Ezequiel 18:1-32
18 Jujmantan Jehová Diosqa rimapayamuwarqan, paymi niwarqan:
2 “Israel runakuna, ¿imaninantan nin: Taytan p’osqo uvasta mijun, wawanpa kiruntaq ras-ras nin, nispa nisqaykichis?+
3 ”Tukuy munayniyoq Señor Jehová Diosmi nin: Noqa wiñaypaq kausaq Diosmi nini: Manan Israelpiqa chhayna rimayqa kanqañachu.
4 Llapa kausaqpa vidanpas* noqaqmi, taytaq vidanpas churiq vidanpas* noqaqmi. Pipas juchallikuqqa* wañunqan.
5 ”Juj runas kanman chanin kausaq runa, chanintas, allintas imatapas ruwanman.
6 Manas payqa orqo patapi idoloman sacrificio jaywasqatapas mijunmanchu,+ manas Israelpi millakunapaq idolokunatapas qhawarillanmanpaschu, manas runamasinpa warminwanpas pantanmanchu+ nitaq killanpi kaq warmiwanpas kanmanchu;+
7 manas pitapas sufrichinmanchu,+ manumanta ima chaskisqantapas kaqtas kutichipunman;+ manas pimantapas imatapas suwakunmanchu,+ aswansi payqa yarqasqata mijuchinman,+ mana p’achayoqtapas p’achachinman;+
8 manuspapas manas wachaynintinta chaskiy yuyaywanchu ni imatapas ganay yuyaywanchu manunman,+ aswansi payqa chanillanta imatapas ruwanman;+ iskay runakunaq quejantapas chanillantas juzganman;+
9 payqa kamachisqayman jinas kausanman; llapa chaninchayniykunatapas tukuy sonqos junt’anman. Chhayna kausaq runaqa, ¿manachu chanin kanman? Chanin kasqanraykun payqa kausashallanqa,+ ninmi tukuy munayniyoq Señor Jehová Dios.
10 ”Ichaqa chay runaqsi kanman juj churin, suwa,+ runamasinta wañuchiq,*+ imaymana mana allinkunata ruwaq,
11 manaña taytan chaykunata ruwarqanchu chaypas. Chay churiqa orqo patapi idolokunaman jaywasqa sacrificiokunatas mijunman, runamasinpa warminwansi pantanman.
12 Wajchatapas ñak’arichinmansi,+ suwas kanman, manumanta ima jap’isqantapas manas kutichipunmanchu, millakunapaq idolokunatapas qhawashallanmansi,+ millay ruwaykunatas ruwanmanpas.+
13 Manuspapas wachaynintawansi cobranman,+ ganay yuyaywansi manunman. ¿Chhayna churiqa kausashallanmanchu? Manan, payqa wañunqan. Llapa mana allinkuna ruwasqanmantan wañunqa. Wañusqanmantaqa pay kikinmi juchayoq kanqa.
14 ”Kaysi kallanmantaq, juj churis rikunman taytanpa llapa mana allinkuna ruwasqanta, rikunña chaypas manas payqa taytan jinachu imatapas ruwanman.
15 Manas orqo patapi idoloman sacrificio jaywasqatapas mijunmanchu, manas Israelpi millakunapaq idolokunatapas ni qhawarillanmanpaschu, manas runamasinpa warminwanpas pantanmanchu.
16 Manas pitapas sufrichinmanchu, manas manumanta jap’isqanwanpas qhepakunmanchu, manas suwakunmanchu, aswansi payqa yarqasqata mijuchinman, mana p’achayoqtapas p’achachinman;
17 manas wajchatapas sufrichinmanchu, manuspapas manas wachaynintinta chaskiy yuyaywanchu ni imatapas ganay yuyaywanchu manunman, llapa chaninchayniykunatapas tukuy sonqos junt’anman, kamachisqayman jinas kausanman. ¿Chhayna runa wañunmanchu taytanpa juchanrayku? Manan. Aswanmi payqa kausashallanqa.
18 Taytanmi ichaqa runamasinta engañasqanrayku, wayqenta suwasqanrayku, llaqta ukhupi mana allinkunata ruwasqanrayku wañunqa. Juchanraykun payqa wañunqa.
