¿Llapan religionkunaku yanapakun Diosnintsikta alli adoranapaq?
Bibliachö ima ninqan
Manam. Manam llapan religionkunatsu igual kayan. Wakin religionkunachöqa manam Diosnintsik munanqannötsu adorayan, tsëtam Bibliachö willakun. Ishkë formapa adorayanqanta rikärishun.
Juk: Santukunatam adorayan
Bibliachöqa nin santukunata adorëqa imapaqpis mana välinqantam (Jeremïas 10:3-5; 16:19, 20). Unë Israel naciontam Jehovä a kënö nirqan: “Noqallata[m] adorayämänëki, y manam santukunataqa adorayänëkitsu” (Exodu 20:3, 23; 23:24). Israelïtakuna santukunata adorayaptinqa, “Jehoväqa pëkunawan alläpa[m] cölerakurqan” (Nümerus 25:3; Levïticu 20:2; Juëces 2:13, 14).
Kanan witsampis Diosqa manam munantsu, “dioskuna” nir reqiyanqan santukunata adorayänanta (1 Corintius 8:5, 6; Gälatas 4:8). Rasumpa sirwita munaqkunataqa, mana alli religionkunapita yarqukuyänampaqmi Diosnintsik mandan. Palabranchömi kënö nin: “Pëkunapita witikuyë y rakikäyë” (2 Corintius 6:14-17). Llapan religionkunapis alli y igual-lla kayaptinqa, manachi Diosnintsik tsënö mandakunmantsu karqan.
Ishkë: Diosta adorarpis manam pë munanqannötsu adorayan
Israelïtakunaqa Jehoväta adorëkarpis, santukunata adoraqkuna rurayanqan costumbrikunata y mana alli religionkunapa costumbrinkunatam rurayaq, tsëmi Jehoväqa adorayanqanta chaskirqantsu (Exodu 32:8; Deuteronomiu 12:2-4). Jesuspis, Jehovä mandakunqanta mana cäsukuyanqampitam religiösukunata condenarqan. Pushakoq religiösukunaqa Diosta adoraq tukurmi mana allikunata rurayaq. Tsëmi Jesus nirqan: “Alli kaqta rurayänëkipaq, llakipäkoq kayänëkipaq y markäkuypaq o yärakuypaq kayänëkipaq Leychö mandakunqantaqa mana kaqpaqmi churayanki” (Mateu 23:23).
Tsëqa, ¿imanö religiontaq yanapamantsik Diosta alli adoranapaq? Biblia mandakunqanta cumpleq religionllam (Juan 4:24; 17:17; 2 Timoteu 3:16, 17). Biblia yachatsikunqampa contran yachatsikoq religionkunaqa, nunakunatam Diospita mas rakikätsiyan. Mëtsikaq religionkunam creiyan Trinidäman, alma mana wanunqanman y infiernuman. Tsëta Bibliachö yachatsikunqantam pensayan, peru rasumpa kaqchöqa, tsë creenciakunaqa santukunata adorayanqampitam shamun, y unë religionkunapa costumbrikunam. Tsë creenciakunaman creir Diosta adorayanqanqa manam välintsu (Marcus 7:7, 8).
Tsënöllam Diospaqqa välintsu Bibliachö mandakunqannö mana kawayaptinqa (Tïtu 1:16). Diosta alli adoranapaq yanapakoq religionchöqa, manam costumbrikunata qatirllatsu Diosta adorayan. Tsëpa rantinqa, Biblia mandakunqannömi cada junaq kawayan. Bibliachö kënö ninqanllaman pensarishun: “Teyta Diosta adorëkanqanta pensarpis, qallunta controlëta mana yachaq nunaqa, kikimpa shonquntam engañëkan, y Diosta sirwinqampis manam imapaq välintsu. Diosnintsikpa y Teytantsikpa rikëninchö alli y limpiu adoracionqa këmi: sufrimientukunapa pasayaptin teytannaq kaqkunata y viudakunata cuidë, y kë munduchö nunakunanö mana portakuymi” (Santiägu 1:26, 27, nöta). Diosta imanö adorëpaq parlarmi kë leyirinqantsik textuchöqa ‘alli y limpiu adoracion’ nin.
a Teyta Diospa jutin Jehovä kanqantam Bibliachöqa nimantsik.