¿Pikunatan ciëluta ëwayanqa?
Bibliachö yachatsikunqan
Teyta Diosqa wallkaqlla sirweqninkunatam akrashqa wanuyanqampita kawariramur ciëluchö kawayänampaq (1 Pëdru 1:3, 4). Peru ciëluta ëwayänampaq akrashqa karpis, Teyta Dios munanqannö kawar y alli markäkurmi o yärakurmi sïguiyänan. Mana tsëta rurarqa, manam ciëluchö herenciata chaskiyanqatsu (Efesius 5:5; Filipensis 3:12-14).
¿Imatataq ciëluchöqa rurayanqa?
Ciëluta ëwayänampaq akrashqakunaqa, mil watapam Jesuswan gobernanti y sacerdöti kayanqa (Apocalipsis 5:9, 10; 20:6). Pëkunaqa ciëluchömi mushoq gobiernu kayanqa (tsëpaqmi Bibliachö nin “mushoq ciëlukuna”), y Patsachö kawaq nunakunatam gobernayanqa (o “mushoq patsata”). Tsë gobernaqkunam yanapamäshun, Teyta Dios munanqannö alli kaqta rurarllana kawanapaq (Isaïas 65:17; 2 Pëdru 3:13).
¿Ëkaqtan ciëluta ëwayanqa?
Bibliachömi willakun, 144.000 nunakuna ciëluchö kawayänampaq kawariyämunampaq kaqta (Apocalipsis 7:4). Apostol Juanmi suëñuyninchö rikanqanta kënö willakurqan: “Orqu Üshata[m] [kawarimushqa Jesucristutam] Sion jirkachö shëkaqta rikarqä, y pëwanmi [...] cientu cuarenta y cuatru mil nunakuna këkäyarqan” (Apocalipsis 14:1-3; Juan 1:29; 1 Pëdru 1:19). Sion jirkaqa rikätsikun, Jesuswan 144.000 mil nunakuna ciëlupita gobernayämunampaq kaqtam (Salmus 2:6; Hebrëus 12:22).
Cristuwan ciëlupita gobernayänampaq “qayashqa y akrashqa” kaqkunapaqmi, Bibliachöqa nin “wallkaqlla kaqkuna” kayanqanta (Apocalipsis 17:14; Lücas 12:32). Tsëmi rikätsikun ciëluman ëwaqkunaqa, Cristupa wakin qateqninkunapita mas wallkaqlla kayanqanta (Juan 10:16).
Ciëluta ëwaqkunapaq nunakuna creiyanqan
Wakinkuna creiyanqan: Llapan alli nunakunam ciëluta ëwayanqa.
Rasumpa kaq: Teyta Diosqa änikun, cäsi llapan alli nunakuna kë Patsachö kawayänampaqmi (Salmus 37:11, 29, 34).
Jesusmi kënö nirqan: “Manam ni pï nunapis ciëlumanqa witsashqatsu” (Juan 3:13). Tsëchö ninqanmi rikätsikun, Abrahan, Moises, Job, David y wakin alli nunakunapis, Jesus manaraq wanuptinqa, ciëluta mana ëwayanqanta (Hëchus 2:29, 34). Pëkunaqa kë Patsachö kawayänampaq kawariyämunampaq kaqmanmi markäkuyarqan o yärakuyarqan (Job 14:13-15).
Ciëluchö kawayänampaq kawarimoqkunaqa, ‘puntata kawariyämunqanchö kawarimoqkunam’ kayan (Apocalipsis 20:6). Tsëmi rikätsikun maskunapis kawariyämunampaq kaqta. Pëkunaqa kë Patsachö kayänampaqmi kawariyämunqa.
Bibliachömi willakun Diospa Gobiernun gobernamuptinqa, ‘nunakuna manana wanuyänampaq’ kaqta (Apocalipsis 21:3, 4). Ciëluchöqa manam wanuyantsu, tsëmi tsënö nirqa Patsachö kawaqkunapaq parlëkan.
Wakinkuna creiyanqan: Cada nunam decidin ciëluchö o Patsachö kawanampaq kaqta.
