2 Timoteo 2:1-26
2 Chhaynaqa, wawáy+ Timoteo, qanqa kallpachakushallay Cristo Jesuspa rikuchisqan ancha sumaq sonqo kaywan,
2 imakunatachus noqamanta uyarirqanki chaykunawan ima; chaykunamantaqa askha runakunan “chhaynapunin” nirqankupas,+ chaykunata yachachiy junt’aq sonqo runakunaman, chhaynapin paykunapas allin preparasqa kanqaku jujkunata yachachinankupaq.
3 Cristo Jesuspa allin soldadontaq kanki chayqa,+ listo kashay imapipas ñak’arinaykipaq.+
4 Yachasqayki jinapas, manan pipas soldado kashaspaqa negocio ruwaykunaman jaykunmanchu, mana chayqa soldado kananpaq wajaqninchá mana allinpaq qhawarinman.
5 Carrera phawaypipas* manachus pipas reglamentoq nisqanman jina phawanman chayqa,+ manan chaskinmanchu premiotaqa.*
6 Tukuy kallpanwan chajrata llank’aqpas payraqmi ñaupaqtaqa chajraq rurunta mijunan.
7 Allinta piensay imatachus nishayki chaykunapi; Señormi tukuy imatapas entiendechisunki.
8 Yuyariy Jesucristoqa wañusqamanta kausarichisqa kasqanta+ Davidpa mirayninmanta kasqantapas,+ chay allin willakuykunatan noqaqa willashani,+
9 chayraykun ñak’arishanipas, chayraykutaqmi mana allinkunata ruwaq jinaraq carcelpipas wisq’asqa kashani.+ Diospa siminmi ichaqa mana watasqachu kashan.+
10 Chaymi ajllasqakunarayku tukuy imata aguantashani,+ chhaynapi paykunapas Cristo Jesuswan jujllachasqa kaspa salvasqa kanankupaq, wiñaypaq jatunchasqa kanankupaqwan.
11 Kay nisqayqa cheqaqpunin: Paywan kuskachus wañusun chayqa, paywan kuskallataqmi kausasun;+
12 tukuy imatapas aguantasun chayqa, paywan kuskan kamachikusun;+ payta negasun chayqa, paypas negawallasuntaqmi;+
13 manaña paypa nisqanta junt’asunmanchu chaypas, payqa junt’anqapunin imachus rimasqantaqa; payqa manapunin imatapas pay kikinpa contranpiqa ruwanmanchu.
14 Yuyarichishallay chaykunata paykunaman, Diospa ñaupanpi yachachishallay* ama ima yachachikuy jawapas* jap’inakushanankupaq, chay ruwayqa manan imapaqpas valenmanchu, aswanmi uyariqkunaq mana allinninpaq kanman.
15 Tukuy atisqaykita ruway Diospa allin qhawarisqan kanaykipaq, mana imamanta p’enqakuspa allin llank’aq kanaykipaq, Diospa simintapas allinta yachachinaykipaqwan.+
16 Ichaqa amapunin uyarinkichu Dios contra mana valeq yanqa rimaykunataqa,+ chaykunaqa Diosta mana respetaymanmi apan,
17 gangrena onqoy jinataqmi chay rimaykunaqa mast’arikunpas. Himeneowan Filetowanmi chay mast’ariqkunamanta wakin kashanku.+
18 Chay runakunaqa cheqaq yachachikuytan saqepunku “kausarimpuyqa ñan pasarunña” nispanku,+ chhaynapitaq wakintapas iñiyninkupi urmachipushanku.
19 Chhaynaña kaqtinpas Diospa cimentacionta churasqanqa mana kuyurispan qaqata sayashan, chay cimentacionpin sellasqa kashan: “Jehová* Diosqa reqsinmi paypa kaqkunataqa”,+ “pipas Jehová* Diospa sutinta wajakuqqa+ saqepuchun mana chanin ruwaykunata”, nisqa.
20 Yachasqayki jina, jatun wasipiqa manan qorimanta, qolqemanta serviciokunallachu kan, kallantaqmi k’ullumanta, t’urumanta serviciokunapas; wakinmi allin kaq ruwaykunapaq servin, wakintaq p’enqakunapaq jina ruwaykunapaq.
21 Pipas chay p’enqakunapaq jina ruwaykunapi utilizanapaq serviciokunamanta t’aqasqa kanqa chayqa, allin kaqkunata ruwanapaq servicio jinan kanqa; payqa ch’uyanchasqan kanqa, dueñonpaq allin servicio, tukuy allin kaqkunata ruwanapaq preparasqa servicio.
22 Chayrayku ayqekuy qanqa wayna-sipaskunaq munapayayninmanta, aswanpas ch’uya sonqowan Señorta wajakuqkunawan kuska kallpachakuy chanin kanaykipaq, allin iñiq kanaykipaq, munakuq kanaykipaq, thaj kausaq kanaykipaqwan.
23 Chaymantapas, t’aqakuy mana valeq yanqa discutiykunamanta;+ yachasqayki jinapas, chaykunaqa maqanakuykunallatan jatarichin.
24 Señorpa kamachinqa manan imaraykupas maqanakunanchu, aswanmi payqa llapa runakunapaq llamp’u sonqo kanan;+ chaymantapas allin preparasqan kanan yachachinanpaq, imataña ruwaqtinkupas manan kutipakunanchu,+
25 mana kasukuqkunatapas sumaq sonqowanmi yachachinan.+ Yaqapas Diosqa chay mana kasukuqkunata yanapanman juchankumanta pesapakunankupaq, chaymanta cheqaq kaqta allinta reqsinankupaq,+
26 chhaynapi Saqraq jap’isqan kashasqankuta reparanankupaq,+ jinaspa yuyayninkuman kutispa chay Saqraq trampanmanta ayqenankupaq.
Uraypi willakuykuna
^ Griego rimaypiqa “Pujllaykunapipas” ninmi, chaypiqa imaymana clase deporte ruwaymantan rimashan.
^ Griego rimaypiqa “coronataqa” ninmi.
^ Chaypiqa “allinta entiendechishallay” nillanmantaqmi.
^ Griego rimaypiqa “ama ima rimay jawapas” ninmi.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
