Hebreos 5:1-14
5 Runakuna ukhumanta nombrasqa uma sacerdotekunaqa runakunata Dios serviyninkupi yanapanankupaqmi churasqa kanku,+ chhaynapi ofrendakunata, juchankumanta sacrificiokunata ima Diosman jaywanankupaq.+
2 Jinaspapas uma sacerdoteqa mana yachaspa juchapakuqkunatapas khuyapayanmi paypas juchallikuq runa kasqanrayku.
3 Chaymantapas juchallikuq runa kasqanraykun pay kikinpas juchankunamanta ofrendakunata jaywanan imaynan llaqta runakunaq juchankunamantapas jaywan chhaynata.+
4 Ichaqa manan runaqa pay kikillanmantaqa atinmanchu uma sacerdote kaytaqa, aswanpas Diosmi chaypaqqa churanan, imaynan Aarontapas churarqan jinata.+
5 Chhaynan Cristowanpas karqan, payqa manan paychu uma sacerdote kananpaqqa churakurqan, arí, manan paychu jatunchakurqan;+ aswanpas Diosmi paytaqa jatuncharqan, chaymi nirqanpas: “Qanqa churiymi kanki, kunanmantan taytayki kapuni”,+ nispa.
6 Juj partepin nillantaq: “Qanmi Melquisedec jina sacerdote kanki, wiñaypaqmi sacerdote kanki”,+ nispa.
7 Cristo kay pachapi kashaspaqa wañuymanta librananpaq atiyniyoq Diosmantan rogakurqan mañakurqan ima; chaytaqa ruwarqan fuerteta wajakuspa, waqaspa imaraqmi;+ chhaynapin payqa uyarisqa karqan Diosta manchakuq kasqanrayku.
8 Diospa wawanña kashaspapas imaymanapi ñak’arisqanwanmi kasukuyta yacharqan.+
9 Chaywanmi payqa allin preparasqa karqan,+ chaymantataq encargasqa karqan llapa kasukuqninkunata wiñaypaq salvananpaq.+
10 Paytaqa Dios kikinpunin churarqan Melquisedec jina uma sacerdote kananpaq.+
11 Imaymanan paymantaqa ninayku kashan, ichaqa sasan qankunaman yachachiy sasa entiendeq kasqaykichisrayku.
12 Kunankamaqa ñachá yachachiqkunaña kashawaqchispas, ichaqa yachachiqkuna kanaykichismantaqa Diospa yachachikuyninkunamanta qallariy kaqkunata wajmanta yachachinamá kashankichis;+ cheqaqta, qankunaqa lechellawanraq kausaq wawakuna jinallaraqmi kashankichis, manaraqmi mijunata khamuqkuna jinaraqchu.
13 Pipas lechellawanraq kausaq wawa jina kaqqa manan Diospa chanin siminta yachanraqchu, wawallaraq kasqanrayku.+
14 Wiñasqa kaqkunan ichaqa khamuna mijunataña mijunku; paykunaq yuyayninkuqa allin preparasqan kashan allin kaqta mana allin kaqtapas reparanankupaq, yuyayninkuta allinta llank’achisqankurayku.
