Mëtsikaq nunakunam niyarqan, mäyakunapa calendarion willakunqannö, 2012 wata, 21 de diciembrechö entero mundo cambianampaq kaqta. ¿Imanötaq qamqa sientikunki tsë fëchaman yarpar? Quizá mana cumplikashqa kaptin kushikunki, ardëlla parlayanqanta rikar piñakunki o ajananki o imatapis musyëta munankinatsu. ¿Mundo imë ushakänampaq kaqta mëtsika kutina pantayanqannöllatsuraq tsë fëchawampis pasashqa?

¿Y imatataq pensanki Biblia parlanqan “mundu ushacänanpag” kaqpita? (Mateo 24:3, NTCN.) Wakinkunaqa Patsa rupar ushakänantam mantsayan. Wakinkunanam kushikuyan y gustayan Patsa feyupa ushakaqta pelïculakunachö, librokunachö y tukïchö rikar. Y wakinkunanam wiyëtapis munayantsu ushakë kanampaq kaqta kutin kutin willakuyaptin. Pero ¿manatsuraq tsënö sientikuyanqanqa rikätsikïkan Biblia willakunqanta cuentaman mana churëkäyanqanta y lluta cuentokunallata wiyëkäyanqanta o rikëkäyanqanta?

Capaz Biblia rasumpa yachatsikunqanta musyarirqa kushikurinkiman. Diospa Palabranqa kë mundopa ushakëninta imanir kushishqa shuyaränantsikpaq kaqtam rikätsimantsik, jina ninmi mana chämoqnö kaptinqa shuyarëta qelanärita puëdinqantsiktapis. Tsëmi invitariyaq nunakuna chusku tapukïkunata rurakuyanqanta Biblia imanö contestanqanta rikärinëkipaq.

BIBLIA YACHATSIKUNQAN: “[Diosqa] Patsata allim takyatsishqa, y manam pipis ni imë kuyutsinqatsu, ni imëyaqpis” (SALMO 104:5).

Kë Patsaqa manam ninawan ni imawampis ushakanqatsu; antis Bibliaqa yachatsikun nunakunapa wayin cuenta imëpis kanampaq kaqtam. “Patsachöqa alli nunakunallam täräyanqa, y tsëchömi imëkamayaqpis kawayanqa” ninmi Salmo 37:29 (Salmo 115:16; Isaías 45:18).

Kamanqan Patsapaqqa “alläpa allim” nirqanmi Diosqa, y tsënöllam kanankunapis pensan (Génesis 1:31). Pëqa manam munantsu Patsata ushakätsita, antis ‘que patsacho llutanta rurarnin ushacätseqcunata’ ushakatsinampaqmi awnikushqa y manam dejanqatsu nunakuna Patsata malograyänanta (Apocalipsis 11:18).

Pero qamqa capaz pensëkanki 2 Pedru 3:7 textochö, “patsata y sieluta Diosnintsic [...] ninawan ushacäratsinanpaq” kaqta ninqanman. ¿Manaku kë textoqa Patsa rupakänampaq kaqta rikätsikun? Bueno, höraqa manam rasumpa ciëlopaqtsu, patsapaqtsu y ninapaqtsu Bibliaqa parlan. Tantearinantsikpaq, Génesis 11:1 textochömi, “llapan patsam juk idiömallata parlayaq” nin. Musyënam, kë textochö ‘patsa’ nirqa, llapan nunakunapaqmi parlëkan.

Jina 2 Pedru 3:7 textopa qepan kaq versïculonkunapis rikätsikunmi ciëlopaq, patsapaq y ninapaq mana parlëkanqanta, sinöqa juk igualatsikïllata rurëkanqanta. Tsëmi 5 y 6 kaq versïculokuna Noëpa tiemponchö Apäkï Tamyapaq parlan. Y mundochö täraq nunakunam ushakäyarqan, pero kikin Patsaqa manam ushakarqantsu. Ushakaq ‘patsaqa’ mana alli nunakunam kayarqan y ushakaq “cielonam” tsë tiempochö gobernaq nunakuna kayarqan (Génesis 6:11). Tsëmi versículo 7 ninqannöpis llapan mana alli nunakuna y mana alli gobiernokuna chipyëpa ushakäyanqanta “ninawan” igualatsin.

