Galtekkinna ati mittimmate heeshsho heeˈra hanaffinanni wote, addi addi qarri iillannoˈne. Kuni qarri kalaqamannohu lamunku heddinanni gari hattono mitto coye laˈinanni gari babbaxxanno daafira ikkara dandaanno. Qoleno wolu raginni woy hendoonnikki coyinni qarru kalaqamara dandaanno.

Qarru tuncu yaanno wote noo coye ammane adha qarrissara dandiitanno; Qullaawu Maxaafi kayinni iillinonke qarra xooqa agurre tirreemmo gede amaalannonke. (Maatewoosi 5:23, 24) Qullaawu Maxaafiha xintu seera harunsaˈne qarra tirate dancha mala ikkitannoˈne.

QULLAAWU MAXAAFI MAYYAANNO? “Coyiˈrate yanna no.” (Mekibibi 3:1, 7) Yanna gaaˈmitine iillinoˈne qarri daafira hasaabbe. Kaˈino hajo daafira macciishshaminoˈnere woy heddinoonnire galteˈnera maaxxinikkinni kulle. Duuchanka wote galteˈne ledo “halaale coyidhe.” (Efesooni 4:25) Kiˈneneeto qeeˈla qarra ikkitannoˈne wote nafa galteˈne ledo yekkeerantinoonte. Shaqqillunni coyiˈra shiimu coyi batiˈre gaaro kalaqannokki gede assitanno.—Lawishsha 15:4; 26:20.

Mittu coyira sumuu yaa hoogginanni wote nafa, shaqqadda ikke; galteˈne baxxinannitanna ayirrissinannita leellisha deˈinoonte. (Qolasiyaasi 4:6) Dandaamiˈne deerrinni, kalaqamino qarra mulenni tirre; qoleno mimmito coyishiisha gibbinoonte.—Efesooni 4:26.

MAA ASSA DANDIITINANNI?

• Kalaqamino qarri daafira hasaawate woyyitanno yanna doodhe

• Galtekki coyidhanno wote, mereero eittokki macciishshi. Coyiˈrate tarakki agadhi

QULLAAWU MAXAAFI MAYYAANNO? “Kiˈne kiˈneneewa lubbora baxamme. Mimmito ayirrisate umire ikke.” (Roomu Sokka 12:10) Macciishshitinanni gari lowore soorranno. Galteˈne mitto coye laˈanno gara huwatate woˈnaalle; konne assate “kuˈu kuˈuyi hedo huwattinannire ikke,” hattono “shooshaqoota ikke.” (1 Pheexiroosi 3:8; Yaaqoobi 1:19) Wodana wolewa wortine, macciishshitinanni heedhinoonniha lawissinoonte. Dandaamannoha ikkiro, assitinanni heedhinoonnire agurtine galteˈne yitannore macciishshe woy gedensaanni hasaabbinanni gede xaˈme. Galteˈne qahiˈne gede ikkikkinni aggaareˈne gede assitine laˈinanniha ikkiro, ‘hanqoho dimuddantinanni.’—Mekibibi 7:9.

MAA ASSA DANDIITINANNI?

• Coyi adhama giwihero nafa, woˈmu wodanikkinni macciishshi

• Galtekki coyidhanno qaalla calla laˈˈa agurte yitara hasidhinore wodanchate woˈnaali. Hattono galtekki coyidhanno wote bisise millimmonna qoonqose gara huwati

QULLAAWU MAXAAFI MAYYAANNO? “Diinaggaambe loonsanni loosi baalunku horo aanno; mullu hasaawi kayinni buxima abbanno.” (Lawishsha 14:23) Mittu qarri daafira hasaabbine ma garinni tirtiniro woyyannoro sumuu yaaˈne calla diguddanno. Lamunku sumuu yitine murtinoonni coye assa hasiissannoˈne. Tennera lowo looso loosanna sharrama hasiissannoha ikkiro nafa tini kiissannote. (Lawishsha 10:4) Mitteenni kaaˈlantine woy buusantine loossinanniha ikkiro, diinaggaabbine loossinanni loosinni “dancha guma” afidhinanni.—Mekibibi 4:9.

MAA ASSA DANDIITINANNI?

• Qarraˈne tirate mittu mittunku assa hasiissannoˈne coye hasaabbine xaadisidhe

• Maa woyyeessidhinoonniro yannate kiiro layidhe