1 Corintios 16:1-24
16 Kunanqa iñiqmasikunata* yanapanapaq qolqe juñuymanta qelqamusaykichis:+ Chaytaqa, imaynan Galacia provinciapi iñiq t’aqakunata kamachimurqani chhaynata ruwaychis.
2 Sapa semana qallariy p’unchaypi* sapankaykichis qolqeykichista t’aqaychis kapuqniykichisman jina, jinaspa chayta waqaychaychis, chhaynapi chayamuqtiy ama qolqeta juñushanaykichispaq.
3 Chayamuspayñan sumaq sonqowan qosqaykichis yanapaykunata Jerusalenman apachisaq, pikunatachus cartaykichispi confianza runakunapaq churamunkichis paykunawan.+
4 Ichaqa noqapas rinay kaqtinqa, noqawan kuska risaqku.
5 Qankunamanqa jamusaq Macedonia provincianta pasamuspayñan; chaynintan jamusaq.+
6 Chayamuspayqa yaqapaschá juj tiempo qankunawan qheparikusaq, chhayna kaqtinqa chiri tiempo pasanankamapaschá kasaq, chhaynapi maychus rinayman juj chhikanta riysiwanaykichispaq.
7 Manan munaymanchu pasaq jinalla qankunawan tupaytaqa, aswanpas Jehová* Dios munaqtinqa juj tiempo qankunawan qheparikuytan munayman.+
8 Ichaqa Pentecostés Fiestakaman kay Éfeso llaqtapi qhepakusaq.+
9 Kunanqa kusapunin kashan* Diospaq llank’anaypaq,+ ichaqa askhan jark’akuqkunapas kashan.
10 Timoteo+ chayamunqa chayqa, imakunatachus nisunkichis chayta ruwankichis, chhaynapi ama manchakuspalla qankunawan kananpaq; paypas noqa jinan Jehová* Diospa llank’ananpi llank’ashan.+
11 Chayrayku, aman pipas paytaqa pisichanqachu. Kutimuqtinpas sumaqllatan paytaqa kachampunkichis, chhaynapi allillan noqaman chayamunanpaq; iñiqmasikunawan kuskan noqaqa payta suyashani.
12 Iñiqmasinchis Apolostapas+ maytan valekuni juj iñiqmasikunawan kuska qankunata watukuq jamunanpaq, ichaqa manan kunanqa jamuyta munanraqchu, yaqachá qhepakunaman jamushanqa.
13 Rijch’asqalla kashaychis,+ iñiyniykichispi qaqata sayaychis,+ ama manchakuq kaychis,*+ allinta kallpachakuychis.+
14 Tukuy imatapas munakuywan ruwaychis.+
15 Wayqeykuna,* yachasqaykichis jina, Acaya provinciapiqa Estefanaswan wasinpi kaqkunawan iman ñaupaq iñiqkunaqa* karqanku, tukuy sonqotaqmi iñiqmasinchiskunatapas* servishanku. Chaymi kallpachaykichis:
16 Kasukushallaychispuni chhayna iñiqmasikunataqa, llapallan allin llank’aq iñiqmasikunatapas.+
17 Ichaqa maytan kusikuni Estéfanas,+ Fortunato, Ajaico ima jamusqankumanta, paykunan kusata yanapawanku qankunaq rantiykichispi.
18 Paykunan sonqoyta* “thaj” niykachinku jinallataq qankunaq sonqoykichistapas. Chayrayku respetaychis chhayna runakunataqa.
19 Asia provinciapi iñiq t’aqakunan napaykuyta apachimusunkichis. Señorpi iñiqmasinchiskuna Áquila, Prisca,* jinallataq wasinpi juñukuq iñiq t’aqapas+ tukuy sonqon napaykamusunkichis.
20 Lliu iñiqmasikunan napaykamusunkichis. Jujkuna-jujkunawan ch’uya much’aywan napaykunakuychis.
21 Noqa Pablopas napaykamuykichismi, kay napaykuyniytaqa noqa kikiypunin qelqamushani.
22 Pipas Señorta mana munakuqqa ñakasqa kachun. ¡Señornillayku, jamuy!
23 Señor Jesuspa ancha sumaq sonqo kaynin qankunawan kachun.
24 Qankuna Cristo Jesuswan jujllachasqa kaqkunawan munakuyniy kachun.
Uraypi willakuykuna
^ Griego rimaypiqa “ch’uya kaqkunata” ninmi.
^ Chayqa karqan domingo p’unchaymi, judío runakunapaqqa chaymi karqan semana qallariy p’unchay.
^ Qhaway “Astawan yachanapaq A5” nisqata.
^ Griego rimaypiqa “juj jatun punkun kicharikuwan” ninmi.
^ Qhaway “Astawan yachanapaq A5” nisqata.
^ Chaypiqa “qhari jina puriychis” nillanmantaqmi.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Griego rimaypiqa “ñaupaq rurukunaqa” ninmi.
^ Griego rimaypiqa “ch’uya kaqkunatapas” ninmi.
^ Paytaqa “Priscila” nikullantaqmi.
