Isayaasi 60:1 togo yitanno: “Yerusaalame! Caabbichikki dayinona kaˈe xawisiˈri; Kaaliiqi ayirrinyino aanakki xawanno.” Hatte yannara Yihudunniha qara katama ikkitinoti Yerusaalame woy Tsiyooni Israeelete daga baalanta leellishshannote. (Isa. 60:14; 62:1, 2) Hakko daafira Isayaasi coyiˈrinori lame xaˈmo kaˈanno gede assanno. Umihunni, Yerusaalame ‘kaˈinohunna’ ayyaanaamittete caabbicho xawissinohu mamooteetinna ma garinniiti? Layinkihunni, Isayaasi coyiˈrinori roore woˈmanno yanna no?

Yerusaalame ‘kaˈinohunna’ ayyaanaamittete caabbicho xawissinohu mamooteetinna ma garinniiti? Ayihudootu 70 diro Baabiloonete qafadante heedheenna, Yerusaalamenna qullaawu mini diigame baino. Kayinni Meedooninna Faarsi manni Baabiloone qafadihu gedensaanni, Baabiloonete gashshooti giddo heeˈrannohu Israeelete manni gobbansa hige halaalu magansiˈra galagale xintino. (Izi. 1:1-4) Kiristoosira albaanni 537 kayise 12 gaˈre giddonni fulinohu ammanamino manni hatto assino. (Isa. 60:4) Insa Yihowara kakkalo shiqisha, ayyaanna ayirrisanna qullaawa mine galagalte mina hanaffino. (Izi. 3:1-4, 7-11; 6:16-22) Maganu ayirrinyi galagale Yerusaalamete yaano Maganu manni aana xawa hanafino. Insa qolte ayyaanaamittete tunsichi giddo noo mannira xawaabba xawissino.

Ikkirono Isayaasi masaalo hundi Yerusaalamera gudisante diwoˈmitino. Rooru Israeelete manni Maganoho hajajama agurino. (Neh. 13:27; Mil. 1:6-8; 2:13, 14; Mat. 15:7-9) Gedensoonni insa Buuramino Moote Yesuusi Kiristoosi nafa gibbino. (Mat. 27:1, 2) Hakkiinni 70 M.D Yerusaalamenna qullaawu mini layinkimeeshsho diigame baino.

Yihowa kuni dadillisanno coyi ikkannota balaxe kulino. (Dan. 9:24-27) Ikkirono Yihowa hedinohu Isayaasi fooliishsho 60 kulloonni masaalo uullayidi Yerusaalame aana gudisante woˈmitanno gede ikkinokkiti egennantinote.

Isayaasi coyiˈrinori roore woˈmanno yanna no? Ee, kayinni woˈmitanni noohu “Gordoho noo Yerusaalame” lainohunniiti. Soqqamaasinchu Phaawuloosi “Ise amankeeti” yee borreessino. (Gal. 4:26) Gordoho noo Yerusaalame ammanantinota ayyaanu kalaqo amaddinota, Maganu dirijjiteta iimiidi kifile riqibbanno. Oosose Yesuusaatinna Phaawuloosinte gede iimi hexxo noonsaho 144,000 ayyaanunni buuramino Kiristaanaati. Buuramino Kiristaani “qullaawa mannaati” woy “Maganu Israeeleeti.”—1 Phe. 2:9; Gal. 6:16, NW.

Gordoho noo Yerusaalame ‘kaˈinohunna caabbicho xawissinohu’ hiittoonniiti? Ise hatto assitinohu uullate noori buurantino oosose widoonniiti. Insara iillinonsare Isayaasi fooliishsho 60 noo masaalo ledo heewisiisse.

Buuramino Kiristaani ‘kaˈˈa’ hasiissinonsahu masaalotenni kulloonni garinni soqqamaasine reyituhu gedensaanni, kaadaasine halaˈliteenna ayyaanaamittete tunsichi giddora eˈino daafiraati. (Mat. 13:37-43) Konni garinni insa Bayira Baabiloone yaano alamete doyichote kaphu ammaˈno borojje ikkitino. Buuramino Kiristaani, ‘alamete gumulo’ yaano 1914 geya borojje ikke keeshshino. (Mat. 13:39, 40) Insa boode yanna gedensaanni 1919nni borojjimmatenni fultino; hakkiinni bayichonkonni sabbakate looso loosse ayyaanaamittete xawaabba xawisa hanaffino. a Saˈu dirra giddo  Isayaasi 60:3 kulloonni ‘mootoolla’ yaano Maganu Israeeleno agurranna, baalante daga giddonni fulino manni konni caabbichiwa dayino.—Isa. 60:3; Aju. 5:9, 10.

Albillitte buuramino Kiristaani Yihowa xawaabba roore xawisanno. Ma garinni? Insa uullayidi heeshshonsa jeefissanno woyite, Kiristoosi idayicho ikkitinote “Haaro Yerusaalame” wido ikkitanno; haaro Yerusaalame Kiristoosi ledo mootoollanna kakkalaano ikkitannore 144,000ti.—Aju. 14:1; 21:1, 2, 24; 22:3-5.

Haaro Yerusaalame Isayaasi 60:1 noo masaalo woˈmitanno gede lowore kaaˈlitanno. (Isayaasi 60:1, 3, 5, 11, 19, 20; Yohaannisi Ajuuja 21:2, 9-11, 22-26 ledo heewisiisi.) Uullayidi Yerusaalame hundihu Israeelete gashshootira qara bayicho ikkitinonte gede, Haaro Yerusaalame Kiristoosi ledo haaro gashshoote gashshitanno. ‘Haaro Yerusaalame gordunni Maganuwiinni dirritannohu’ hiittoonniiti? Uullate aana noo manna kaaˈlannore assiteeti. Magano waajjannohu baalante gosa giddonni fulino manni ‘konni xawaabbi giddo haˈramanno.’ Insa cubbunna reyote giddonni nafa keere fultanno. (Aju. 21:3, 4, 24) Tini Isayaasinna wole masaalaano kultinonte gede woˈmunni woˈma ‘baalunku coyi haaro ikkanno gede assitanno.’ (Soq. 3:21) Kuni coyi haarooˈma hanafinohu Kiristoosi Moote ikki woyiteeti; gumulamannohu qole isihu Kumu Diri Gashshooti jeeforaati.