2 Corintios 9:1-15
-
Cushicushpa ayudanamanta (1-15)
-
Cushicushpa cujtami Diosca cꞌuyan (7)
-
9 Jucha illaj huauquicunata ayudana cashcata yachachunca mana quillcana canichu.
2 Cancuna cushicushpa ayudasha nishcataca yachanimi. Macedoniapi cajcunamanca Acaya llajtapi cajcunaca shuj huata huashamantami ayudangapaj listos can nishpami parlarcani. Cancuna chashna cushicushpa ayudasha nishcamantami paicunamanta achcacunapish chashnallataj ayudasha nicuncuna.
3 Shinapish ñuca nishca shinallataj ayudangapaj listos cachunmi cai huauquicunata cachani. Chashnami cancuna ayudashun nishcamanta ñuca alli parlashcaca mana yangalla canga.
4 Macedoniamanta huauquicunachari ñucahuan risha ningacuna. Paicuna rishpaca cancuna manaraj listo cashcatachari ricungacuna. Chashna tucujpica cancunapi confiashcamantami ñucanchijca pingaipi saquirishun. Cancunapishmi pingaipi saquiringuichij.
5 Chaimantami shungumanta cancuna cusha nishcata tandachichun cai huauquicunata cancunapajman utca cachanata yuyarircani. Chashnami ñucanchij chayajpica cancuna cushcacunaca listo canga. Chashna rurashpaca ñucanchij rurachun nishcallamanta mana cushcata, ashtahuanpish shungumanta cushcatami cancunaca ricuchinguichij.
6 Caita yuyarichij, ashallata tarpujca ashallatami tandanga. Cutin achcata tarpujca achcatami tandanga.
7 Cada uno paipaj shungupi yuyarishca shina cuchun. Ama llaquirishpa, ama cuchun nishcallamanta cuichijchu. Cushicushpa cujtami Diosca cꞌuyan.
8 Diosca yallitaj llaquij cashcamantami cancunapaj ima minishtishca ama illachun tucuita cui tucun. Chashnami cancunaca imapish mana illaj cashpa allita rurangapajca achcata charinguichij.
9 (Quillcachishcapica: “Paica pobrecunamanmi achca allicunata cushca. Pai cashcata rurashcatapish huiñaipajmi yuyaringacuna” ninmi.
10 Tarpuj runaman achca muyuta cuj, micungapajpish tandata cuj Diosmi cancuna tarpuchunpish muyuta cushpa, chai muyuta mirachinga. Shinallataj cashcata rurashcamantami achcata tandachun ayudanga).
11 Cancunataca shungumanta mana mitsashpa cushpa shujtajcunata ayudachunmi Diosca achcata bendiciashca. Cancuna cushca regalota shujtajcunaman ñucanchij cujpimi gentecunaca Diosta pagui ningacuna.
12 Cancuna cushca ayudaca jucha illaj huauquicuna ima minishtishcapi ayudangapajllaca mana canchu. Ashtahuanpish chai cushca ayudacunamanta achca gentecuna Diosta pagui nichunmi can.
13 Chashna ayudashpaca ima laya gentecuna cashcatami ricuchinguichij. Cristomanta alli huillaicunata huillashca shina cancuna causajpi, paicunatapish, tucui caishuj gentecunatapish shungumanta ayudajpimi paicunaca Diosta alabangacuna.
14 Paicunapishmi cancunataca cꞌuyangacuna. Yallitaj llaquij cashcata Dios cancunaman ricuchishcamantami cancunamantapish Diosta mañangacuna.
15 Ima shimicunahuan mana parlai tucuipaj sumaj allicunata cushcamantami Diosta pagui ninchij.
