Na yâ ti article so e yeke bâ:

•  Fréquentation ayeke nyen?

•  Eskê mo yeke prêt awe ti fréquenté mbeni zo?

  Ambeni zo abâ fréquentation tongana mbeni ye ti ngia. Me, na yâ ti article so, fréquentation aye ti sara tënë ti ngoi so mbeni koli na mbeni wali ayeke gi ti hinga mba ti bâ wala ala lingbi ti sara mariage. Tongaso, but ti sarango fréquentation ayeke dä. A yeke pëpe mbeni ye so zo ayeke sara ni gï ti passé temps na mbeni koli wala na mbeni wali.

 Tongana ngoi ayeke hon, fréquentation ayeke mû lege na ala use kue ti bâ wala ala yeke sara mariage wala ala yeke arrêté ti fréquenté mba. Tongana mo yeke fréquenté mbeni zo, hinga so mbeni oko ti aye so apeut ti si.

 Na nduru tënë: Tongana mo pensé so mo yeke prêt awe ti fréquenté mbeni zo, a fa so mo yeke nga prêt ti sara mariage.

  So fréquentation apeut ti gue na mbeni zo ti sara mariage, a yeke nzoni mo gbu li na ndö ti asarango ye ti mo so apeut ti sara si fréquentation ni aga nzoni wala pëpe. Na tapande, bâ aye so a fa ge:

•   Songo ti mo na azo ti sewa ti mo. Fason so mo yeke sara ye na mbage ti aparent ti mo nga na aita ti mo, surtout na ngoi so mo yeke stressé, ayeke fa ande fason so mo yeke sara ye na mbage ti koli wala wali ti mo.

   Mama-ndia ti Bible: “Ala zi batango zo na bê, songo bê, ngonzo, dengo kongo na ndö ti zo na zonga, ala zia ni yongoro kâ, ala zi nga asioni ye kue.”—aÉphésien 4:31.

   Hunda terê ti mo: ‘Eskê aparent ti mbi nga na aita ti mbi ayeke tene so mbi ne ala? Wala tongana mbi na mbeni zo ti sewa ti mbi e mä terê ape, eskê mbi yeke causé na zo ni yeke, wala bê ti mbi ayeke son?’

•   Sara asacrifice: Tongana mo sara mariage ni awe, mo bezoin ti gbu li na ndö ti ye so koli wala wali ti mo aye nga ngoi na ngoi ti sara ambeni sacrifice ndali ti ye so koli wala wali ti mo aye.

   Mama-ndia ti Bible: “Zia zo oko oko angbâ ti gi ye so asara nzoni na mba ti lo, me pëpe ye so asara nzoni gï na lo wani.”—1 aCorinthien 10:24.

   Hunda terê ti mo: ‘Eskê mbi ye lakue ti tene a sara ye gï tongana ti so mbi ye? Eskê ambeni zo abâ so mbi yeke sara ye ahon ndö ni? Eskê mbi yeke na habitude ti zia abezoin ti amba ti mbi kozo na ti mbi?’

•   Sara terê ti mo kete. Mbeni nzoni koli wala wali ayeke yeda na afaute ti lo nga lo yeke hunda pardon na mba ti lo ni na bê ti lo kue.

   Mama-ndia ti Bible: “Fani mingi e kue e yeke sara afaute.”—Jacques 3:2, kete tënë na gbe ni.

   Hunda terê ti mo: ‘Eskê mbi yeke yeda na afaute ti mbi, wala mbi yeke gi ka araison? Eskê bê ti mbi ayeke son ka tongana azo afa na mbi adéfaut ti mbi?’

•   Tënë ti nginza. Mingi ni, nginza la ayeke ga na kpale na yâ ti mariage. Me zo so ahinga ti geré nginza nzoni apeut ti kpe kpale so.

   Mama-ndia ti Bible: “Zo wa na popo ti ala, tongana lo ye ti sara mbeni tour, lo yeke duti kozoni pëpe ti diko ngere ni, ti bâ wala ye so lo yeke na ni alingbi ti tene lo hunzi na tour ni?”—Luc 14:28.

   Hunda terê ti mo: ‘Eskê mbi yeke sara ka dépense kirikiri, wala mbi yeke sara bon lakue? Tongana nyen la mbi peut ti fa so mbi yeke geré nginza nzoni?’

•   Songo ti mo na Jéhovah. Tongana mo yeke Témoin ti Jéhovah, mo doit ti duti na habitude ti diko Bible lakue nga ti gue na abungbi.

   Mama-ndia ti Bible: “Ngia ayeke na ala so ahinga so ala yeke na bezoin ti aye ti yingo.”—Matthieu 5:3.

   Hunda terê ti mo: ‘Eskê mbi yeke sara kue ti bata nzoni songo so mbi yeke na ni na Jéhovah? Eskê aye so mbi yeke sara ti voro na Jéhovah ayeke kota ye na lê ti mbi, wala mbi yeke zia ambeni ye akanga lege na mbi ti sara ni?’

 Na nduru tënë: Tongana mo ye ti sara mariage duti zo so ayeke na nzoni sarango ye. Tongana mo sara effort ti duti mbeni nzoni zo, peut-être ayeke pusu mbeni zo so ayeke na même sarango ye ni so ti ga na mbage ti mo.