Cada huatami achca millón gentecunaca drogarina viciopi urmashcamanta, drogahuan chagrushca jambicunata yallimana ubyashcamanta huañushcacuna. COVID-19 pandemiapica drogarina vicioca mirarishpami caticushca. Pero achcacunaca Bibliata estudiashpami drogarina viciota saquishcacuna. Canpish Bibliata estudiashpaca drogarina viciotaca saqui tucunguimi. a

Caitami yachashun

•  Mana alli viciota saquingapajca, ¿imamantataj Bibliata estudiana cangui?

•  Mana alli viciota saquingapaj Bibliapi tiyaj chuscu yuyaicuna

•  Mana alli viciocunata saquichunca caipi tiyaj versocunami ayudai tucun

•  Bibliata yachashcamanta mana alli viciocunata saquishcacunapaj shujtaj experienciacuna

•  ¿Bibliaca mana alli viciocunata saquingapaj tratamientocunataca jarcanchu?

•  ¿Bibliaca drogacunahuan chagrushca tratamientocunata churarichun jarcanchu?

 Cientificocunaca sololla sintirijcuna, tucuimanta preocuparijcuna, yallitaj llaquilla cajcunami mana alli viciocunapi urmashcacuna nincunami. Pero Bibliapi tiyaj consejocunami sinchi feta charichun ayudai tucun. Sinchi feta charishpami tucui cai laya llaquicunata mishai pudingui. Shinallataj Bibliaca Dioshuan alli apanacungapaj imata rurana cashcatami yachachin (Salmo 25:14). Cambaj viciocunata saquina sinchi ricurijpipish Bibliata estudiashpami caicunata mishai tucungui (Marcos 11:22-24).

1.  1. Jehová Diosta rijsi b (Juan 17:3). Jehová Diosca tucuita ruraj Diosmi can. Paimi tucui poderta charin. Shinallataj ñucanchijta cꞌuyaj Yayami can. Paimi paihuan alli apanacuchun munan. Canta ayudangapajpish listomi can (Isaías 40:29-31; Santiago 4:8). Diospaj ayudata chasquijpica paimi maravilla causaita cunga (Jeremías 29:11; Juan 3:16).

2.  2. Canta ayudachun Jehová Diosta mañai. Drogarina viciota saquingapajca Jehová Diosta mañai. Paimi paipaj ñaupajpi alli ricurishpa limpio cachun ayudanga (Romanos 12:1). Paipaj espíritu santohuanmi ñucanchij imata mana rurai tucushcataca rurai tucushun (2 Corintios 4:7; Lucas 11:13). Cai podermi drogarina viciota saquichun, Dios munashca shina mushuj causaita charichunpish ayudanga (Colosenses 3:9, 10).

3.  3. Dios ima shina yuyaj cashcata yachai (Isaías 55:9). Jehová Diosmi ‘cambaj shunguta, cambaj yuyaitapish mushujyachichun’ ayudanga. Chashnami mana alli viciocunata saqui tucungui (Efesios 4:23). Diospaj yuyaicunataca Bibliapimi tarinchij. Chaimantami cada punlla Bibliata liyina cangui (Salmo 1:1-3). Shujtajcuna ayudajpimi achcacunaca Biblia ima nishcata intindishcacuna (Hechos 8:30, 31). Testigo de Jehovacunami Bibliamanta gratis yachachinchij. Ñucanchij tandanacuicunamanpish shamuchunmi invitanchij. Chaipimi Biblia ima nishcatapish yachangui. Shinallataj Bibliapi yachachishcacunata cambaj causaipi ima shina pajtachinatami yachangui.

4.  4. Alli amigocunata agllai. Cambaj amigocunaca mana alli viciota saquichun o mana alli viciota charishpa catichunmi ayudai tucun (Proverbios 13:20). Diosta alli sirvij amigocunahuan tandanacushpaca alli amigocunatami tari tucungui. Diosca chai laya amigocuna ñucanchijta ayudai tucushcataca allimi yachan. Chaimantami paicunahuan apanacuchun munan (Salmo 119:63; Romanos 1:12). Por ejemplo, Internetpi o televisionpi tiyaj programacunata ricushpa o imata liyishpaca achca cuidadotami charina canchij. ¿Imamanta? Chai programacunata ricushpaca chaipi ricurij gentecunahuan tiempota pasacuj shinami cashun. Chaimanta imapi divirtirisha nishpaca allimi agllana cangui. Mana alli agllajpica chai viciocunata saquinaca sinchimi tucunga. Mana alli viciocunapi urmachij cosascunamantapish caruyanami cangui (Salmo 101:3; Amós 5:14).

 Filipenses 4:13-pica: “Dios poderta cujpimi, ñucaca tucuita rurangapaj fuerzata charini” ninmi.

 Italiamanta Patriciaca: “Ñuca fuerzallamanta drogarina viciota mana saqui tucushcataca allimi yacharcani. Chaimantami cai viciota saquingapaj Yaya Diosta fuerzata cuchun mañarcani. Paica ayudarcami” ninmi.

 Joseph Ehrenbogen runaca llaquichij gentecunapaj chaupipimi huiñarca. Chaimantami tragota ubyana, fumana, drogarina viciopi urmarca. Huaquinpicarin yallitaj drogarishcamantami casi huañurca. Pero Bibliapi shuj versota liyishpaca paipaj causai cambiai tucushcatami cuentata curca. Paimanta ashtahuan yachangapajca “Aprendí a respetar a las mujeres y a respetar mi vida” nishca temata ricui.

 Dmitry Korshunov runaca cutin cutinmi tragota ubyanata saquisha nirca. ¿Chai viciota saquingapajca imatataj rurarca? Caita yachangapajca “Mapa causaita saquircanimi” nishca videota ricui.

 Mana. Mateo 9:12-pica: “Sano gentecunaca jambijtaca mana minishtincunachu. Ungushcacunami jambijtaca minishtincuna” ninmi. Estados Unidospi saquirij Instituto Nacional sobre el Abuso de Drogas nishca organizacionca: “Drogarinaca shuj ungüimi can. Huaquincunaca chai viciota saquisha nishpapish mana saqui tucushcacunachu” ninmi. Paicunaca Diospaj fuerzastami minishtishcacuna. Diospaj fuerzaca runacunapaj fuerzata yallimi can. Shinapish achcacunaca Bibliapi tiyaj consejocunata cazushpapish shuj tratamientota catinatami minishtishcacuna. c Por ejemplo, Allen shuti runaca trago ubyana viciota saquisha nishpaca: “Ñuca cuerpopica achca nanaitami sintircani. Chaimi Diospaj ayudata chasquishpapish shuj tratamientota catina cashcata cuentata curcani” ninmi.

 Mana. Por ejemplo, Bibliapica maijan ungushca cashpaca huaquin ungüicunamantaca tragota o vinotaca ubyanallami ninmi. Shinallataj huañugrij gentecuna ama tanto nanaita sintichunpish vinota o tragotaca cui tucunguichijmi ninmi (Proverbios 31:6; 1 Timoteo 5:23). Pero yallitaj tragota ubyajcuna o nanaita pasachingapaj drogacunahuan chagrushca jambicunata yallitaj ubyajcunaca shuj viciopimi urmai tucun. Chaimantami manaraj chai jambicunata ubyashpaca chai jambicuna qꞌuipata mana llaquichi tucushcata yachanaraj cangui (Proverbios 22:3).