Efesios 4:1-32
-
Cristopaj cuerpopi shuj shinalla canamanta (1-16)
-
Runacunata shuj regalota shina cachashcamanta (8)
-
-
Mauca causaimanta, mushuj causaimantapish (17-32)
4 Ñucaca Amito Jesusta catij cashcamantami carcelpi cani. Cancunataca Dios imapaj cayashca shinallataj causashpa catichunmi rogapani.
2 Chaimanta humildecuna cashcata, manso shungucuna cashcata siempre ricuchichij. Shinallataj pacienciata charichij, cꞌuyaihuan caishuj chaishuj ahuantanacuichij.
3 Cancunataca espíritu santomi shuj shinallata rurarca. Chaimanta caishujhuan chaishujhuan tandalla cangapaj, sumajta causangapaj esforzarichij.
4 Shujlla cuerpo, shujlla espiritumi tiyan. Shinallataj shujlla esperanzami tiyan. Chaita chasquichunmi Diosca cancunata cayashca.
5 Shinallataj shujlla Amito, shujlla fe, shujlla bautismomi tiyan.
6 Shinallataj shujlla Diosmi tiyan. Paica tucuicunapaj Yayami. Paimi tucuicunata mandan. Tucuicunallatatajmi imatapish rurachin. Paipaj poderca tucuicunapaj jahuapimi.
7 Chashnami Diosca pai llaquij cashcataca cada unoman ricuchishca. Cristomi chaitaca shuj regalota shina cada unoman chaupishpa cushca.
8 Dios quillcachishcapica: “Paica jahuaman huichiyashpaca prezupi cajcunatami cacharichirca. Chai qꞌuipami cai runacunataca shuj regalota shina cacharca” ninmi.
9 Shinapish paica jahuamanmi “huichiyarca” nishca shimicunaca, ¿imatataj nisha nin? ¿Manachu caica ñaupaman cai allpaman pai uriyamushcata nisha nin?
10 Cai allpaman uriyamujllatajmi tucui pajtarichun jahua pachacunamantapish ashtahuan jahuaman huichiyarca.
11 Maijancunataca apostolcuna cachun, maijancunataca profetacuna cachun, maijancunataca huillajcuna* cachun, maijancunataca michijcuna shina cachun, yachachijcuna cachunmi agllarca.
12 Paicunataca jucha illajcunata alli ñanpi purishpa catichun ayudachun,* shujtajcunata sirvichun, congregaciontapish sinchiyachichunmi agllarca. Cai congregacionca Cristopaj cuerpo shinami can.
13 Paicunaca crishcapi shuj shinalla cangapaj, Diospaj Churitapish alli rijsingapajmi ñucanchijta ayudangacuna. Chashna ayudajpimi Cristo shinallataj allita rurajcuna tucushpa alli yuyaiyuj jatun runacuna tucushun.
14 Chaimanta uchilla huahuacuna shina canata saquishunchij. Maijancunaca llullacunata yachachishpami shujtajcunata pandachincuna. Cashna llulla yachachishcacunata catijcunaca shuj barcota yacupish, huairapish caiman chaiman cuyuchishca shinami can.
15 Shinapish ñucanchijca mana llullashpami parlana canchij, cꞌuyaitapishmi ricuchina canchij. Shinallataj tucuipi Cristo shina cangapaj huiñashpa catishunchij. Paica ñucanchij umami.
16 Cristomantami cuerpopaj tucui partecunaca tandalla cancuna. Aicha mucucuna paicunapura ayudarinacujpimi cuerpopaj tucui partecunaca imata rurana cashcata alli rurancuna. Chaimantami cuerpoca alli huiñashpa cꞌuyaipi sinchiyashpa catin.
17 Chaimantami cancunataca Amito Jesuspaj shutipi cai pacha gentecuna shinaca ama causashpa catichijchu nishpa rogapani. Paicunaca paicunapaj yanga yuyashcacunallahuanmi causancuna.
18 Paicunapaj yuyaicunaca amsapimi. Diosmanta mana yachasha nishcamanta, rumi shungucuna cashcamantami Dios cusha nishca causaitapish mana chasquincuna.
19 Paicunapaj concienciapica ña imata mana sintincunachu. Chaimantami millai ruraicunataca mana pingashpa rurancuna,* mapa ruraicunata rurashpa catinatapish yallitaj munancuna.
20 Ashtahuanpish cancunaca Cristo mana chashna cashcatami yacharcanguichij.
21 Jesusca ima llullataca mana yachachircachu. Cancunaca paimantami uyarcanguichij. Paimi cancunataca yachachirca. Chaimantami caicunataca alli yachanguichij.
22 Cancunaca ñaupa ima shina causacushca mauca causaita saquina cashcatami yacharcanguichij. Chai ñaupa causaimi cancunataca cai mana alli munaicunahuan punllanta pandachicun.
23 Cancunapaj yuyaitaca punllantami mushujyachishpa catina canguichij.
24 Cunanca mushuj churanata churarij shina mushuj causaita causaichij. Cai mushuj causaica Dios munashca shina causanami, cashcata ruraj canami, imatapish tucui shunguhuan mana llullashpa pajtachinami.
25 Cunanca tucui laya llullacunatami saquishcanguichij. Chaimanta cada uno caishujhuan chaishujhuan ama llullanacuichijchu. Tucuicunami chai cuerpopajllataj partecuna canchij.
26 Pꞌiñarishca cashpaca ama ima juchata ruraichijchu. Inti huashicungacamaca ama pꞌiñarishcalla catichijchu.
27 Diablo millaita rurachichunpish ama saquichijchu.*
28 Shuhuajpish ama ashtahuan shuhuashpa catichun. Ashtahuanpish quiquin maquihuan allita rurashpa sinchita trabajachun. Chashnami minishticujcunaman imallatapish cungapaj charinga.
29 Cancunapaj shimimantaca mapa llaquichij rimaicunaca ama llujshichun. Ashtahuanpish cancunata uyajcunata sinchiyachingapaj alli shimicunallata parlaichij.
30 Shinallataj Diospaj espíritu santotapish ama llaquichicuichijchu. Cancunataca randishpa cacharichina punllapajmi chai espirituhuan Diosca sellarca.
31 Yallitaj resintirinata, yallitaj pꞌiñarinata, coleranata, caparinata, llaquichij shimicunata rimanata, tucui mana allitapish saquichij.
32 Diosca Cristomantami cancunataca shungumanta perdonarca. Chashnallataj shungumanta cancunapish perdonanacuichij. Ashtahuanpish caishuj chaishujhuan alli caichij. Shinallataj cꞌuyajcuna cashcata, llaquijcuna cashcatapish ricuchichij.
Notacuna
^ O “alli huillaicunata huillajcuna”.
^ O “yachachichun”.
^ Griego rimaipica: “asélgueia” ninmi. “Millai pinganayai ruraicuna” shimita huasha diccionariopi ricui.
^ O “Diabloman lugarta ama cuichijchu”.
