Ñaupa israelitacunaca diezmota cushpami Diosta sirvinata apoyajcuna carca. a Jehová Diosca paicunataca: ‘Cancunapaj allpapi pꞌucushca granocunataca, huatantami chungamanta shujta cuna cashcataca cunataj canguichij’ nircami (Deuteronomio 14:22).

 Jehová Diosca Moisesman cushca leypimi israelitacuna diezmota cuchun mandarca. Shinapish cunan punlla Diosta sirvijcunaca mana Moisesman cushca ley ucupi causacunchijchu. Chaimantami diezmota cungapajca mana obligado canchij (Colosenses 2:13, 14, La Biblia. Traducción del Nuevo Mundo, NWT). Cunan punllacunapi Diosta sirvijcunaca 2 Corintios 9:7-pi nishcatami pajtachinchij. Chaipica: “Quiquin shungupi yuyarishca shina cuichij. Ama llaquirishpa, ama cuichij nishcallamanta cuichijchu. Cushicushpa cujtamari, Diosca cꞌuyan” ninmi.

•  ¿Ñaupa Testamentopica diezmota cunamantaca imatataj nin?

•  ¿Mushuj Testamentopica diezmota cunamantaca imatataj nin?

 Ñaupa Testamentopica Moisesman leyta cushca huashamantami achca cutincuna diezmomantaca parlan. Shinallataj manaraj Moisesman chai leyta cujpimi ishqui cutin diezmomantaca ña parlarca.

Moisesman manaraj leyta cujpimi Bibliapica diezmomantaca ña parlacun

 Bibliapica Abrahammi punta cutin diezmota cushcata ricuchin (Génesis 14:18-20; Hebreos 7:4). Abrahamca Salem llajtata Mandaj curamanmi shuj cutinlla diezmota convidashcanga. Cutinhuan Abraham, o paipaj huahuacuna, chashna rurashcataca Bibliapica mana ninchu.

 Bibliapica Abrahampaj nieto Jacobpish diezmota cushcatami ricuchin. Jacobca: ‘Jehová Dios ñucata cuidashpa bendiciajpica tucui ñuca charishcacunamantaca décima partetami cusha’ nircami (Génesis 28:20-22). Bibliamanta achcata yachajcunaca: “Jacobca animalcunata huañuchishpa Diosman cushpami pai nishcata pajtachishca yuyachin” nincunami. Shinapish Jacobca paipaj familiacuna diezmota cuchunca mana obligarcachu.

Moisesman cushca leyta cazushpami diezmota cuna carca

 Jehová Diosca ñaupa israelitacunamanca diezmota cuchunmi mandarca. Chaita pajtachishpami Diosta sirvinata apoyajcuna carca.

•   Tucui punlla Diospaj huasipi trabajaj levitacunaman, sacerdotecunamanmi diezmotaca cujcuna carca. Paicunaca trabajangapajca dueño allpata mana charircachu. Chaimantami diezmota chasquircacuna (Números 18:20, 21). Levitacunaca israelitacuna cushca diezmotami chasquircacuna. Chai japishcacunallamantatajmi paicunapish tigra sacerdotecunaman décima parteta cujcuna carca (Números 18:26-29).

•   Huatapica israelitacunaca ishqui cutinmi diezmota cujcuna cashca yuyachin. Qꞌuipa diezmoca huatapi tiyaj fiestacunapajmi carca (Deuteronomio 14:22, 23). Pero huaquin huatacunapica qꞌuipa tandashca diezmotaca levitacunaman, pobrella gentecunamanmi cujcuna carca (Deuteronomio 14:28, 29; 26:12).

 ¿Mashna cuna cashcataca ima shinataj ricujcuna carca? Israelitacunaca huatapi pꞌucushca granocunamantami décima parteta cuna carca (Levítico 27:30). Pero granocunata, frutacunata cunapaj randi cullquita cusha nishpaca, chai cꞌatushca cullqui jahuapimi ashtahuan churashpa cuna carca (Levítico 27:31). Shinallataj animalcunamantapishmi diezmota cujcuna carca (Levítico 27:32).

 Israelitacunaca chunga animalcunamanta último huacharishca animaltami Diosman cuna carca. Leypi nishca shinaca Diosman cushca animalcunataca mana cambianachu carca, ima laya cajpipish cunallami carca. Shinallataj Diosman cushca animalcunata cꞌatushpa cullquitaca mana japinachu carca (Levítico 27:32, 33). Shinapish qꞌuipa diezmota cungapajca animalcunata cꞌatushpa cullquita japi tucurcacunami. Chashnami israelitacunaca achcata viajashpa fiestacunaman chayajcuna carca (Deuteronomio 14:25, 26).

 ¿Israelitacunaca ima horallataj diezmota cujcuna carca? Israelitacunaca cada huatami diezmotaca cuna carca (Deuteronomio 14:22). Shinapish canchis huataca allpa samarina huatami carca. Chai huatapica israelitacunaca mana imata tarpujcunachu carca (Levítico 25:4, 5). Chaimantami chai huatapi diezmotaca mana cuna carca. Cutin cada quimsa y sujta huatapimi israelitacunaca qꞌuipa diezmotaca levitacunaman, pobrella gentecunamanpish cujcuna carca (Deuteronomio 14:28, 29).

 ¿Diezmota mana cushpaca ima castigota charinachu carca? Moisespaj leypica mana diezmota cushpa castigota charinataca mana nircachu. Israelitacunapajca diezmota cunaca allimi carca. Mana obligacionmantallachu diezmota cujcuna carca. Shinapish diezmota cushcata Diospaj ñaupajpi huillashpami paipaj bendiciontapish chasquijcuna carca (Deuteronomio 26:12-15). Pero diezmota mana cushpaca Diospajta shuhuacushca shinami carca (Malaquías 3:8, 9).

 ¿Diezmota cunaca sinchichu carca? Mana. Ashtahuanpish Jehová Diosca israelitacunataca, cancuna diezmota cujpica bendicioncunatami cusha, imapish mana faltangachu nircami (Malaquías 3:10). Cutin israelitacunaca mana diezmota cushcamantaca Diospaj bendicionta chingachinami carca. Shinallataj sacerdotecunapish, levitacunapish paicunapajllata mantiniringapajmi trabajanman carca. Chaimantami israelitacunataca Diosta adorachun ña mana ayudai tucunman carca (Nehemías 13:10; Malaquías 3:7).

 Jesús cai Allpapiraj causacujpica Diosta sirvijcunapajca diezmota cuna mandashcaca valicurcarajmi. Pero Jesús ña huañushca huashami chai mandashcaca tucurirca.

Jesús causashca punllacuna

 Mushuj Testamentopica Jesús cai Allpapi causacujpirajca israelitacunaca diezmota cushpami caticurcacuna ninmi. Jesusca israelitacuna diezmota cuna cashcatami yacharca. Pero paica religionta pushajcunataca: “Diezmotaca cujcunami canguichij. Ashtahuanpish cashcata ruranata, llaquij canata, crinatapish, chai ashtahuan alli Mandashcatarajmari saquishcanguichij” nircami (Mateo 23:23).

Jesús huañushca qꞌuipa

 Jesús huañushca qꞌuipaca diezmota cunaca ña mana minishtirircachu. Jesús huañushpa paipaj causaita cushpami, diezmota cunata, Moisesman cushca leytapish chingachirca (Hebreos 7:5, 18; Efesios 2:13-15; Colosenses 2:13, 14, NWT).