Sai birxichira, Yesuusi kulino malaattare ronsoommo. Tini malaatta, iima Maganu Mangiste xintantinotanna tenne Mangiste Moote Yesuusi Kiristoosa ikkinota buuxissanno.

Qullaawu Maxaafi, Yesuusi Moote ikkanni heeˈrenni Sheexaanenna agaaninte iiminni tugannota kulanno. Xaa yannara Sheexanunna agaaninte millisa dandiitannohu uullate aana callaati; 1914 kawa mannu ooso heeshsho albinni roore qarru woˈminota ikkitinohu iseraati.—Yohaannisi Ajuuja 12:7, 9.

Alamete ikkito roore bushshanni hadhanni nooha ikkirono, Maganu Mangiste Moote Yesuusi Kiristoosi uulla woˈmate heeˈranno manna kaaˈlate lowore assino. Yesuusi masaalotenni kulinohu Qullaawa Maxaafa rosiisate loosi, batinyu manni Qullaawu Maxaafi biddishsha rose barru tuqa loosu aana hosiisanno gede kaaˈlanni no. (Isayaasi 2:2-4) Lowo miliyoone ikkanno manni Qullaawa Maxaafa rosansanni maatensa hagiirru noota ikkitino, hattono loosohonna woxeho borojje ikkikkinni noonsarinni hagiidhanni no. Insa xaa yannara dancha heeshsho heeˈra dandiitanno garanna Maganu Mangiste qansoota ikkate Yihowa maa assitara hasiˈrannoro rossanni no.

Yesuusi iima gashsha hanafinoha ikkirono, xaano uulla gashshe noohu mannu gashshooteeti. Ikkollana Maganu Yesuusa, “Baarigaarrakki aana roorre afiˈri” yiinosi. (Faarso 110:2) Hakko daafira muli yannara Yesuusi gibbannosire baala hune Maganoho maahoyye yite galtannori qarrinsanni fooliishsho afidhanno gede assanno.

Hatte yannara Maganu Mangiste maa assitanno?

• Kaphu ammaˈno fiite huntanno. Maganu daafira kapho rosiissannonna mannu heeshsho qarraataame ikkitanno gede assitinoti kaphu ammaˈno baˈanno. Qullaawu Maxaafi kaphu ammaˈno foora mancho gedeeta ikkitinota kulanno. Kaphu ammaˈno baˈanno woyite lowo mannira ragu baalu tunsannonsa.—Yohaannisi Ajuuja 17:15, 16.

• Mannu gashshoote huntanno. Maganu Mangiste mannu gashshoote baala raafo gantanno.—Yohaannisi Ajuuja 19:15, 17, 18.

• Bushuulle huntanno. Busha doogonsanni higa gibbinorinna Maganoho hajajantannokkiri ma ikkitanno? Qullaawu Maxaafi, “Bushuulle . . . Kaaliiqi baattote aaninni haaˈre hoolanno” yaanno.—Lawishsha 2:22.

• Sheexaanenna agaaninte huntanno. Maganu Mangiste, Sheexanunna agaaninte “manna soˈrisiisannokki gede” assitanno.—Yohaannisi Ajuuja 20:3, 10.

Maganu Mangiste doodhitinori mayi atoote afidhannoyya?

Iima heeˈre Moote ikke gashshannohu Yesuusi Kiristoosi, mannu gashshooti horo assa dandaannokkire assanno. Mannu mereerinni doorantinori 144,000 ledosi gashshitanno. (Yohaannisi Ajuuja 5:9, 10; 14:1, 3) Yesuusi Maganu fajjo uullate aana woˈmitanno gede assanno. Ikkina Maganu Mangiste uullate aana heedhannorira mayi atoote abbitanno?

• Dhibbanna reyo huntanno. “Tsiyooni heeˈranno manni giddo, ‘Dhiwamoommo’ yaannoha dianfanni” hattono ‘reyo diheedhanno.’—Isayaasi 33:24; Yohaannisi Ajuuja 21:4.

• Addu keerenna geˈne abbitanno. “Oosokki keerino batiˈrinoha ikkanno”; “annu annunkunni kaasiˈrino balasenna woyinete caali hunda harshammi yite fooliishshidhanno; masisannonsari diheeˈranno.”—Isayaasi 54:13; Mikiyaasi 4:4.

• Mannu hagiirsiisanno looso afiˈranno. “Loosiˈrinorinnino seeda diro hagiidhanni heeˈranno. Assidhannori baalu qinaannonsa.”—Isayaasi 65:22, 23.

• Baatto haarooˈmitanno. “Molo baatto hagiidhitanno; halalli baattorano daraaro fultanno.”—Isayaasi 35:1.

• Mannu hegerera heeˈrate maa assa hasiissannonsaro rosanno. “Hegere heeshshono, ati callu halaalaancho Magano ikkoottotanna soottoha Yesuusa Kiristoosa afate.”—Yohaannisi 17:3.

Maganu, atino konne atoote afiˈrattora hasiˈranno. (Isayaasi 48:18) Aane noo birxichira konne hagiirsiisanno atoote afiˈrate maa assa hasiissannohero ronseemmo.