Yesuusi togo yiino: “Gosa gosate aana, gashshootu gashshootu aana ola kayisanno. Addi addi darga baatto huxidhanno; woˈmankawa hudenna dhibbu daanno.” (Luqaasi 21:10, 11) Mitte haqqicho daraartanno woyite guma laaltara kaˈinota huwanteemmonte gede, Yesuusi kulino malaatta Maganu Mangiste rakkinota leellishshanno. Ikkina kuri coyibba mitteenni woˈmitino? Woy alame woˈmate leeltino? Hanni mite taje laˈno.

1. OLA

Umihu Alamete Oli yannara yaano 1914, hakkuyira albaanni kae egenninokki oli kaino! Xaggate egennaammi hakkonne diro ‘mannu ooso heeshsho orte soorrino dirooti’ yite xawissino; korkaatuno Umihu Alamete Oli kainohu hakkawarooti. Jajjabba olu massaarra lawishshaho, taanke, bomba tugganno horophilla, matariyyeessanna wole gawajjanno massaara halaˈladunni horoonsiˈra hananfoonnihu hatte yannaraati. Layinkihu Alamete oli yannara kayinni atomete bomba horoonsiˈra hananfoonni. Qoleno 1914 kayise babbaxxino bayicho olu kaino, hattono konni olinni lowo miliyoone ikkanno manni goofino.

2. BAATTOTE HUXANO

Insayikiloopiidiya Biritaanika yinanni maxaafi, diru kiiro “lowo geeshsha gawajjitannoti” 100 meddi yitannoti baattote huxano kaˈannota xawisino. Ameerikunniti baattote daafira xiinxallitanno uurrinsha aante noo rippoorte shiqishshino: “Lowo diro (1900nni kayise) assinoonni xiinxallo leellishshanno garinni diru kiiro 16 meddi yitannoti wolqaataame baattote huxano kaˈanno yine hendeemmo.” Mitootu alamete aana kaˈannoti baattote huxano kiiro lexxitinoha lawinohu albinni roore tenne ikkito afa dandiinoonni daafiraati yitanno; ikkirono, alamete doyichora kaˈannoti wolqaataame baattote huxano albinni roore lowo manni shetannonna reyanno gede assitanni no.

 3. HUDE

Alamete aana manna hude amaddannohu olunni, mussinnunni, miinju qarrinni, yanna saˈinota gibirinnu hayyo horoonsiˈratenni woy ayyare soorrantanno woyitira balanxe qixxaawa hoogatenniiti. Alamenniti Sagalete Uurrinsha “2018 Fushshitino Rippoorte” togo yitanno: “Alamete doyichora 821 miliyoone meddi yaanno manni gari sagale diafiˈrino; kuri giddo 124 miliyoone ikkannohu qamase galannore nafa diafiˈrino.” Diru kiiro 3.1 miliyoone ikkanno qaaqquulli gattaawe reyanno. Hatto yaa, 2011 alamete doyichora reyino qaaqquulli giddo 45 anga ikkannohu reyinohu gatto amaddeennaati yaate.

4. DHIBBA

Alamenniti Fayyimmate Uurrinsha qixxeessitino borro togo yitanno: “Lemiina mittikki sani, gawajjannohu taraawanno dhibbi uwinoho. Koleeru, bica shekkeerenna wolu alba noo dhibbi wirro kaino, hattono Saarsi, infiluyenzu, iboolanna ziika yinannihu haaru dhibbi kalaqamino.” Gedensoonni qole Koroonu fayya ubbino. Sayinsete egennaamminna akimootu dhibbu daafira lowore affinoha ikkirono, batinyu dhibbira xagicho diaffino.

5. ALAMETE DOYICHORA LOONSANNIHA SABBAKATE LOOSO

Yesuusi wole malaate kulanni togo yiino: “Gosa baalate naqaashshe ikkanno gede kuni Maganu Gashshootihu Danchu Duduwi gobba baalate kulamanno; hatte yannara goofimarchu daanno.” (Maatewoosi 24:14) Alame qarrunni quuxxi yite noote tenne yannara, babbaxxitino gosanni dayinohu sette miliyoone saˈˈanno manni Maganu Mangisteha dancha duduwo 240 gobbara heeˈranno mannira 1,000 saˈˈanno afiinni sabbakanni no. Konni albaanni sabbakate looso kageeshshi geeshsha loonse diegenninoonni.

Yesuusi kulino malaatta yannankera woˈmitanni no. Tenne malaatta daafira afa hasiissannonkehu mayiraati? Korkaatuno Yesuusi “Kuni coyi baalu ikkanna laˈinanni yannara, Maganu gashshooti rahe noota affe” yiino.—Luqaasi 21:31.

Yesuusi kulino malaattanna Qullaawu Maxaafi tenne hajo lainohunni xawisanno shallago Maganu 1914nni iima Mangistesi xintinota leellishshanno. a Hatte yannara Maganu Beettosi Yesuusi Kiristoosi Moote asse shoomino. (Faarso 2:2, 4, 6-9) Muli yannara Maganu Mangiste uulla gashshitanno; hattono wole gashshoote baala hunte uulla gannate assiteenna mannu ooso hegerera heedhanno.

Yesuusi rosiisinonke garinni “Gashshootikki dayo, hedoottori gordoho ikkinonte gede, baattote aanano ikko” yine huucciˈneemmo huuccattora muli yannara dawaro afiˈneemmo. (Maatewoosi 6:10) Ikkina Maganu Mangiste 1914nni xintantu yannanni kayisse maa assitanni keeshshitino? Tini Mangiste mannu ooso woˈma gashsha hanaffanno woyite maa assitanno yine hexxa dandiineemmo?