Marcos 12:1-44
-
Wañuchiq llank’aqkunamanta (1-12)
-
Diosmanta, Roma reymantawan (13-17)
-
Kausarimpuymanta Jesusta tapusqankumanta (18-27)
-
Iskay jatun kamachikuykunamanta (28-34)
-
¿Davidpa churinchu Cristo karqan? (35-37a)
-
Kamachikuy simita yachachiqkunamanta cuidakunamanta (37b-40)
-
Wajcha viudaq iskay qolqecha churasqanmanta (41-44)
12 Chaymantataq Jesusqa imaymana rijch’anachiykunata willaspa* yachachiyta qallarirqan, nirqanmi: “Juj runan chajranpi uvasta plantarqan,+ jinaspa muyuriqninta cercarqan, uvas sarunatapas t’oqorqan, juj torretapas perqarqan;+ jinaspa llank’aqkunaman arrendopi qospa karu llaqtaman ripurqan.+
2 Cosecha tiempo chayamuqtintaq juj kamachinta llank’aqkunaman kacharqan chajraq rurusqanmanta tupaqninta juñumunanpaq.
3 Chay llank’aqkunan ichaqa jap’ispa maqaykurqanku, ch’usaq makintintataq qatirparipurqanku.
4 Jinan chajrayoqqa jujnin kamachintañataq paykunaman kacharqan, ichaqa umanta k’irispankun millayta k’amiykurqanku.+
5 Wajmantan juj kaq kamachintañataq kacharqan, paytan ichaqa wañuchipurqanku; kachallarqantaqmi jujkunatapas, jinan wakinta maqaykurqanku, wakintataq wañuchipurqanku.
6 Qhepatataq chajrayoqqa munakusqan churinta+ paykunaman kacharqan, churiytaqa respetanqakuchá, nispa.
7 Llank’aqkunataq rikuruspa ninakurqanku: Kaymi herencia chaskiqqa.+ Jaku wañuchimusun, jinan herencianqa noqanchispaq kapunqa, nispa.
8 Jinan paykunaqa jap’ispa wañuchipurqanku, chajra jawamantaq wijch’umurqanku.+
9 ¿Imananqataq uvas chajrayoqri? Jamuspan chay llank’aqkunata wañuchipunqa, uvas chajrantataq jujkunaman arrendanqa.+
10 ¿Manachu Diospa simin qelqaq nisqanta leerqankichis? Chaypin nin: Perqaqkunaq wijch’usqan rumin esquina jap’iq jatun kaq rumi kapun.+
11 Chayqa Jehová* Diosmantan jamun, ancha munaytaqmi noqanchispaqqa”,+ nispa.
12 Paykunataq chay willakuy willasqanpi paykunamanta rimasqanta reparaspa jap’iyta munarqanku. Ichaqa runakunata manchakuspan payta saqerparispa ripurqanku.+
13 Chaymantataq paykunaqa wakin fariseokunata, Herodespa t’aqanmanta* wakin runakunatawan Jesusman kacharqanku rimasqanpi pantachinankupaq.+
14 Jinan paykunaqa rispa nirqanku: “Yachachikuq, yachaykun cheqaq rimaq kasqaykita, qanqa manan jujkunaq allin qhawarinantachu maskhanki, manataqmi jujkunaq jawallantachu qhawankipas, aswanpas Diospa ñannintan cheqaqta yachachinki, niwayku: ¿Allinchu Roma reyman* impuesto pagay, icha manachu?
15 ¿Pagananchischu icha manachu?”, nispa. Jesustaq iskay uya kasqankuta reparaspa nirqan: “¿Imaraykun pruebaman churawankichis? Juj denario qolqeta* jaywamuwaychis qhawanaypaq”, nispa.
16 Qolqeta jaywaqtinkutaq Jesusqa tapurqan: “¿Piqpa uyanmi kaypi kashan? ¿Piqpan kay sutipas?”, nispa. Paykunataq nirqanku: “Roma reypan”, nispa.
17 Jinan Jesusqa nirqan: “Roma reypa kaqtaqa Roma reyman qopuychis,+ Diospa kaqtataq Diosman qopuychis”,+ nispa. Chaymi paymanta sinchita admirakurqanku.
18 Chaymantataq “kausarimpuyqa manan kanchu” niq saduceokuna*+ Jesusman qayllaykuspa nirqanku:+
19 “Yachachikuq, Moisesmi qelqarqan: Pi runapas manaraq wawayoq kashaspa wañukapunman chayqa, wayqenmi chay wañuqpa esposanwan casarakapunqa, chhaynapi wawata churiyapunanpaq,+ nispa.
20 Juj familiapin karqan qanchis wayqentin runakuna. Ñaupaq kaqmi juj warmiwan casarakurqan, manaraq wawayoq kashaspataq wañukapurqan.
21 Jinan iskay kaq wayqeqa viudawan casarakurqan, paypas manaraq wawayoq kashaspan wañukapullarqantaq, kinsa kaqwanpas chhaynallataqmi karqan.
22 Qanchisnintinmi wañukapurqanku chay warmiwan manaraq wawayoq kashaspa. Qhepamanqa chay warmipas wañukapullarqantaqmi.
23 Qanchisninkutaq chay warmiwan casarakurqanku chayqa, ¿mayqenninkuq esposantaq kanqa kausarimpuy kaqtinri?”, nispa.
24 Jinan Jesusqa paykunata nirqan: “Qankunaqa manan entiendenkichischu Diospa simin qelqatapas ni imaynachus Diospa atiynin kasqantapas,+ chaymi pantashankichis.
