Maganu Suˈmi Ayeti?
Mittu manchi ledo egennamatto woyite balaxxe, “Suˈmikki ayeti?” yite xaˈmakki digattanno. Tenne xaˈmo Magano xaˈmittoro, isi mayyee qolannoha lawannohe?
“Ani Yihowaati. Suˈmiˈya konneeti.”—Isayaasi 42:8, NW.
Atera kuni suˈmi wosinchoho? Konne suˈma macciishshite egennoottokkiha ikkara dandaanno; korkaatuno Qullaawa Maxaafa tirtannori giddo batinyu Maganu suˈma dihoroonsidhanno; mitootu kayinni boode basera calla horoonsidhanno. Insa suˈmasi “MOOTICHA” woy “KAALIIQA” yitannote maaragete suˈmuwanni riqibbino. Umo Qullaawa Maxaafa borreessinoonni afiira kayinni shoole Ibiraawootu Afii fidallanni (YHWH woy JHVH) woshshinannihu Maganu suˈmi 7,000 meddi yitanno basera no. Konne suˈma Sidaamu Afiinni “Yahiwe” woy “Yihowa” yine woshshinanni. *
^ GUFO 4 Sidaamu Afiinni qixxeessinoonnihu Qullaawu Maxaafira, Fulo 6:3te nooha lekkaalliidi qaagiishsha lai.
Reyote Baarita Faarsote Xaaxo Umi xibbi diro M.D., IBIRAAWOOTU AFOO
Tindeli tiro 1530, INGILIZETE AFOO
Reena-Vaaleera Vershiini 1602, ISPEENETE AFOO
Yuniyeeni Vershiini 1919, CHAYINU AFOO
MAGANU SUˈMA AFA MAYIRA HASIISSU?
Maganu suˈmasi lowori gede asse laˈˈanno. Maganoho suˈma fushshinohu wole ikkikkinni iso umosiiti. Yihowa togo yiino: “Hegere geeshsha suˈmiˈya konneeti; dagganno ilama baala kunni suˈminni woshshitannoe.” (Fulo 3:15) Qullaawu Maxaafi giddo Maganu suˈma Woˈmanka Dandaannoha, Anna, Mooticha, woy Magano yitannote maaragete suˈmuwanni roore duucha basera qummi assinoonni. Hattono Abirihaami, Muse, Daawiti, woy Yesuusi yitannote gillete suˈmuwanni roore batinye basera no. Qoleno Yihowa suˈmasi anfara hasiˈranno. Qullaawu Maxaafi togo yaanno: “Suˈmakki Yihowa yinannihu ati callu uulla woˈmate aana Woˈmunkura Aliidiha ikkoottota mannu afona.”—Faarso 83:18, NW.
Yesuusi Maganu suˈma ayirrisanno. Mootichu Huuccatto yinanni huuccattora Yesuusi harunsaanosi Magano “Suˈmikki qullaawo” yite huuccidhanno gede rosiisinonsa. (Maatewoosi 6:9) Yesuusi umisi “Annaˈya, suˈmakki ayirrisi!” yee huucciˈrino. (Yohaannisi 12:28) Yesuusi heeshshosi giddo Maganu suˈmi ayirranno gede assate aana illachishino; isi togo yiino: ‘Insa ate suˈma egentanno gede assoommo. Egentanno gede assano diagureemmo.’—Yohaannisi 17:26.
Magano afino manni suˈmasi ayirrisanno. Hunda heeˈrinohu Maganu manni, Maganu suˈmi gatonna agarooshshe ikkannonsata huwatino. “Kaaliiqi [“Yihowa,” NW] suˈmi kinchu huxxaati; keeraanchu manchi hakkiira xooqe keere heeˈranno.” (Lawishsha 18:10) “Kaaliiqi [Yihowa] suˈma woshshannohu baalu gatanno.” (Iyueeli 2:32) Qullaawu Maxaafi, Maganu suˈmi isi soqqamaasine bande anfanni gede assannota leellishanno. “Daga woˈmanti uminsa maganna magansidhanno. Ninke kayinni hegere geeshsha Kaaliiqa [Yihowa] Maganonke magansiˈneemmo.”—Mikiyaasi 4:5; Soqqamaasinete Looso 15:14.
