• “Minaanniˈya duucha hige foorinohu gede asse hedoomma.”

• “Shollishinoehu, xuma ikkoommakkihunna waagu nooekkihu gede asse hedoomma.”

• “Tenne daafira mittohono dikuloomma. Callaˈya xissiisiˈroomma.”

• “Yihowa ane daafira dihedanno yee hedoomma.”

Aleenni kulli hedo mitte minaamara minaannise teeda baˈino misilla lairo ise mageeshshi geeshsha xissiisidhannoro leellishshanno. Isi anfikkinni boode aganna woy diro teeda baˈino misilla laˈˈanni keeshshinoha ikkiro, isera hakkuyi gedensaanni iso ammana qarra ikkitasera dandiitanno. Mitte minaama minaannase horo egentinokkihu gede assite heddinota coyidhino. Ise, ‘Isi ani afummakki assanni noohu wolu coyino nookka?’ yitino.

Konne birxicho qixxeessinoonnihu minaannise teeda baˈino misilla laˈˈanno minaama kaaˈlateeti. a Konni birxichira, sheshifachishannoseha, Yihowa baxannosetanna kaaˈlannoseta buuxxanno gede assannoseha hattono giddoyidi keere afidhanno gedenna Yihowawa gamba yite heedhanno gede kaaˈlannoseha Qullaawu Maxaafiha xintu seera kulloonni. b

Minaannikki assannoha baalanka coye hoola dandaattakkiha ikkirono, giddoyidi keere afiˈrate kayinni assa dandaattari no. Hanni aante noo hedo laˈno.

Ateneeto busha assitooti. Mitte minaama, ‘Minaanniˈya teeda baˈino misilla laˈˈannohu anewa gattino daafiraati’ yite heddara dandiitanno. Aliise c yinanni minaama, ani xuma diˈˈikkoomma yite heddino. Ise, ‘Minaanniˈya ane agure wole meyata laˈˈannohu mayiraati?’ yitino. Mitootu minaamuwi, coyi roore bushanno gede assinanni heeˈnoommori ninkeeti yee hede insaneeto busha assanno. Daaniyeeli yinanni minaama togo yitino: “Hanqaˈyanna caaccaawaˈya adhamanke diigganni noohu gede asse hedoomma.”

Atino hatto yite hedattaha ikkiro, minaannikki loosino soˈrora Yihowa ate busha assannohekkita deˈooti. Yaiqoobi 1:14, “Mittu mittunku manchi jifamannohu umisi yortonni goshooshamanninna dogamanniiti” yitanno. (Rom. 14:12; Fil. 2:12) Yihowa  ate busha assantenni isira ammanamakki lowori gede asse laˈˈanno.—2 Dud. 16:9.

Mittu minaanni teeda baˈino misile laˈˈannohu minaamasi xuma ikkitinokki daafiraati yaa diˈˈikkino. Tenne hajo daafira xiinxallitino fullahaano, teeda baˈino misilla laˈˈa mittu manchira aye meyatino kassi assitara dandiitannokki hasatto heedhannosi gede assitannota coyidhino.

Quwa saˈe yaaddooti. Katiriina yinanni minaama minaannise teeda baˈino misilla laˈˈannota calla hedase wolere heddannokki gede assitinoseta coyidhino. Firanseesi yinanni minaama togo yitino: “Minaanniˈya hiikko nooro afa hoogummaro lowo geeshsha yaadeemma. Barra woˈma dadillanni hoseemma.” Wolootu minaamuwi, minaanninsa assannore afara dandaanno roduuwi noowa heeˈranno woyite yaadannota coyiˈrino. Wolootu minaamuwi kayinni qarranke afara dandaannohu dino yee hedanno daafira, callimma macciishshantannonsata coyiˈrino.

Hatto yee heda nooreentilla. Ikkirono tenne daafira calla heda roore yaandanni gedella assitanno. Hatteentenni Yihowa ledo noohe jaalooma illachishi. Hatto assakki jawaante afiˈratta gede kaaˈlitannohe.—Far. 62:2; Efe. 6:10.

