Maganoho Meu Suˈmi Noosi?

FANI

Qullaawu Maxaafi mayyaanno?

Maganoho mittu umisi suˈmi noosi. Konne suˈma Ibiraawootu Afiinni יהוה yine borreessinanni; Sidaamu Afiinni kayinni duucha woyite “Yihowa” yine woshshinanni. a Maganu masaalaanchisi Isayaasi widoonni togo yiino: “Ani Yihowaati. Suˈmiˈyano konneeti.” (Isayaasi 42:8, Haaro Alame Tiro) Kuni suˈmi angatenni galchinoonnite hundite Qullaawu Maxaafi borro giddo 7,000 meddi yaanno bayicho no; Qullaawu Maxaafi giddo kageeshshi bayicho noohu wolu suˈmi horo dino. b

Yihowara wolu suˈmi noosi?

Qullaawu Maxaafi Maganoho umisihu mittu suˈmi calla noosita kulannoha ikkirono, batinye suusu (maaragete) suˈmuwa noositano kulanno. Aante nooti mitte mittenti suusu suˈmuwa Yihowa akata woy ayimma huwatate kaaˈlitannonke gara wodanchi.

Suusu Suˈma	Qummeeshsha	Tirosi
Allahi	(Dino)	“Allahi” yaanno qaali Arawete qaaleeti; kuni suusu suˈmi “Magano” yaate. Arawetenna wolu afiinni tirroonnihu Qullaawu Maxaafi “Magano” yaanno qaale tirate “Allahi” yaanno.
Woˈmankare Dandaannoha	Kalaqama 17:1	Taalle nookki wolqa noosi yaate. “Woˈmanka Dandaanno Magano” yine tirroonnihu Elshadayi yaannohu Ibiraawootu qaali Qullaawu Maxaafi giddo lamala bayicho no.
Alfanna Omeega	Yohaannisi Ajuuja 1:8; 21:6; 22:13	“Umihunna goofimarchunnihu” woy “Albihunna Gedensihu” yaate; hatto yaa Yihowara albaanni Woˈmanka Dandaannohu wolu Magani dino, isi gedensaannino togoo Magani dino yaate. (Isayaasi 43:10) Alfanna omeega Giriikete fidalla giddo umitenna jeefonnite.
Hegere Hegerera Heeˈrannohu	Daanieeli 7:9, 13, 22	Hanafo dinosi; wolu ayino woy mayino heeˈrara albaanni gawalo nookki diro heeˈrino.—Faarso 90:2.
Kalaqaancho	Isayaasi 40:28	Baalankare kalaqinohu isooti.—Yohaannisi Ajuuja 4:11.
Anna	Maatewoosi 6:9	Heeshsho aannoho.
Magano	Kalaqama 1:1	Magansiˈnanniho; Jawaho. Elohiimi yaannohu Ibiraawootu qaali lowo kiiro kulannoho; tini Yihowa lowimma, ayirrinyenna gaacheenasi leellishshannote.
Magannate Magano	Marro 10:17	Yihowa, mitootu magansidhannote tidhitinokki maganna gede ikkikkinni, woˈmunkura aliidi Maganooti.—Isayaasi 2:8.
Bayira Rosiisaancho	Isayaasi 30:20, 21	Kaaˈlanno rosonna biddishsha aannoho.—Isayaasi 48:17, 18.
Hagiirraamo Magano	1 Ximootewoosi 1:11, Haaro Alame Tiro	Hagiidhannohonna tashshi yaannosiho.—Faarso 104:31.
Huuccatto Macciishshanno Magano	Faarso 65:2, 3	Ammanatenni huucciˈnanni huuccatto baalanta isi umisi macciishshanno.
Ani Aneeti	Fulo 3:14	Hedosi wonshate ikka hasiissannosire baalankare ikkanno. Tenne yaatto “Ikka Hagiirsiissannoere Baala Ikkeemmo” woy “Ikka Hasiˈreemmore Ikkeemmo” yineno tirroonni. (J. B. Roozerhaami qixxeessinoha Ze Emfasayizidi Bayibili; Haaro Alame Tiro) Tini yaatto, aante noo kiirora kulloonnihu Yihowa yinanni suˈmi afiˈrino tiro huwatate kaaˈlitannonke.—Fulo 3:15.
Hinaasaancho	Fulo 34:14	Iso calla magansiˈnasira hasiˈranno Maganooti. Konne qaale “hettisantannore cincannokkiho” hattono “iso calla magansiˈnasira hasiˈrannoha ikkasinni egennaminoho” yineno tirroonni.—Goodis Wordi Bayibili; Haaro Alame Tiro.
Hegere Moote	Yohaannisi Ajuuja 15:3, Haaro Alame Tiro	Gashshootisira hanafono gumulono dino.
Mooticha	Faarso 136:3	Annimma noosiho woy aliidiho; Ibiraawootu afiinni Adoonayi hattono Adoniyimi yinanni.
Olantote Mootichi	Isayaasi 1:9; Roomu Sokka 9:29	Lowota sokkaasinete olanto hajajannoho. Konne qaale “Olantote Mootichi Yihowa” hattono “gordu olanto Mooticha” yineno tirroonni.—Roomu Sokka 9:29, Haaro Alame Tiro; NET Bayibili, lekkaalliidi qaagiishsha.
Woˈmunkura Aliidihu	Faarso 47:2	Woˈmunkura aliidi roorre noosiho.
Qullaawa Magano	Lawishsha 9:10	Wolu baalunkunni roore (amanyootunni xalalahonna keeraanchoho) woy qullaawaho.
Seekkannoho (Dora Gannannihu Gede)	Isayaasi 64:8	Dora gananno manchira doru aana silxaane noosinte gede, Yihowarano mittu mittunku manchi aanano ikko dagate aana silxaane noosi.—Roomu Sokka 9:20, 21.
Wode Gatisannoho	Isayaasi 41:14	Yesuusi Kiristoosite wodote kakkalo widoonni mannu ooso cubbunninna reyotenni wodanno woy gatisanno.—Yohaannisi 3:16.
Goˈlinanni Kincho	Faarso 18:2, 46	Golonkeetinna gatisannonke Maganooti.
Gatisaancho	Isayaasi 45:21	Danotenni woy baotenni gatisanno.
Allaalaancho	Faarso 23:1	Magansidhannosire towaaxxannoho.
Woˈmunkura Aliidi Mooticha	Kalaqama 15:2	Woˈmunkura aliidi roorre noosiho; Ibiraawootu afiinni Adoonayi yinanni.
Woˈmunkura Aliidi Magano	Daanieeli 7:18, 27	Woˈmunkura aliidiho.

