سبق 5
زمین لئی خدا دا مقصد کیہہ اے؟
1. خدا نے زمین کیوں بنائی؟
یہوواہ خدا نے زمین انساناں دے رہن لئی بنائی اے۔ ایس لئی خدا نے پہلے جوڑے آدم تے حوا نوں اسمان تے رہن لئی نئیں بنایا سی کیونکہ اوہ پہلاں ای اسمان تے رہن لئی فرشتے بنا چُکیا سی۔ (ایوب 38:4، 7) خدا نے آدم نوں بنا کے فردوس یعنی عدن دے باغ وچ رکھیا سی۔ (پیدایش 2:15-17) یہوواہ خدا دا مقصد سی کہ آدم تے اوہدی ہون والی اولاد ہمیشاں تک زمین تے خوشحال زندگی گزارن۔—زبور 37:29؛ 115:16 نوں پڑھو۔
شروع وچ زمین دا تھوڑا جیہا حصہ یعنی عدن دا باغ ای فردوس سی۔ ایس لئی خدا چاہندا سی کہ آدم تے حوا اپنی اولاد نال زمین نوں بھرن، ایہدی دیکھ بھال کرن تے آخرکار پوری زمین نوں فردوس بنا دین۔ (پیدایش 1:28) پاک کلام وچ دسیا گیا اے کہ زمین کدی وی تباہ نئیں ہووے گی سگوں انسان ایہدے تے ہمیشاں وَسدے رہن گے۔—زبور 104:5 نوں پڑھو۔
ویڈیو ”خدا نے زمین کیوں بنائی؟“ ویکھو۔
2. زمین ہنُ فردوس کیوں نئیں اے؟
آدم تے حوا نے خدا دا کہنا نئیں منیا، ایس لئی یہوواہ خدا نے اوہناں نوں باغ وچوں کڈھ دِتا۔ ایس طرحاں اوہ فردوس گنوا بیٹھے تے کوئی وی انسان اَج تک ایہنوں دُبارہ نئیں بنا سکیا۔ پاک کلام دسدا اے کہ زمین بُرے لوکاں دے حوالے کر دِتی گئی اے۔—ایوب 9:24؛ پیدایش 3:23، 24 نوں پڑھو۔
کیہہ ایہدا مطلب اے کہ یہوواہ خدا انساناں لئی اپنا مقصد بُھل گیا اے؟ بالکل نئیں! اوہ قادرِ مطلق خدا اے تے اپنے مقصد وچ کدی ناکام نئیں ہو سکدا۔ (یسعیاہ 45:18) انساناں لئی اوہدا مقصد پورا ہو کے رہوے گا۔—زبور 37:11، 34 نوں پڑھو۔
3. ایہہ زمین دُبارہ فردوس کیویں بنے گی؟
خدا دے چُنے ہوئے بادشاہ یسوع مسیح اپنی بادشاہی دے دوران پوری زمین نوں دُبارہ فردوس بنا دین گے۔ یسوع مسیح، فرشتیاں نال مِل کے خدا دے دُشمناں دے خلاف جنگ کرن گے۔ پاک کلام وچ مکاشفہ 20:1-3؛ 21:3، 4 نوں پڑھو۔
ایس جنگ نوں ہرمجدون کہیا گیا اے۔ بُرے لوکاں دا صفایا کرن توں بعد یسوع مسیح اِک ہزار سال لئی شیطان نوں قید کر دین گے۔ پر خدا دے لوکاں نوں ایس لڑائی وچ کوئی نقصان نئیں پہنچے گا کیونکہ یسوع مسیح اوہناں دی رہنمائی تے حفاظت کرن گے۔ ایہہ وفادار لوک زمین تے فردوس وچ ہمیشاں تک رہن گے۔—4. دُکھ تکلیفاں توں چھٹکارہ کدوں ملے گا؟
کئی لوک پچھدے نیں کہ خدا زمین توں بُرائی کدوں ختم کرے گا؟ یسوع مسیح نے اِک نشانی دِتی سی جدے توں لوکاں نوں پتہ چلنا سی کہ بُرائی دا خاتمہ نزدیک اے۔ دُنیا دیاں خراب حالتاں توں ظاہر ہوندا اے کہ ایہہ نشانی اَج پوری ہو رہی اے۔ ایہناں حالتاں توں پتہ چلدا اے کہ اَسی اخیر زمانے وچ رہ رہے آں جیس وجہ توں انساناں دا جینا مشکل ہو گیا اے۔—متی 24:3، 7-14، 21، 22 نوں پڑھو۔
یسوع مسیح ہزار سال تک اسمان توں زمین تے حکومت کرن گے تے ایس عرصے دے دوران اوہ دُکھ تکلیفاں دُور کر دین گے۔ (یسعیاہ 9:6، 7؛ 11:9) بادشاہ دے علاوہ یسوع مسیح سردار کاہن وی نیں۔ ایس حیثیت نال اوہ خدا نوں پیار کرن والے لوکاں دے گناہ معاف کرن گے۔ ایس طرحاں یسوع مسیح دے ذریعے خدا بیماری، بڑھاپے تے موت دا نام و نشان مٹا دے گا۔—یسعیاہ 25:8؛ 33:24 نوں پڑھو۔
5. فردوس وچ کون رہن گے؟
صرف خدا دا کہنا منن والے لوک ای فردوس وچ رہن گے۔ (1-یوحنا 2:17) یسوع مسیح نے اپنے شاگرداں نوں گھلیا کہ اوہ حلیم لوکاں نوں لبھن تے اوہناں نوں خدا دیاں راہواں تے چلنا سکھاؤن۔ اَج یہوواہ خدا لکھاں لوکاں نوں تربیت دے رہیا اے تاکہ اوہ زمین تے ہمیشاں دی زندگی پاؤن دے لائق بنن۔ (صفنیاہ 2:3) یہوواہ دے گواہواں دیاں عبادتاں تے لوک سکھ رہے نیں کہ اوہ چنگے میاں بیوی تے ماں پیو کیویں بن سکدے نیں۔ ایہناں عبادتاں وچ بچے تے ماں پیو مل کے ایہہ وی سکھدے نیں کہ پاک کلام دی خوشخبری اوہناں دی زندگی کیویں سنوار سکدی اے۔—میکاہ 4:1-4 نوں پڑھو۔