Qullaawu Maxaafi giddo kulloonnita qarru iilleennansa Yihowa huucciˈre shesho afiˈrino meenti daafira kultanno xagge nabbawakki kaaˈlitahera dandiitanno. Yihowa iillinonsa qarra dihoolino; kayinni keere afidhanno gede kaaˈlinonsa. Lawishshaho Haanna iillinose qarrinni kainohunni ‘hururante wiˈlitino.’ Ikkirono ise ‘uurrissukkinni Yihowa huuccidhuhu’ gedensaanni, qarrise hoˈlannohu hiittoonniitiro afa hooggurono giddoyidi keere afidhino.—1 Sam. 1:10, 12, 18; 2 Qor. 1:3, 4.

Kaaˈlo afiˈrate songote cimeeyye amaaˈli. Insa ‘bubbetenna wishotenni goˈlinanni’ bayichi gede ikkitahera dandiitanno. (Isa. 32:2) Qoleno fojokki hasaaphattatanna sheshifachishshannohe rodoo qummi assitahera nafa dandiitanno.—Law. 17:17.

Minaannikki teeda baˈino misilla laˈˈate rosicho qeeˈlanno gede kaaˈla dandaatta? Kaaˈlattasiha ikkara dandaanno. Qullaawu Maxaafi qarra woy wolqaataamo diina qeelate “mitto calla ikkantenni lame ikka woyyitanno” yaanno. (Ros. 4:9-12) Minaanninna minaama teeda baˈino misilla laˈˈate araado qeeˈlatenna galagale mimmito addaxxate lamunku mitteenni sharrama dancha guma abbitannota xiinxallo leellishshanno.

 Hige dancha guma afidhinannihu minaannikki teeda baˈino misilla laˈˈa agurate sharramannohanna murciˈrinoha ikkirooti. Isi jawaante afiˈrate eeggifate Yihowa huucciˈrino? Hattono songote cimeeyye kaaˈlo xaˈmiˈrino? (2 Qor. 4:7; Yai. 5:14, 15) Isi teeda baˈino misilla laˈˈanno gede assannosiriwiinni xeertiˈrino? Lawishshaho elektirooniksete uduunnicho horoonsiˈranno yanna ajishino? Hattono fonqolo ikkannosi coye qorophino? (Law. 27:12) Isi kaaˈlattasi gede maahoyye yiino? Woˈmunni woˈma atera ammanamino? Hatto ikkiro iso kaaˈlattaha ikkara dandaanno.

Hiittoonni? Hanni mitto lawishsha laˈno. Feelisha yinanni mancho anjesinni hanafe teeda baˈino misilla laˈˈate rosichi noosihu Eetaani yinanni manchira assidhino. Feelisha, Eetaanira teeda baˈino misilla laˈˈate hasatto wirro waaddannosi woyite ise ledo hasaawa shota ikkitannosi gede assitino. Eetaani togo yiino: “Minaamaˈyara giddoˈyata maaxummokkinni fane kuleemmose. Ise fonqolo ikkannoe coye hooˈleemmo gedenna konne woyyeessiˈranni noommoronna teˈee woˈmanka woyite xaˈmitanni baxillunni kaaˈlitinoe. Qoleno ise interneete horoonsiˈreemmo yanna ajisheemmo gede kaaˈlitinoe.” Feelisha, Eetaani teeda baˈino misilla laˈˈanno daafira xissiisiˈrase garankolla. Ise togo yitino: “Hanqaˈyanna xissiisiˈraˈya kayinni minaanniˈya tenne busha gade hooˈlanno gede dikaaˈlitannosi. Isi qarra ikkinosi coye hasaambummohu gedensaanni, xissiisiˈreemma gede assannoe coye agurate sumuu yiino.”

Konni garinni hasaawa minaanni teeda baˈino misilla laˈˈa qorophanno gede calla ikkikkinni, minaamasino iso galagalte addaxxitanno gede kaaˈlitannose. Minaanni minaamasira laanfesi, hattono mamira haˈrannoronna maa loosannoro kulannoseha ikkiro, minaamasi mittoreno maaxannosekkita affino daafira iso addaxxa qarra diˈˈikkitannose.

