Ο Ιησούς πριν τι μπιάντιβελ ατθέ κι πφουβ τζουβντιόλας σαρ άγγελος κο ουρανός, οτθάρ καέκ τζενό να ισινέ σαρ λέστε. (Ιωάννης 8:23) Βοβ ισινέ ο πρώτος σο κερντάς ο Ντεβέλ, ντα λέσαρ κερντάς σαρέ ο γιαβερά πράγματα. Ισί ο μόνος σο κερντιλό κατευθείαν κατά Ιεχωβά, οτθάρ βακέρντιβελα ο «μονογενής» τσσαβό ι Ντεβλέσκο. (Ιωάννης 1:14) Ο Ιησούς ισί «ο Λόγος» επειδή εμ βακερέλας, εμ κερέλας ο λάφια πι Νταντέσκε.​—Διαβάνεν Παροιμίες 8:22, 23, 30· Κολοσσαείς 1:15, 16.

Ο Ντεβέλ μπουτσσαντάς πι τσσαβές κι πφουβ ντα τσσουντάς λέσκι ζωή κι μήτρα κι Μαριάκι σο ισινέ εκ Ιουδαία παρθένα. Οντουλέσκε ο Ιησούς να τθερέλας νταντές ατθέ κι πφουβ. (Λουκάς 1:30-35) Αβιλό κι πφουβ (1) για τι σικλιαρέλ-αμέν ι αλήθεια ι Ντεβλέσκε, (2) για τι σικαβέλ αμένγκε πι ζωγιάσαρ σαρ τι κεράς οντουβά σο μανγκέλα αμένταρ ο Ντεβέλ όταν τθεράσα δυσκολίες ντα (3) για τι ντελ πι ζωή αμένγκε σαρ «λύτρος».​—Διαβάνεν Ματθαίος 20:28.

Λύτρος ισί οντουβά σο ντιντιόλα για τι σώντιβελ εκ τζενό κατά μεριπέ. (Έξοδος 21:29, 30) Όταν ο Ιεχωβά κερντάς ι τζενέν, να τθερέλας πι γκοντιάτε τι πφουριόν ντα τι μερέν. Σαρ τζανάσα-λες ανταβά; Ο Ντεβέλ βακερντάς κο πρώτος τζενό, κο Αδάμ, ότι άμα κα κερέλας οντουβά σο βακερέλα η Αγία Γραφή «αμαρτία», κα μερέλας. Άρα, άμα να κα κερέλας ι αμαρτία, να κα μερέλας. (Γένεση 2:16, 17· 5:5) Η Αγία Γραφή βακερέλα ότι ο μεριπέ αβιλό κο ντουνιάς κατά Αδάμ ντα  οτθάρ σαρέ ο τζενέ λιντέ ι αμαρτία ντα ο μεριπέ. Τθεράσα ανάγκη ο λύτρος για τι νασέλ αμένταρ η τιμωρία ι μεριμάσκι σο λιντάμ κατά Αδάμ.​—Διαβάνεν Ρωμαίους 5:12· 6:23.

Κον κα μπορίνελας τι ντελ ο λύτρος για τι σώντιβας κατά μεριπέ; Όταν μεράσα, ποκινάσα μόνο αμαρέ αμαρτίες. Καέκ ατελής τζενό να μπορίνελα τι ποκινέλ πι ζωγιάσαρ ο αμαρτίες ι γιαβερένγκε.​—Διαβάνεν Ψαλμός 49:7-9.

Ο Ιησούς να ισινέ σαρ αμέντε, βοβ ισινέ τέλειος. Οτθάρ, να μουλό πι αμαρτιένγκε, επειδή να κερντάας ούτε εκ τανί. Αλλά μουλό για τι λελ ο αμαρτίες ι γιαβερέ τζενένγκε. Ο Ντεβέλ σικαντάς μπουτ αγάπη σαρέ ι τζενένγκε επειδή μπουτσσαντάς πι τσσαβές τι μερέλ αμένγκε. Εμ ο Ιησούς σικαντάς πι αγάπη, επειδή ασουντάς πι Νταντές ντα ντινάς πι ζωή αμένγκε.​—Διαβάνεν Ιωάννης 3:16· Ρωμαίους 5:18, 19.

Ντικχ ο βίντεος Σόσκε Μουλό ο Ιησούς;

Όταν ο Ιησούς ισινέ κι πφουβ, κερντάς λατσσές ι νασφαλέν, ι πασλέν, τζουβντιαρντάς μουλέν ντα βοηθιντάς τζενέν σο ταλαιπωρίντιβενας. Αντικάς, σικαντάς σο κα κερέλ ανγκλ’ αμέντε σαρέ ι τζενένγκε σο ασουνένα-λες. (Ματθαίος 15:30, 31· Ιωάννης 5:28) Αφού μουλό ο Ιησούς, ο Ντεβέλ αντάς-λες πάλι κι ζωή κο ουρανός ντα κερντάς-λες μπουτ πιο μπαρό κατά άγγελοι. (1 Πέτρου 3:18) Μετά, ο Ιησούς μπεσλό κο δεξιά του Ιεχωβά μέχρι τι ντελ-λες ο δικαίωμας τι κυβερνίνελ σαρ Βασιλιάς σαρί κι πφουβ. (Εβραίους 10:12, 13) Ακανά ο Ιησούς ισί Βασιλιάς κο ουρανός, ντα λέσκε μαθητές βακερένα ο λατσσέ αμπέρια σαρό κο ντουνιάς.​—Διαβάνεν Δανιήλ 7:13, 14· Ματθαίος 24:14.

Ατζεχάνικ, ο Ιησούς σο ισί Βασιλιάς κα εξαφανίνελ ο προβλήματα ντα σαρέ οντουλέν σο κερένα-λεν. Σαρέ οντουλά σο τθερένα πίστη κο Ιησούς ντα ασουνένα-λες κα τζουβντιόν λατσσές κο παράδεισος κι πφουβ για πάντα.​—Διαβάνεν Ψαλμός 37:9-11.