Rasumpa kaq: Teyta Diosllam decidin pikuna “ciëluchö kawë premiuta” chaskiyänampaq kaqta o ciëluchö kawayänampaq kaqta (Filipensis 3:14). Pëkunaqa manam kikinkuna munartsu o decidirtsu ciëluchö kawayanqa (Mateu 20:20-23).
Wakinkuna creiyanqan: Ciëluchö kawayänampaqnö mana kaqkunallam kë Patsachöqa kawayanqa.
Rasumpa kaq: Patsachö imëyaqpis kawëta shuyaraq nunakunapaqmi, Teyta Dios nin ‘sirweqnin nunakuna’ y ‘Jehovä bendicinqan nunakuna’ kayanqanta (Isaïas 65:21-23). Pëkunachömi Teyta Dios rurëta munanqan cumplikanqa. Teyta Diosqa munarqan, jutsannaq nunakuna mana wanushpa shumaq Patsachö kawakuyänantam (Genesis 1:28; Salmus 115:16; Isaïas 45:18).
Wakinkuna creiyanqan: Apocalipsis libruchöqa manam rasumpa 144.000 nunakunallapaqtsu parlëkan.
Rasumpa kaq: Apocalipsis libruchö wakin nümerukunaqa imatapis rikätsikuyänanllapaqmi, peru wakin nümerukunaqa rasumpa nümerukunam kayan. Maslla musyarinapaq, “Orqu Üshapa döci apostolninkunapa döci jutinkuna këkarqan” nirqa, rasumpa nümerupaqmi parlëkan (Apocalipsis 21:14). 144.000 nümeru rasumpa nümeru kanqampita masllata yachakurishun.
Ciëluchö kawayänampaq akrashqakunapaqmi Apocalipsis 7:4 nin “cientu cuarenta y cuatru mil sellashqakuna” kayanqanta. Tsëpitanam “pï nunapis mana yupëta puëdinqan mëtsikaq nunakunapaq” willakun. “Pï nunapis mana yupëta puëdinqan mëtsikaq” nunakunapis salvakuyanmi (Apocalipsis 7:9, 10). 144.000 nümeru mana rasumpa nümeru kaptin y mëtsikaq nunakunata rikätsikuptinqa, manachi ishkan grüpu imachö jukläya kayanqanta musyashwantsu. a
Tsë 144.000 nunakunapaqmi Bibliachö kënö nin: “Pëkunaqa puntata wayunqannömi [...] nunakunapita rantishqa kayashqa” (Apocalipsis 14:4). “Puntata wayunqannömi” nirqa, llapampita wakin kaqllapaqmi parlëkan. Tsëmi cläru rikätsikun ciëluta ëwaqkunaqa wallkaqlla kayanqanta. Pëkunaqa kë Patsachö mëtsikaq nunakunatam, Cristuwan juntu gobernayämunqa (Apocalipsis 5:10).
a Apocalipsis 7:4 textuchö 144.000 nümerupaq parlarmi Robert Thomas profesor kënö nir qellqarqan: “Tsë nümeruqa rasumpa ëkaq kayanqantam rikätsikun, peru 7:9 ninqanchöqa manam ëkaq kayanqanta nintsu. Tsë nümeru mana rasumpa nümeru kanqanta nishqaqa, tsë libruchö wakin nümerukunapis manachi rasumpa nümerutsu kayanman” (Apocalipsis 1-7: An Exegetical Commentary [Comentario exegético de Apocalipsis 1-7], 474 kaq pägina).
Capaz këkunapis gustashunki
ENSEÑANZAS IMPORTANTES DE LA BIBLIA
¿Imataq Diospa Gobiernun?
Jesusqa, yachatsikur qallanqampita patsëmi, Diospa Gobiernumpita mas parlarqan. Jesuspa qateqninkunaqa unëpitam tsë Gobiernu chämunanta mañakïkäyan.
BIBLIACHÖ IMA NINQAN
Bibliapita shumaq yachatsikuyanqäpita masllata musyari
Jehoväpa testïgunkunawan Bibliapita grätislla yachakuy.