Ibiraawootu Afiite Qullaawa Borro Giddo Kulloonnita Bayichu Suˈmuwa

Qullaawu Maxaafi giddo kulloonniti mite bayichu suˈmuwa giddonsaanni Maganu suˈma amaddinote; hatto yaa kayinni kuri Maganu suˈmuwaati yaa diˈˈikkino.

Bayichu Suˈma	Qummeeshsha	Tirosi
Yaahiwe Yirie	Kalaqama 22:13, 14	“Yihowa Qixxeessanno”
Yihowa Niisii	Fulo 17:15	Yihowa “Malaateˈyaati.” Yihowa, soqqamaasinesi agarooshshenna kaaˈlo afiˈrate dukkissanno Maganooti.—Fulo 17:13-16.
Yihowa Shaaloomi	Ejjeetto 6:23, 24	“Yihowa Keereho”
Yihowa Shaamahi	Hiziqeeli 48:35	“Yihowa Hakkiicho No”

Maganu suˈma afanna woshsha hasiissanno. Mayira?

Maganu, mannu Yihowa yinanni suˈmasi afara hasiˈranno. Suˈmisi Qullaawu Maxaafi giddo lowo kume ikkanno bayicho heeˈranno gede assasi tenne leellishshanno.—Milkiyaasi 1:11.
Maganu Beetti Yesuusi, Maganu suˈmi lowore ikkinota duucha hige rosiisino. Lawishshaho isi “Suˈmikki qullaawa ikko” yee Yihowa huucciˈrino.—Maatewoosi 6:9; Yohaannisi 17:6.
Yihowa ledo jaalooma kalaqiˈrate assa hasiissannonkehu umi coyi, Maganu suˈma afatenna woshshate. (Faarso 9:10; Milkiyaasi 3:16) Maganu ledo togoo jaaloomi heeˈrinkero, isi uyinoti aante noo hexxo woˈmitannonke: “Isi ane baxanno daafira agareemmosi; suˈmaˈya ayirrisanno [“afino,” Haaro Alame Tiro] daafira goleemmosi.”—Faarso 91:14.
Qullaawu Maxaafi togo yaanno: “Lowoti kaphu magannanna mootoolla noota egenninoommo. Gordohonna baattote “Magannate” yinanni maganna [no].” (1 Qorontoosi 8:5, 6) Ikkirono, Qullaawu Maxaafi mitto halaalaancho Magano, Yihowa yinanni suˈmisinni bade kulanno.—Faarso 83:18.

a Mite Ibiraawootu Afii fullahaano Maganu suˈma “Yahiwe” yaa woyyitanno yitanno.

b Maganu suˈma haransine woshshinanni woyite “Ya” woy “Yahi” yinanni. Kuni haranchu suˈmi Qullaawu Maxaafi giddo mito 50 ikkanno bayicho no; lawishshaho kuni suˈmi “Halleeluya” yaanno qaali giddo no; hatto yaa “Yahi guwisse” yaate.—Yohaannisi Ajuuja 19:1.