Romanos 12:1-21
-
“Cancunapaj cuerpotaca causaj sacrificiota shina Diosman cuichij” (1, 2)
-
Chꞌican chꞌican ruraicunamanta, shujlla cuerpo cashcamantapish (3-8)
-
Jesusta catijcunapaj consejocuna (9-21)
12 Huauquicuna, cancunamanmi Diosca llaquij cashcata ricuchishca. Chaimanta cancunapaj cuerpotaca causaj sacrificiota shina Diosman cuchunmi rogapani. Chai sacrificioca Dios chasquinalla, jucha illaj cachun. Chashnami paitaca tucui yuyaihuan sirvinguichij.
2 Cai pacha* gentecunapaj ruraicunataca ama rurashpa catichijchu. Chaipaj randica cancunapaj yuyaita cambiaichij. Chashnami cancunallataj Diospaj munai alli cashcata, chasquinalla cashcata, jucha illaj cashcata yachanguichij.
3 Dios yallitaj llaquij* cashcata ñucaman ricuchishcamantami tucui cancunataca cashna nini. Cancunallataj ashtahuan alli cashcataca ama yuyaichijchu. Chaipaj randica Dios cancunaman crina yuyaita cushca shina alli yuyaihuan ima cashcallata yuyaichij.
4 Shuj cuerpoca chꞌican chꞌican partecunatami charin. Shinapish mana tucui partecunachu chaillatataj ruran.
5 Chashnallatajmi ñucanchijpish achcacuna cashpapish Jesushuan tandalla cashcamantaca shujlla cuerpo canchij. Shinapish cuerpomanta shuj partella cashcamantami ñucanchijca caishuj chaishuj minishtinacunchij.
6 Diosca yallitaj llaquij cashcamantami ñucanchijtaca chꞌican chꞌican ruraicunata rurangapaj ayudashca. Dios nishcacunata huillangapaj poderta chasquishca cashpaca crina yuyaita cushca shinallataj huillashunchij.
7 Shujtajcunata ayudangapaj poderta chasquishca cashpaca ayudashunchij. Yachachingapaj poderta chasquishca cashpaca yachachishunchij.
8 Shujtajcunata animaj* cashpaca animashunchij.* Shujtajcunaman cuj cashpaca mana mitsashpa cushunchij. Maijanpish congregacionpi pushaj cashpaca alli pushachun. Shujtajcunata llaquij cashpaca shungumanta llaquij cachun.
9 Ama nij tucushpalla tucui shunguhuan cꞌuyanacuichij. Millaitaca pꞌiñaichij. Allita rurangapaj esforzarichij.
10 Familia ucupi shina cꞌuyanacuichij. Quiquin huauquindij shina caishuj chaishuj cꞌuyaita ricuchinacuichij. Cancunaraj shujtajcunata respetashcata ricuchichij.
11 Sinchita trabajaichij, ama qꞌuillacuna caichijchu. Espíritu santo cancunata sinchiyachichun. Jehová* Diosta sirvijcuna caichij.
12 Shamuj punllacunapi japina cashcamanta cushicuichij. Llaquicunata charishpapish ahuantaichij. Diosta mañanataca amataj saquichijchu.
13 Jucha illajcuna imata minishtijpica paicuna minishtishcata cuichij. Shujtajcunata cꞌuyaihuan chasquishpa catichij.
14 Cancunata catirashpa llaquichijcunata Dios bendiciachun mañaichij. Gentecunata mana allita nishpa rimanapaj randica Dios bendiciachun mañaichij.
15 Cushicujcunahuanca cushicuichij. Huacajcunahuanca huacaichij.
16 Cancunamanta sustarishca shinallataj shujtajcunamantapish sustarichij. Jatun canataca ama mashcaichijchu. Ashtahuanpish humildecuna caichij. Alli yachajcuna cashcata cancunallataj ama yuyaichijchu.
17 Cancunata mana allita rurajpica ama chashnallataj mana allita rurashpa tigrachinguichijchu. Ashtahuanpish tucui gentecunapaj ñaupajpi allita rurana yuyailla caichij.
18 Tucuicunahuan sumajta causangapaj imata rurai tucushpaca chaita rurashpa catichij.
19 Cꞌuyashca huauquicuna, shujtajcuna llaquichijpica ama chashnallataj llaquichichijchu. Ashtahuanpish Dios paicunahuan pꞌiñarishca cashcata ricuchichun saquichijlla. Quillcachishcapica Jehová* Diosca: “Ñucami llaquichisha, ñucami paicuna japina cashcataca cusha” ninmi.
20 Ashtahuanpish “canta pꞌiñaj yaricaihuan cajpica paiman carailla. Yacunaihuan cajpipish ubyachun imallatapish cuilla. Chashna rurashpami paipaj uma jahuapi rupacuj carbonta churacuj shina rurangui”.*
21 Mana alli ruraicuna mishachunca ama saquichu. Ashtahuanpish mana alli ruraicunataca alli ruraicunahuan mishashpa catilla.
Notacuna
^ Griego rimaipica: “aión” ninmi. “Cai pacha” shimita huasha diccionariopi ricui.
^ “Yallitaj llaquij” shimita huasha diccionariopi ricui.
^ O “cunaj”.
^ O “cunashunchij”.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Ima shinami rupacuj carbonca fierrota yacuyachin. Chashnallatajmi alli ruraicunaca runapaj shungumanta pꞌiñarishcata anchuchin.