25 Wañusqakuna jatarimpuqtinqa manan qharikunapas casarakunqakuchu, ni warmikunapas casarachisqachu kanqaku, aswanpas paykunaqa janaq pachapi angelkuna jinan kanqaku.+
26 Wañusqakunaq kausarimpunanmantaqa, ¿manachu leerqankichis raurashaq kiskayoq sach’amanta Moisespa qelqasqanpi? Chaypin payta Dios nirqan: Noqan kani Abrahanpa Diosnin, Isaacpa Diosnin, Jacobpa Diosnin,+ nispa.
27 Payqa manan wañusqakunaq Diosninchu, aswanpas kausaqkunaq Diosninmi. Qankunaqa sinchi pantasqapunin kashankichis”,+ nispa.
28 Kamachikuy simita yachachiqkunamanta jujninmi chayman chayamuspa tapunakusqankuta uyarirqan, Jesuspa allintapuni kutichisqanta reparaspataq payta tapurqan: “¿Mayqen kamachikuytaq llapan kamachikuykunamantapas aswan jatunri?”,+ nispa.
29 Jinan Jesusqa nirqan: “Aswan jatun kamachikuyqa kaymi: Israel runakuna, uyariychis, Jehová* Diosninchisqa ch’ulla Jehová* Diosllan.
30 Jehová* Diosniykitan munakunki tukuy sonqoykiwan, tukuy almaykiwan,* tukuy yuyayniykiwan, tukuy kallpaykipiwan,+ nisqa.
31 Chayman qatiq iskay kaq jatun kamachikuytaq kay: Runamasiykitan munakunki qan kikiykita jina,+ nisqa. Manan ima kamachikuypas chay iskay kamachikuykunamanta aswan jatunqa kanchu”, nispa.
32 Jinan kamachikuy simita yachachiqqa nirqan: “Allinmi yachachikuq, cheqaqllatan nishanki, “Diosqa ch’ullallan, manataqmi paymantaqa juj Diosqa kanchu”.+
33 Diosta tukuy sonqowan, tukuy yuyaywan,* tukuy kallpawan munakuyqa runamasitapas kikiykita jina munakuyqa llapa ruphachina ofrendamantapas ima sacrificiomantapas aswan allinraqmi”,+ nispa.
34 Jinan Jesusqa yachaywan rimasqanta reparaspa nirqan: “Diospa gobiernonmantaqa manan karupichu kashanki”, nispa. Manañataqmi pipas manchakuymanta tapuyta munarqanñachu.+
35 Templopi yachachishaspallaraqmi Jesusqa nirqan: “¿Imaynapitaq kamachikuy simita yachachiqkunari ninku: Cristoqa Davidpa churinmi, nispa?+
36 Kikin Davidmi santo espirituq* yuyaychasqan+ nirqan: Jehová* Diosmi Señorniyta nirqan: Paña ladoypi tiyaykuy, enemigoykikunata chaki sarunaykiman churanaykama,+ nispa.
37 Kikin Davidtaq Señor nirqan chayqa, ¿imaynapitaq paypa churinri kanman?”,+ nispa.
Ancha askha runakunan chaypiqa kasharqanku, sumaqtan paytaqa uyarisharqanku.
38 Yachachishaspan Jesusqa nillarqantaq: “Kamachikuy simi yachachiqkunamanta cuidakuychis, paykunaqa pampakama p’achayoqmi maypipas puriyta munanku, mercado plazakunapipas napaykunatan munanku,+
39 sinagogakunapipas ñaupaqllapin tiyayta munanku, jatun mijuykunapipas allin kaq tiyanallapin tiyayta munanku.+
40 Paykunaqa viudakunaq kaqninkunatan* rajranku, jujkunaq qhawarinallanpaqtaq unaytaraq mañakunku. Paykunaqa aswan castigasqan kanqaku”, nispa.
41 Chaymantataq qolqe churanakunaq chimpanpi tiyaykurqan,+ chaymantan qhawarqan runakunaq qolqe churasqankuta; askha qhapaqkunan askha qolqeta churasharqanku.+
42 Chayllamanmi jamurqan juj wajcha viuda, jinaspa iskay pisi valorniyoq qolqechata churaykurqan.*+
43 Jinan Jesusqa discipulonkunata wajaspa nirqan: “Cheqaqtan niykichis: Qolqe churanakunaman llapa churaqkunamantapas kay wajcha viudan aswan askhataqa churaykun.+
44 Llapa churaqkunaqa puchullankumantan churanku, kay viudan ichaqa wajcha kayninpi tukuy kaqninta churaykapun, kausananpaq llapa kaqninta”,+ nispa.
Uraypi willakuykuna
^ Chaypiqa “ejemplokunawan” otaq “tupanachiykunawan” nillanmantaqmi.
^ Qhaway “Astawan yachanapaq A5” nisqata.
^ Qhaway Explicasqa simikuna nisqapi “Herodespa t’aqan” nisqata.
^ Griego rimaypiqa “Cesarman” ninmi. Chhaynatan sutichaqku Roma llaqtapi wakin reykunata. Qhaway Explicasqa simikuna nisqapi “César” nisqata.
^ Juj denario qolqeqa juj p’unchay llank’asqamanta pagon karqan. Qhaway “Astawan yachanapaq B14” nisqata.
^ Qhaway Explicasqa simikuna nisqapi “Saduceokuna” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Griego rimaypiqa “tukuy entiendeywan” ninmi.
^ Qhaway “Astawan yachanapaq A5” nisqata.
^ Chaypiqa “Diospa atiyninpa” nillanmantaqmi. Qhaway Explicasqa simikuna nisqapi “Santo espíritu” nisqata.
^ Griego rimaypiqa “wasintan” ninmi.
^ Griego rimaypiqa “iskay leptonta churaykurqan, chayqa karqan juj cuadranten” ninmi. Qhaway “Astawan yachanapaq B14” nisqata.
