Jehovahuaj testigoguna caran semana ishqui cuti Reinomanda Yachana Huasiuna nishcai tandarinun. ¿Chibi imara ruranun? ¿Chi tandarinama rina imasnara canda yanapana ushan?

•  ¿Shu Reinomanda Yachana Huasii imara ruranun?

•  ¿Imarasha cai tandarinaunama rina valishca an?

•  Imara iyanun shuj maltauna

 Reinomanda Yachana Huasii tandarinauna valirinchi Bibliamanda valishca yachachishcaunara yachangaj. Chi tandarinaunai canda yanapanga:

•   Diosmanda sirtu yachachinara yachangaj.

•   Cuna punzhaunai imarasha turmindusguna tian intindingaj.

•   Mas ali runa tucungaj.

•   Sirtu amigogunara tupangaj.

 ¿Yachanguichu? Jehovahuaj testigoguna paiguna tandaringaj puistuunara Reinomanda Yachana Huasi ninun, chi tandarinaunai Diospa Reinomanda ashca yachashcaraigu (Mateo 6:9, 10; 24:14; Lucas 4:43).

 Chibi yachachishcauna canda yanapana ushan. Jehovahuaj testigoguna tandarinaunai yachachishca Bibliamanda iyaiguna canda yanapana ushan sabiru tucungaj (Proverbios 4:5). Chita nisha nin Biblia canda yanapana ushan ali decisiongunara apingaj. Shinallara cutipan cai valishca tapuigunara:

•   ¿Imangaj causanchi?

•   ¿Turmindusguna Diosmanda shamunun?

•   ¿Huañushca huasha causasha catinchi?

 Semana tucurishcai tandarinaunai cai maican temagunamanda yachachinun:

•   ¿Imarasha ñucanchi causaibi Biblia yanapachu saquina anchi?

•   ¿Llaquirishca sintirishcai pita ñucanchira yanapana ushan?

•   ¿Diospa Reino imara ruraun ñucanchira yanapangaj?

 Brenda nin: “Shu colegiomanda compañero tandarinama shamuca. Ñucahua, ñuca ailluhua tiarica, tandarinai Bibliara shu librogunaras ricuchicanchi. Tandarishca huasha rimahuaca tapunushcai cutipashcauna uyashcara ashcara gustacami. Shinallara rimahuaca paihua iglesiai ñucanchi Bibliamanda intindingaj charishca publicacionguna mana charishcara”.

 ¿Yachanguichu? Reinomanda Yachana Huasii icungaj gratis an, cullquira mana mañanunzhu.

 Chi tandarinaunai can ricsingaraushca runauna canda animachinunga. Biblia nin Jesusta catijcuna tandarinchi parijumanda animaringaj (Hebreos 10:24, 25). Cai milli mundui runauna paiguna ministishcaunallai iyarisha causanun. Chimanda Diosta casungaj, shujcunara yanapangaj munajcunahua timpura pasasha ashcara cushiyachin.

 Elisa nin: “Shu punzha tucurishca huasha llaqui, sambayashca sintirini, shinajpi tucui huras tandarinama rijcuna cushi sintiringaj yanapahuanun. Tandarishca huasha cushimi huasima tigrani, ursara apini cayandi punzhai ñaupajma catingaj”.

 ¿Yachanguichu? 120.000 yali Jehovahuaj testigogunamanda congregacionguna tian, shinallara 60.000 yali tandarina puistuuna tian. Caran huatai 1.500 Reinomanda Yachana Huasiunara shayachinun ñucanchi tandarinaunama caran cuti mas runauna tandarishcamanda.  a