Atino konni garinni minaannakki kaaˈla dandaattaha lawannohe? Hatto ikkiro, konne birxicho mitteenni nabbabbine hasaabbe. Isi teeda baˈino misilla laˈˈa aguranna galagalte addaxxattasi gede assiˈra hasiisannosi. Isi tenne hajo kayisse hasaawootta daafira hanqa agure kuni coyi ate mageeshshi geeshsha xissiisinohero huwatate woˈnaala hasiissannosi. Minaannikki teeda baˈino misilla laˈˈannokki gedenna ati ammanattasi gede assate sharramanno woyite kaaˈlisi. Lamunku mannu teeda baˈino misilla laˈˈanno gede xixxiiwannori maatironna konne rosicho qeeˈla dandiinannihu hiittoonniitiro mitteenni hasaawa dandiitinanni. d

Minaannikki ledo togoo hajo kayissine hasaabbinanni woyite lamunku mimmitoho hanqitinanniha  laweennahe waajjittaro, hasaabbinanni woyite ledoˈne ofolle macciishshanno gede roore aantinanniha songote cimeessa amaaˈla dandiitinanni. Minaannikki teeda baˈino misilla laˈˈa agurihu gedensaanni nafa, galagalte iso addaxxate mito geeshshi yanna hasiissannoheha ikkara dandaannota deˈooti. Hexxo mudhitooti. Minaannikki ledo noohe aante kaajjitanno gede assiˈrate isi woyyeessiˈrinoha shiimmaadda coye illachishi. Cincitiniro adhamaˈne galte hosse albi gede kaajjado ikkitannota hexxa dandiitinanni.—Ros. 7:8; 1 Qor. 13:4.

Minaannikki galagale teeda baˈino misilla laˈˈa hanafiro isi maaro dieannoho woy konne rosicho horo qeeˈla didandaanno yaatenni? Hatto yaa diˈˈikkino. Roorenkanni teeda baˈino misilla laˈˈa araado ikkitinosiha ikkiro, isi konne rosicho qeeˈlate heeshshosi diro woˈma sharrama hasiissannosiha ikkara dandaanno. Minaannikki teeda baˈino misilla laˈˈa agurihunni lowo diri gedensaanni nafa galagale laˈˈara dandaanno. Albillitte togoori kalaqamannokki gede, wole agurina tenne busha gade qeeˈlinoha lawisiro nafa, albinni roore lowo geeshsha qoropha hasiissannosiha ikkara dandaanno. (Law. 28:14; Mat. 5:29; 1 Qor. 10:12) Qoleno ‘wodanisinna hedosi haarooˈmitanno’ gede assiˈranna busha coye yaano teeda baˈino misillanna battaawinoha aye coyeno lawishshaho maasterbeeshiinete gade ‘giwa’ hasiissannosi. (Efe. 4:23; Far. 97:10; Rom. 12:9) Isi togoo coye qorophate maahoyye yiino? Hatto ikkiro isi tenne gade sunu sununni woˈmunni woˈma qeeˈla dandaanno. e

Kayinni minaannikki konne rosicho qeeˈlate sharrama hasiˈrannokkihalla ikki? Hexxo mudhattara, hanqattaranna kaandoonnihehu gede assite hedattara dandaattati dihuluullissannote. Yaaddokki Yihowara hasaaphi; hatto assakki giddoyidi keere afiˈratta gede kaaˈlitannohe. (1 Phe. 5:7) Huuccatto assidhe, xiinxallitenna hiincite Yihowawa gamba yite heeˈri. Hatto assittaro isino atewa shiqqi yaannota huluullantooti. Faarso 34:18 kultannonte gede Yihowa “dadillunni hiiqqantinorira mule no”; hattono insa galagalte hagiirraamma ikkitanno gede kaaˈla hasiˈranno. Dancha Kiristaancho ikkate dandiittare baala assi. Kaaˈlitannohe gede songote cimeeyye amaaˈli. Qoleno albillitte minaannikki soorrame biddi yaara dandaannota hexxi.—Rom. 2:4; 2 Phe. 3:9.