سبق 4
یسوع مسیح کون نیں؟
1. یسوع مسیح دی زندگی کیویں شروع ہوئی؟
یسوع مسیح دی زندگی عام انساناں وانگوں زمین تے نئیں سگوں اسمان تے شروع ہوئی۔ (یوحنا 8:23) خدا نے کسے وی چیز نوں بناؤن توں پہلاں اوہناں نوں اِک خاص فرشتے دے طور تے بنایا سی۔ یہوواہ خدا نے اپنی ساری خلقت وچوں صرف یسوع نوں اپنے ہتھیں بنایا اے، ایس لئی پاک کلام وچ اوہناں نوں خدا دا اکلوتا بیٹا کہیا جاندا اے۔ (یوحنا 1:14) باقی ساریاں چیزاں بناؤن لئی خدا نے یسوع مسیح نوں استمال کیتا۔ (امثال 8:22، 23، 30) یسوع مسیح نوں کلام وی کہیا جاندا اے کیونکہ اوہناں نے خدا دا پیغام دُوجیاں تک پہنچایا۔—کُلسّیوں 1:15، 16 نوں پڑھو۔
2. یسوع مسیح زمین تے کیوں آئے سن؟
خدا نے اسمان توں اپنے بیٹے یسوع مسیح دی زندگی نوں اِک کنواری یہودی عورت دے رحم وچ پایا، جدا ناں مریم سی۔ ایس طرحاں یسوع مسیح زمین تے انسان بن کے آئے پر اوہناں دا کوئی انسانی باپ نئیں سی۔ (لُوقا 1:30-35) یسوع زمین تے (1) لوکاں نوں خدا بارے سچائی سکھان، (2) ساڈے لئی اِک مثال قائم کرن تاکہ اَسی مشکلاں دے باوجود خدا دی مرضی پوری کرئیے تے (3) اپنی جان فدیے دے طور تے قربان کرن آئے سن۔—متی 20:28 نوں پڑھو۔
3. انساناں نوں فدیے دی لوڑ کیوں اے؟
کسے نوں موت دے موُنہوں چھڑان لئی دِتی گئی قیمت نوں فدیہ کہیا جاندا اے۔ (خروج 21:29، 30) خدا کدی وی نئیں سی چاہندا کہ انسان بُڈھے ہو کے مر جان۔ اَسی ایہہ کیویں جاننے آں؟ خدا نے پہلے انسان آدم نوں دسیا سی کہ جے اوہ گناہ کرے گا تے اوہنوں موت دی سزا ملے گی۔ ذرا سوچو، جے اوہ گناہ نہ کردا تے اوہ کدی وی نہ مر دا۔ (پیدایش 2:16، 17؛ 5:5) پاک کلام دسدا اے کہ آدم نے اپنی ساری اولاد نوں گناہ تے موت ورثے وچ دے دِتی۔ ایس طرحاں اوہدے ذریعے موت سارے انساناں وچ پھیل گئی۔ ایس لئی سارے انساناں نوں موت دی سزا توں رہائی پاؤن لئی فدیے دی لوڑ اے۔—رومیوں 5:12؛ 6:23 نوں پڑھو۔
سانوں موت توں چھڑاؤن لئی کون فدیہ دے سکدا سی؟ جدوں اَسی مرنے آں تے اَسی صرف اپنے گناہواں دی سزا بُھگتنے آں۔ کوئی وی گناہگار انسان اپنی جان قربان کر کے دُوسریاں دے گناہواں دی قیمت نئیں چُکا سکدا۔—زبور 49:7-9 نوں پڑھو۔
4. یسوع مسیح نے اپنی جان کیوں قربان کیتی؟
یسوع مسیح ساڈے وانگوں گنہگار نئیں سن بلکہ اوہ گناہ توں بالکل پاک سن۔ ایس لئی اوہناں نے اپنے گناہواں لئی نئیں سگوں انساناں دے گناہواں دی خاطر اپنی جان دا فدیہ دِتا۔ خدا نے اپنے بیٹے نوں ساڈے واسطے اپنی جان قربان کرن لئی گھلیا۔ ایہہ قربانی انساناں لئی خدا دے پیار دا سب توں وڈا ثبوت اے۔ یسوع مسیح نے وی انساناں لئی اپنا پیار وکھایا جدوں اوہناں نے اپنے باپ دا کہنا منیا تے ساڈے گناہواں دی خاطر اپنی جان دِتی۔—یوحنا 3:16؛ رومیوں 5:18، 19 نوں پڑھو۔
ویڈیو ”یسوع مسیح نے اپنی جان کیوں قربان کیتی؟ ویکھو۔
5. یسوع مسیح ہنُ کیہہ کر رہے نیں؟
جدوں یسوع مسیح زمین تے سن تے اوہناں نے بیماراں نوں تندرست کیتا، مُردیاں نوں زندہ کیتا تے مشکلاں وچ پھسے لوکاں دی مدد کیتی۔ ایس طرحاں اوہناں نے وکھایا کہ اوہ خدا دی گل منن والے انساناں لئی مستقبل وچ کیہہ کجھ کرن گے۔ (متی 15:30، 31؛ یوحنا 5:28) یسوع مسیح دی موت توں بعد خدا نے اوہناں نوں اِک رُوح یعنی طاقتور فرشتے دے طور تے دُبارہ زندہ کیتا۔ (1-پطرس 3:18) فیر یسوع نے یہوواہ خدا دے سجّے ہتھ بیٹھ کے اوہدوں تک انتظار کیتا جدوں تک خدا نے اوہناں نوں ساری زمین اُتے بادشاہی کرن دا اختیار نئیں دے دِتا۔ (عبرانیوں 10:12، 13) ہنُ یسوع مسیح اسمان تے بادشاہی کر رہے نیں تے اوہناں دے شاگرد ایہہ خوشخبری پوری دُنیا وچ پھیلا رہے نیں۔—دانیایل 7:13، 14؛ متی 24:14 نوں پڑھو۔
اوہ وقت دور نئیں جدوں بادشاہ یسوع مسیح اپنا اختیار استمال کر کے دُکھ تکلیفاں نوں تے دُکھ دین والے لوکاں نوں ختم کر دین گے۔ یسوع مسیح اُتے ایمان رکھن والے تے اوہناں دا حکم منن والے سارے لوک زمین تے فردوس وچ ہمیشاں دی زندگی پاؤن گے۔—زبور 37:9-11 نوں پڑھو۔