MAGANU SUˈMI MAA LEELLISHANNO?
Maganu suˈmi isi ayimma xawisanno. Batinyu egennaammi Maganu suˈmi “Ikkanno Gede Assanno” yitanno tiro afiˈrino yitanno. Maganu Yihowa “Ikka Hasiˈreemmore Ikkeemmo” yee Musera coyiˈrino hedo, suˈmisi tiro huwatate kaaˈlitannonke. (Fulo 3:14, NW) Konni daafira, Maganu suˈmi tiro isi woˈmunkuri Kalaqaancho ikkinota leellishshannota calla diˈˈikkitino. Hatteentenni Yihowa suˈmi, isi umisino ikko kalaqamisi isi hedinore wonshate hasiˈrinore ikkitanno gede assa dandaannota leellishanno. Maganunniti maaragete suˈmuwa roorresi, ayirrinyesinna wolqasi xawissannota ikkiturono, ayimmasinna hasiˈrinore ikka dandaannota leellishannohu kayinni Yihowa yaanno suˈmasi callaho.
Maganu suˈmi isi ninkera hedannota leellishanno. Maganu suˈmi isi ninkerano ikko kalaqamisira baalaho hedannota leellishanno. Qoleno Maganu ninkera suˈmasi kulasi, isi daafira anfammora hasiˈrannota leellishshanno. Qoleno suˈmasi kulinonkehu ninke xaˈmineenna ikkikkinni umisinni kaeeti. Konni daafira, Maganu ninkewiinni xeertiˈrinohunna ayimmasi anfara hasiˈrannokkihu gede assine ikkikkinni addanka noohunna isiwa shiqqi yaa dandiineemmohu gede assine laˈnammosira hasiˈranno.—Faarso 73:28.
Maganu suˈma horoonsiˈranke isiwa shiqqi yaa hasiˈneemmota leellishshanno. Lawishshaho, hanni jaalooma kalaqiˈra hasiˈrootto manchira suˈmakki higge higge kulootto yine hendo. Ikkollana hakku manchi suˈmakki woshsha hasiˈrannokkiha ikkiro, isi ate ledo jaalooma kalaqiˈra hasiˈrannoha lawannohe? Dilawannohe! Yihowano mannu oosora suˈmasi kulinonsa; qoleno insa suˈmasi woshshitara hasiˈranno. Yihowa suˈmisinni woshshanke, isiwa shiqqi yaa hasiˈneemmota leellishshanno. Maganu suˈmasi ‘ayirrissannore’ laˈˈanno.—Milkiyaasi 3:16.
Magano afate, balanxe suˈmasi egenna hasiissannonke. Ikkollana suˈmasi calla anfe agura dihasiissannonke. Hatteentenni Yihowara hiittoo akatta noosiro rosa hasiissannonke.
Maganu suˈmi Ibiraawootu Afiitenna wole batinye Qullaawa Borro tiro giddo no
MAGANU SUˈMI AYETI? Maganu suˈmi Yihowaati. Kuni suˈmi Maganu hedinore umo fushshate dandoo noosita leellishanno
Kurino Lai
KAA'LANNOHA QULLAAWU MAXAAFI ROSO
Maganoho Suˈmu Noosi?
Maganoho batinyu suusu suˈmi noosi; lawishshaho Woˈmanka Dandaannoha, Kalaqaanchonna Mooticha yinannisi. Ikkollana Maganunnihu baxxino suˈmi Qullaawu Maxaafi giddo mito 7,000 ikkanno bayicho no.
QULLAAWU MAXAAFI XAˈMONNA DAWARO
Maganoho Meu Suˈmi Noosi?
Mitu mannira ‘Allahi,’ ‘Alfanna Omeega,’ ‘Elshadayi,’ woy ‘Yaahiwe Yirie’ Maganu suˈma lawansara dandaanno. Maganu suˈma bande afa hasiissannonkehu mayiraati?
