Seenne adhatto wote haaro fiixa kalaqiˈratto. Annakkinna amakki ayewoteno baxattohanna ayirrisattoha ikkirono, xaate kayinni atera uullate aana galtekki rooranno manchi dino. Ate woy minaamakki ayiddi giddo mitootaho tenne ammane adha qarrissansara dandiitanno. Ikkirono, haaro maateˈne jawaata assiˈrate sharrantinanni wote, quwa saˈnikkinni ayiddiˈne ledo salaametenni heeˈra dandiitinanni gede Qullaawu Maxaafihu xintu seeri kaaˈlannoˈne.

QULLAAWU MAXAAFI MAYYAANNO? “Annakkinna amakki ayirrisi.” (Efesooni 6:2) Aye geeshshano jawa ikkittoro annakkinna amakki ayirrisa hasiissannohe. Galtekkino annasenna amase ayirrisa hasiissannoseta qaagi. “Baxillu dihinaasanno”; konni daafira galtekki annisenna amase ledo noose aante laˈe yaaddooti.—1 Qorontoosi 13:4; Galaatiya 5:26.

MAA ASSA DANDIITINANNI?

• Mimmito, “Ayiddikki ayewoteno ane woffi assanno” woy “Amakki ani asseemmare horo dinaaddanno” yaa lawinore yitinannikki gede qorophe

• Galtekki heddanno gara huwatate woˈnaali

QULLAAWU MAXAAFI MAYYAANNO? “Manchu annasinna amasi agure, minaamasi ledo quraanyamanno; lamunku mitto maala ikkitanno.” (Kalaqo 2:24) Annuwiˈnenna amuuwiˈne, adhantini gedensaannino kiˈne towaata hasiissannonsahu gede assite heddara dandiitanno; hakko daafira quwa saˈe kiˈne maate giddora eate woˈnaaltara dandiitanno.

Ayiddiˈne kiˈne maate mereero mageeshshi geeshsha ea hasiissannonsaro hasaabbine xaadisidhe, hattono muroˈne baxillunni kullensa. Insa hanqisannokki garinni tenne xawissine kula dandiitinanni. (Lawishsha 15:1) Shooshanqe, joongillunna cinca annuwiˈnenna amuwiˈne ledono ikko wolu fiixiˈne ledo dancha aante heedhannoˈne gedenna ‘mimmito baxillunni dandiitine’ heedhinanni gede kaaˈlitannoˈne.—Efesooni 4:2.

MAA ASSA DANDIITINANNI?

• Fiixiˈne quwa sae kiˈne heeshsho giddora eanni nooti leeltuˈnero, lamunku wodanaaˈmitine heedhinoonni yannara hasaabbe

• Togoo hajo ma garinni tira hasiissannoˈnero hasaabbine xaadisidhe