19 ”Qankunan ninkichis: ¿Imanaqtintaq churiri mana taytanpa juchanmanta cuentata qonmanchu?, nispa. Churiqa chanin kasqanraykun, kamachikuyniykunatapas leykuna qosqaytapas kasukusqanraykun kausashallanqa.+
20 Pipas juchallikuqqa* wañunqan.+ Taytaqa manan churiq juchantaqa apanqachu, churipas manan taytaq juchantaqa apanqachu. Chanin runaq chanin ruwasqanqa payllapaqmi kanqa, mana allin ruwaqmantapas payllamantan cuentata mañakunqa.+
21 ”Mayqen mana allinkunata ruwaqpas juchanta saqespa mana allin ruwayninta saqespa, kamachisqaykunata kasukunqa, chanin kaqtataq ruwanqapas chayqa, kausashallanqan payqa. Manan wañunqachu.+
22 Manan ima mana allin ruwasqanpas yuyarisqañachu kanqa.+ Chaninta kausasqanraykun payqa kausashallanqa.+
23 ”¿Juchayoq runaq wañusqanwan kusikunaypaqchu piensankichis?+ Manapunin noqaqa juchayoqpa wañusqanwanqa kusikuymanchu; aswanmi noqaqa munani mana allin ruwayninta saqespa kausashanallanta,+ ninmi tukuy munayniyoq Señor Jehová Dios.
24 ”Chanin runachus chanin kausayninta saqespa mana allinkunata ruwanman, millayta kausaq runakuna jinachus kausanman chayqa, ¿kausashallanmanchu chay runa? Manan. Chanin ruwaykuna ruwasqanpas manan yuyarisqachu kanqa.+ Aswanmi payqa juchallikusqanrayku wañunqa.+
25 ”Qankunan ninkichis: Jehová Diospa ruwasqankunaqa manan chaninchu,+ nispa. Yau Israel runakuna, ama jinachu kaychis, kayta uyariwaychis, ¿noqaq ruwasqaykunachu mana chanin kashan?+ ¿Manachu aswanpas qankunaq ruwasqaykichis mana chaninqa kashan?+
26 ”Mayqen chanin runapas, chanin kausayninta saqespa mana allinkunata ruwan chayqa, wañunqan. Mana allinkuna ruwasqanraykun wañunqa.
27 ”Mana allinkunata ruwaqtaqchus, mana allin ruwayninkunata saqespa allin kaqkunata, chanin kaqkunata ruwayta qallarinqa chayqa, kausashallanqan payqa.+
28 Yuyayman kutispachus mana allin ruwaykunata, millay ruwaykunata saqepunqa chayqa, kausashallanqan payqa. Manan wañunqachu.
29 ”Israel runakunaqa ninqakun: Jehová Diospa ruwasqankunaqa manan chaninchu, nispa. Yau Israel runakuna, ¿noqaq ruwasqaykunachu mana chanin kashan?+ ¿Manachu aswanpas qankunaq ruwasqaykichis mana chaninqa kashan?
30 ”Chhaynaqa, yau Israel runakuna, noqaqa imachus ruwasqanman jinan sapankatapas juzgasaq,+ ninmi tukuy munayniyoq Señor Jehová Dios. Wijch’upuychis, saqepuychis llapa mana allin ruwasqaykichiskunata, chhaynapin mana juchaman urmankichischu, manataqmi castigasqachu kankichis.
31 Llapa mana allin ruwaykunata saqepuychis,+ sonqoykichista mosoqyachiychis, yuyayniykichista cambiaychis.+ Israel runakuna, ¿imaraykutaq qankunari wañuwaqchis?+
32 ”Manan noqataqa piqpa wañusqanpas kusichiwanchu.+ Chhaynaqa, noqaman kutimuychis, chhaynapin kausashallankichis,+ ninmi tukuy munayniyoq Señor Jehová Dios”, nispa.
Uraypi willakuykuna
^ Hebreo rimaypiqa “taytaq almanpas churiq almanpas” ninmi.
^ Hebreo rimaypiqa “Juchallikuq almaqa” ninmi.
^ Hebreo rimaypiqa “yawar jich’aq” ninmi.
^ Chaypiqa “Juchallikuq almaqa” nillanmantaqmi.
