galatiyu Sokka 4:8) Maganu iso magansiˈra hasiˈranno manna kaphu maganna magansidhannori ledo noonsa aante agurtanno gede hajajino; isi togo yiino: “Giddonsanni fultine, baxxitinoonnire ikke.” (2 Qorontoosi 6:14-17) Baalanti ammaˈno mitte ikkitoommeronna mannu Maganunniwa shiqanno gede kaaˈlitannoha ikkoommero, Maganu togo yee hajajannoni?

Layinki Gaamo: Halaalaancho Magano isi hasiˈrannokki garinni magansiˈra

 Israeele halaalaancho Magano kaphu maganna magansiˈnanni garinni magansidhino woyiti no; ikkollana Yihowa, insa togo assite kaphu magansiˈra halaalu magansiˈra ledo karsiissannota dibaxino. (Fulo 32:8; Marro 12:2-4) Yesuusino isi waro heedhinori ammaˈnote murrooti Magano magansidhino gari gara ikkinokki daafira rufinonsa; insa Magano magansidhannore labbe leellate woˈnaalturono, “Seeru giddo nooha qara qara coye” yaano ‘taashsho, maaronna ammanama’ facci assite agurtino daafira lawisiisaano ikkansa leellishshino.—Maatewoosi 23:23.

 Xaa yannarano mannu Maganunniwa shiqanno gede kaaˈlitannoti halaalu aana xintantino ammaˈno callate. Kuni halaali noohu Qullaawu Maxaafi giddooti. (Yohaannisi 4:24; 17:17; 2 Ximootewoosi 3:16, 17) Qullaawu Maxaafi rosi ledo sumuu yaannokkire rosiissanno ammaˈno mannu Maganuwiinni xeertiˈranno gede assitanno. Batinyu manni Qullaawu Maxaafi rosiisanno rosooti yee hedannohu lowo rosi, lawishshaho, Sillaase rosi, lubbo direyitanno yaanno rosinna bushuullu hegerera giirantanno yaanno rosi kaphu maganna magansiˈranno manniwiinni dayinoho. Togoo roso halashshitanno ammaˈno, mannu woga Maganu seeri gede assite rosiissanno daafira “kaphoho,” hattono kaaˈlitannori dinoote.—Maarqoosi 7:7, 8.

 Maganu lawisiissanno ammaˈno effire giwanno. (Tiito 1:16) Ammaˈno mannu Maganunniwa shiqanno gede kaaˈla dandiitannohu, mulla wogate geeshshira mannu magaˈnate seera wonshanno gede ikkikkinni, heeshshonsa biddi assiˈranno gede kaaˈlitannoha ikkirooti. Lawishshaho, Qullaawu Maxaafi togo yaanno: “Arrawosi eemadhikkinni Magano magansiˈreemmo yaanno manchi umosi doganno; isi magansiˈra haafaho. Maganu Annu albaanni keeraanchonna battaabbinokki ammaˈno: Annanna ama shiidhino ooso, hattonni galte shiiˈrino meento kaaˈla, tenne gobba [alame] ishinchiwiinni meessaneete agadhate.”—Yaiqoobi 1:26, 27.