ISKAY KAJ RAKʼIY
Ama tʼaqanakuy kachunchu
“Diospa ujchasqantaqa ama runa tʼaqachunchu.” (Marcos 10:9)
Jehová nin: Ama “wasanchaychejchu”, nispa (Malaquías 2:16). Casarasqas chayta kasukunankoqa may allin. Mana wasanchanakojtinkoqa, purajmanta atienekonqanku, atienekojtinkutaj astawan munanakonqanku.
Kay tiempopi casarasqasqa wasanchanakunku. Chayrayku qhariwarmi kausayniykita jarkʼanaykipajqa, iskay imasta ruwanaykipuni tiyan.
1 QHARIWARMI KAUSAYNIYKITA ÑAUPAJMAN CHURAY
BIBLIA NIN: “Aswan allin kajta ajllayta yachankichej”, nispa (Filipenses 1:10). Qhariwarmi kausayniykitaqa may allinpaj qhawanayki tiyan, ñaupajmantaj churanayki tiyan.
Jehová munan warmillaykita chayri qosallaykita munakunaykita, kusisqa kausakunaykichejtapis (Eclesiastés 9:9). Chantá nillantaj mana qosaykimanta chayri warmiykimanta qonqapunaykita, manaqa kusisqa kananpaj imallatapis ruwanaykita (1 Corintios 10:24). Qosayki chayri warmiyki reparachun payta munakusqaykita, sumajpaj qhawasqaykita ima.
KAYTA RUWAWAJ:
-
Qosaykiman chayri warmiykiman munakusqaykita, tiempochakusqaykita ima rikuchiy
-
Ama qanllapi yuyaychu
2 SONQOYKITA JARKʼAY
BIBLIA NIN: “Sichus pipis uj warmita qhawan munapayaspa chayqa, ñapis paywan sonqompi khuchichakunña”, nispa (Mateo 5:28). Casarasqa kashaspa khuchichakuypi yuyaspaqa, ñapis qosanta chayri warminta wasanchanña.
Jehová niwanchej sonqonchejta waqaychanata (Proverbios 4:23; Jeremías 17:9). Chayta ruwanapajqa allinta reparakuy imatachus qhawasqaykita (Mateo 5:29, 30). Jobmanta yachakuy, payqa sonqonpi nikorqa ni sipas solterallatapis munapayananta (Job 31:1). Chayrayku amapuni khuchichakuykunata (pornografía nisqata) qhawaychu. Nillataj waj qharita chayri waj warmita munapayaspa qhawaychu.
KAYTA RUWAWAJ:
-
Tukuy reparananku tiyan qosaykita chayri warmiykita munakusqaykita
-
Qosayki chayri warmiyki imatachus yuyasqanta allinpaj qhaway, ima ruwasqaykipis kʼumuykachachinanpaj jina kajtenqa amaña ruwaychu