BIBLIA YACHATSIKUNQAN: “Que mundoqa llapan mana alli munenincunawan ushacäreqllam; peru Diospa muneninta ruraq nunaqa wiñepam [mana wanïpam] cawanqa” (1 JUAN 2:17).

Ushakaq “mundoqa” manam kë täranqantsik Patsatsu, sinöqa, Diospa munëninta mana ruraq nunakunam kayan. Imanömi juk doctor pitapis salvananrëkur cancerëkaq tumorninta  roqurir jorqarapun, tsënöllam Diospis llapan mana alli nunakunata Patsapita ushakäratsinqa, tsënöpa, alli nunakunallana kë Patsachö kushishqa kawakuyänampaq (Salmo 37:9). Rasumpa kaqchöqa “mundopa ushakëninqa” allipaqmi kanqan.

Tsëmi “mundu ushacänanpag” neq palabraqa, wakin Bibliachöqa shumaq entienditsimantsik “më tsëchö imëkapis imanö këkanqampa ushënin witsanna kanqanta” nir (Mateo 24:3, NM). Llapan mana alli nunakuna ushakäyänampaq kaq y Patsa imëpis këkänampaq kaqqa, ¿manaku rikätsikun alli kaq nunakunapaqqa alli kawakïna qallanampaq kaqta? Tsëtam Bibliaqa rikätsikun ‘wac bidapaq’ parlarnin, tsëqa shamoq tiempochö shumaq Patsachö kawakïmi (Lucas 18:30).

Tsë witsantam “imecapis mushoqman ticranan junaqmi” nirnin Jesus qayarqan. Patsapaq y nunakunapaq puntallapitana Dios munanqantam Jesusqa cumplitsinqa (Mateo 19:28). Tsënö ruramuptinmi, kë bendicionkunata chaskishun:

• Alläpa shumaq y seguro Patsachömi kawashun (Isaías 35:1; Miqueas 4:4).

• Llapankunam alli y seguro trabäjoyoq kayanqa (Isaías 65:21-23).

• Mananam ni pipis qeshyanqanatsu (Isaías 33:24).

• Joven këmanmi llapankuna kutiyanqa (Job 33:25).

• Wanushqakunam kawariyämunqa (Juan 5:28, 29).

“Diospa munëninta” rurarninqa manam imanir mundopa ushakëninta mantsashwantsu, antis, chämunantanam munantsik.

BIBLIA YACHATSIKUNQAN: “Willayanqaqcuna susedicuptin[mi], musyayanqui Diospa mandaquinin chämunanpaq ichicllana pishicanqanta” (LUCAS 21:31).

Juk librochömi profesor Richard Kyle kënö qellqarqan, “mana shuyanqantsik cambiokuna kanqan, y nunakuna más mana allikunaman chäyanqanmi, mundo imë y imanö ushakänampaq kaqta nunakuna imëpitapis más parlayänampaq rurashqa”. Awmi, masraq tsëkuna imanir pasanqanta mana musyayaptinnäqa (The Last Days Are Here Again).

Tsënö kaptimpis, mundo ushakänampaq kaqta willakoq profëtakunaqa, manam patsapa ushakënin imë y imanö kanampaq kaqta nunakuna tantear kayänampaqtsu qellqayarqan. Diosmi musyatsirqan mundopa ushakënin chämunanna këkaptin imakuna pasanampaq kaqta qellqayänampaq. Rikärï  kë qateqninchö këkaq profecïakuna cumplikëkanqanta o mana cumplikëkanqanta.

