Da li tano o Devel svugde prisutno?
So phenela i Biblija?
O Devel sa dikhela hem šaj te delujini kaj god mangela (Poslovice 15:3; Jevrejima 4:13). Ama, i Biblija na phenela soj tano o Devel prisutno svugde hem ko sa o buća. Umesto odova, oj phenela soj tano ov osoba hem isi le than kaj živini.
Sar izgledini o Devel. O Devel tano duhovno osoba (Jovan 4:24). O manuša našti te dikhen le (Jovan 1:18). O vizije kola tane pisime ki Biblija mothovena so o Devel živini ko jekh odredimo than. Nigde na pisini soj tano ov svugde prisutno (Isaija 6:1, 2; Otkrivenje 4:2, 3, 8).
Kaj živini o Devel. O Devel živini ko duhovno područje kova nane deo kotar fizičko svemir kova dikhaja. Ki Biblija pisini so o Devel živini ko nebo (1. Kraljevima 8:30). Isto ađahar, opisujimo tano jekh događaj ked o duhovna stvorenja alje anglo Jehova a hem odova mothovi so ov bešela ko jekh odredimo than (Jov 1:6).
Ako o Devel nane svugde prisutno, da li ćaće šaj te brinini pe mandar?
Ja. O Devel but brinini pe svakone manušestar. Iako živini ko duhovno područje, ov primetini sa e manušen kola ćaće mangena te šunen le hem pomožini len (1. Kraljevima 8:39; 2. Letopisa 16:9). Hajde te dikha sar o Jehova mothovi so brinini pe ando manuša kola tane lese verna.
Ked molinaja amen. O Jehova šaj te šunel amare molitve ko isto trenutko ked molinaja amen (2. Letopisa 18:31).
Ked hijam obeshrabrime. „O Jehova tano paše okolencar kola tane phage vileja, ov spasini okolen kola tane obeshrabrime“ (Psalam 34:18).
Ked valjani amenđe vođstvo. O Jehova phenela: „Ka pomožinav tut te haljove o buća hem ka sikavav tut“ (Psalam 32:8). Ov ćerela odova prekalo po Lafi, i Biblija.
O pogrešna razmišljanja andi e Devlesi prisutnost
Pogrešno razmišljanje. O Devel tano prisutno ko sa so stvorinđa.
Ćaćipe. O Devel na živini ni ki phuv ni bilo kaj averthe ko fizičko svemir (1. Kraljevima 8:27). Tačno tano so o ćerenja hem sa aver soj tano stvorimo „mothovena e Devlesi slava“ (Psalam 19:1). Ama, isto sar so jekh slikari na živini ki slika koja crtinđa, ađahar ni o Devel na živini ko odova so stvorinđa. Ama, i slika šaj te mothovi amenđe diso ando okova kova crtinđa la. Ko slično način, sa so dikhaja zalo amende mothovi amenđe diso ando e Devlese osobine sar soj tane olesi moć, mudrost hem mangipe (Rimljanima 1:20).
Pogrešno razmišljanje. O Devel mora te ovel svugde prisutno te šaj te đanel sa hem te ovel Svemoćno.
Ćaćipe. O Devel koristini po sveti duh ili pi aktivno sila te šaj sa te ćerel. Prekalo po sveti duh, o Devel šaj te dikhel sa hem te ćerel bilo so, bilo kaj hem bilo ked, bizo te ovel prisutno ko disavo than (Psalam 139:7).
Pogrešno razmišljanje. Ko Psalam 139:8 pisini: „Ked bi hem ko nebo ukljava, tu bi oveja uduri, ked bi ko grobo pašljovava, tu bi oveja hem uduri.“ Odova značini soj tano o Devel svugde prisutno.
Ćaćipe. Ko akava stih na vaćeri pe ando odova kaj živini o Devel. Odothe poetska lafencar mothovi pe so o Devel šaj te pomožini amen kaj god te ova.
a Jehova tano e Devleso anav, sar so šaj te dikha ki Biblija.
Dikhen hem akava
OSNOVNA E BIBLIJAKE SIKLJOVIBA
Da li o Devel ćaće postojini?
Dikh sose tano logično te verujina so o Devel ćaće postojini.
PUĆIBA HEM ODGOVORIJA
Soj tano o sveti duh?
Sose i Biblija mothovi soj tano o sveti duh sar e Devlese „vasta“?
AMENDAR
Rode neko te posetini tut
Vaćer ando e biblijake pućiba ili sikljov poviše ando Jehovase svedokija.