Eclesiastés 1:1-18

  • Llapa imapas yanqa kasqanmanta (1-11)

    • Kay pachaqa wiñay-wiñaypaqmi kashallanqa (4)

    • Unuqa mana tukurikuspan muyushallan (5-7)

    • “Manan imapas mosoqqa kanchu” (9)

  • Runaq yachayninqa pisilla kasqanmanta (12-18)

    • Llapa imapas wayrata qatikachay jinan (14)

1  Kaykunan kashan yachachiqpa* siminkuna,+ payqa Davidpa churinmi, Jerusalenpi rey.+   Yachachiqmi nin: “¡Tukuy imapas yanqallan! ¡Tukuy imapas mana valeqmi! ¡Tukuy imapas yanqallapunin!”,+ nispa.   Maytaña llank’an chaypas, ¿ima allintataq runari tarin? Imayniraqtaña kay pachapi* llank’an chaypas, ¿iman paypaq kan?+   Ñaupa wiñay runakunan ripushanku, juj wiñay runakunataq nacemushanku,chaywanpas kay pachaqa kaqllan wiñay-wiñaypaq kashan.+   Intiqa lloqsimuspan mayninchus jaykunanta jaykupun,ratulla kutimuspataq mayninchus lloqsimunanta lloqsimullantaq.+   Wayraqa uray ladomanmi wayramun,muyurispataq wichay ladomanñataq wayran. Muyu-muyurispan wayrashallan, mana sayaspan muyushallan.   Mayukunaqa* lamar-qochamanmi chayan, lamar-qochan ichaqa mana junt’anchu.+ Mayukunaqa maymantachus lloqsimurqanku chaymanmi kutiyapunku jujmanta phawanankupaq.+   Tukuy iman runataqa sayk’uchin,mana rimariy atiyraqmi chaykunaqa. Ñawiqa manan sajsanchu imachus rikusqanwan,ninripas manan amikunchu imachus uyarisqanwan.   Imachus karqan chayllataqmi kanqa,imatachus ruwakurqan chayllatataqmi ruwakunqa. Kay pachapiqa manan imapas mosoqqa kanchu.+ 10  ¿Kanmanchu imapas “kayqa mosoqmi” ninapaq? Chayqa unaymantañan karqan,manaraq kashaqtinchismi karqanña. 11  Manan pipas yuyarinchu ñaupa tiempo runakunataqa,manan pipas yuyarinqachu qhepaman jamuq runakunatapas,paykunatapas manan yuyarinqachu aswan qhepaman jamuq runakunaqa.+ 12  Noqa yachachiqqa Israelpin rey karqani, Jerusalenmantan kamachikurqani.+ 13  Noqaqa tukuy atisqaytan kallpachakurqani* kay pachapi llapa imachus ruwakusqanta yachanaypaq,+ allin yachaywanmi chaykunata t’aqwirqani.+ Allintan t’aqwirqani runakunaman Diospa qosqan uma nanay llank’anakunata. Chaykunata ruwaspa kausanankupaqmi payqa chay llank’anakunata qorqan. 14  Kay pachapi llapa ima ruwakusqantan allinta qhawarirqani,chaypin kayta repararqani: Llapa imapas yanqan, wayrata qatikachay jinan.+ 15  Q’ewisqa kaqtaqa manan rectoyachiyta atikunmanchu,mana kaqtaqa manan yupayta atikunmanchu. 16  Sonqoypin nirqani: “Noqaqa allin yachayniyoqmi kapuni, Jerusalenpi noqamanta ñaupaqta kausaqkunamantapas astawanraqmi yachani;+ allin yachayniyoqmi kapuni, imaymanatan yachani”,+ nispay. 17  Tukuy atisqaytan kallpachakurqani* imachus yachayniyoq kay, loco jina kay,* mana yuyayniyoq kay chaykunata entiendenaypaq.+ Llapa chaykunapas wayrata qatikachay jinan kasqa. 18  Sinchi yachayniyoq kayqa uma nanaymi,astawan yachayta maskhaqqa aswan nanaypin tarikunqa.+

Uraypi willakuykuna

Hebreo rimaypiqa runa juñuqmanta, runata wajachiqmantan rimashan.
Hebreo rimaypiqa “intiq uranpi” ninmi. Chhayna rimayqa iskay chunka isqonniyoq kutitan Eclesiastés libropiqa rijurin.
Chaypiqa “Chiri tiempo mayukunaqa” otaq “Llapa yarqhakunaqa” nillanmantaqmi. Yarqhataqa “larqha, sanja” nillankutaqmi.
Hebreo rimaypiqa “sonqoytan churarqani” ninmi.
Hebreo rimaypiqa “Sonqoytan churarqani” ninmi.
Chaypiqa “mana ima yachayniyoq kay” nillanmantaqmi.