Kay folletopeqa, Bibliaj yuyaychaykunasnin tiyan qanta, familiaykita ima yanapasunanpaj. Diosqa kusisqa tiyakunaykichejta munan. Munaynintataj ñaupajman churajtiykichejqa, tukuy imata “yapata jina Dios qosonqachej” (Mateo 6:33). Diosqa amigoyki kayta munan. Chayrayku Dioswan masichakunaykipaj tukuy imata ruway, imaraykuchus paywan amigos kayqa may sumaj (Mateo 22:37, 38).

BIBLIA NIN: “Noqaqa qankunaj Tataykichej kasaj, qankunataj churisniy, ususisniytaj kankichej, nispa nin Tukuy Atiyniyoj Señorqa” (2 Corintios 6:18). Diosqa amigoyki kayta munan, Paymantaj mañakuynejta qayllaykuyta atiwaj. Pay niwanchej : “Mana saykʼuspa, [...] mañakullaychejpuni”, nispa (1 Tesalonicenses 5:17). Diosqa munan llakiyniykita, imatachus yuyasqaykitapis willakunaykita (Filipenses 4:6). Familiaykiwan khuska mañakunki chayqa, reparanqanku qanpaj Dios kasqantapuni.

Dioswanqa mana parlanallaykichu tiyan, manaqa uyarinayki tiyan. Chaytataj ruwawaj Bibliamanta orqhosqa publicacionesta, Bibliata ima ukhunchaspa (Salmo 1:1, 2). Yachakusqaykipi tʼukurispa (Salmo 77:11, 12). Tantakuykunamanpis rispa (Salmo 122:1-4).

Chantá Jehovamanta tukuy runasman willamuspaqa payman astawan qayllaykunki (Mateo 28:19, 20).

KAYTA RUWAWAJ:

• Sapa pʼunchay Bibliata leenaykipaj, Jehovamanta mañakunaykipaj ima tiempochakuy

• Familiaykita, sonqonkuta kusichinankumanta nisqaqa, Diosta yupaychayta astawan ñaupajman churanankupaj yanapay

BIBLIA NIN: “Diosman astawan qayllaykuychej; paypis qayllamusonqachej”, nispa (Santiago 4:8). Ima pʼunchaychus, ima horachus Familiapi Diosta Yupaychanapaj tantakuyta ajllaychej (Génesis 18:19). Chantá sapa pʼunchay Diospa yanapayninta mañakuy, familiaykitapis Diosman qayllaykunanpaj yanapallaytaj. Biblia nin: “Sapa kuti [...] kay kamachisqasmanta willaychejpuni wasiykichejpi, jinallataj ñampi purishaspapis, chantá puñunapaj siriykushaspapis, jatarishaspapis”, nispa (Deuteronomio 6:6, 7). Josué jina ninayki tiyan, “noqatajrí tukuy aylluywan Tata Diostapuni sirvikusqayku”, nispa (Josué 24:15).

KAYTA RUWAWAJ:

• Familiaykimanta sapa uj necesitasqanman jina yachachiykunata ajllay