• Guërrakuna, mallaqëkuna, Patsa kuyïkuna y tukï wanutsikoq qeshyakuna (Mateo 24:7; Lucas 21:11).

• Melanëpaq mana alli rurëkuna miranqan (Mateo 24:12).

• Nunakunam patsata malograyanqa (Apocalipsis 11:18).

• Diosta kuyayänampa rantin, kikinkunallata, qellëllata y mana alli rurëkunallata kuyayanqan (2 Timoteu 3:2, 4).

• Familiakuna rakikar ushakäyanqan (2 Timoteu 3:2, 3).

• Ushakë këllachöna këkanqanta pï më cuentapaq mana churayanqan (Mateo 24:37-39).

• Entero Patsachö alli willakïkunata musyatsikïkäyanqan (Mateo 24:14).

Këkuna “susedicoqta ricar”, mundopa ushakënin këllachöna këkanqanta musyanantsikpaqmi Jesusqa nirqan (Mateo 24:33). Jehoväpa testïgonkunapaqqa kë cumplikanqankunaqa clärom këkan, tsëmi 236 nacionkunapita y territoriokunapita maschöna creiyanqäkunata yachatsikïkäyä.

BIBLIA YACHATSIKUNQAN: “Waquin nunacunam niyanqa: ‘Segurunam y alli pasaquichonam [kawakuychönam] cantsic’ nishpa. Tseno nicayaptinmi, derepentita chaquiconqa limpu [chipyay] ushacäyänan öraqa, imeca qeshyaq warmipa qeshpicunanpaq nanatsiquinin öra chäreqno, y manam ni imano safeta puediyanqatsu” (1 TESALONICENSES 5:3).

Imëka juk warmita qeshyakïnin junaq illaqpita tsareqnö, mundopa ushakënimpis illaqpita chämunampaq kaqtam Bibliaqa nin. Jina imanömi juk qeshyaq warmi tiempo pasanqanmannö mäkun o mayan llullun yurinampaqna kaqta, tsënöllam kë tiempopis pasanqanmannö rikätsikun mundopa ushakënin chämunampaqna kaqta. Y doctor ninqan fëchachö mana qeshpikurpis, warmiqa musyanmi ichikllachöna qeshpikunampaq kaqta. Jina tsënöllam mundopa ushakënin imë y imanö chämunampaq kaqta pantayaptimpis, señalkunaqa claro rikätsikun ‘ushanan junaqkunachöna’ këkanqantsikta (2 Timoteu 3:1, NM).

“Ushakëpa señalninkuna claro këkaptinqa, ¿imanirtaq pï më tsëta cuentata qokuyantsu?”, nir capaz tapukunki. Mana creipaq kaptimpis, Bibliaqa willakushqanam karqan ushakë junaq  chämunanna këkaptimpis, wakin nunakunaqa tsë señalkunata cuentaman mana churayänampaq kaqta. Ushanan junaqkunachö imëka pasakunqanta rikar cuentata qokuyänampa rantinmi, kënö nir burlakuyänan karqan: “Castantsiccunapis [...] [tsëta] shuyaquicarllam wanucuyashqa. Y que patsa qallananpita cashqannollam llapanpis caquican” (2 Pedru 3:3, 4). Juk parlakïchöqa, ushanan junaqkunachöna këkanqantsikta mëtsika señalkuna rikätsikïkaptimpis, manam casuyanmantsu karqan (Mateo 24:38, 39).

Kë yachatsikïchöqa këkan, ushanan junaqkunachöna këkanqantsikta rikätsikoq wakin señalkunallam. * ¿Masta musyëta munankiku? Tsënö karqa, Jehoväpa testïgonkunata niri Bibliapita grätislla yachatsiyäshunëkipaq. Pëkunaqa puëdiyanmi wayikichö, juk sitiochö o hasta telëfonopapis yachatsiyäshïnikita. Sasaraq kaptimpis tsëpaq tiempïkita rakinqëkiqa, kawënikipaqmi kanqa.