یوحنا دی اِنجیل 1:1-51
1 شروع چ کلام سی تے کلام خدا دے نال سی تے کلام اِک خدا* سی۔
2 اوہ شروع چ خدا دے نال سی۔
3 ساریاں چیزاں اوہدے ذریعے بنائیاں گئیاں تے کوئی وی ایہو جہی چیز نئیں جیہڑی اوہدے بغیر بنائی گئی ہووے۔
4 زندگی اوہدے ذریعے آئی تے ایہہ زندگی انساناں لئی چانن سی۔
5 ایہہ چانن نھیرے چ چمک رہیا اے تے نھیرا ایہنوں ختم نئیں کر سکیا۔
6 اِک آدمی آیا جنہوں خدا نے گھلیا سی۔اوہدا ناں یوحنا سی۔
7 اوہ چانن بارے گواہی دین لئی آیا تاکہ اوہدے ذریعے ہر طرحاں دے لوک ایمان لیا سکن۔
8 اوہ آپ تے اوہ چانن نئیں سی، پر اوس چانن بارے گواہی دین لئی آیا سی۔
9 اصلی چانن جیہڑا ہر طرحاں دے لوکاں نُوں چانن دیندا اے، دُنیا چ آن والا سی۔
10 کلام دُنیا چ سی تے دُنیا اوہدے ذریعے بنائی گئی۔ پر دُنیا نے اوہنوں نہ پچھانیا۔
11 اوہ اپنے گھر آیا۔ پر اوہدے اپنیاں نے وی اوہنوں قبول نہ کیتا۔
12 پر جیہڑے لوکاں نے اوہنوں قبول کیتا، اوہنے اوہناں نُوں خدا دے بچے بنن دا حق دِتا کیونکہ اوہ اوہدے* ناں تے ایمان لیائے۔
13 اوہناں دی پیدائش خونی رشتے یاں جسم دی خواہش یاں انساناں دی مرضی نال نئیں ہوئی سگوں خدا دی مرضی نال ہوئی۔
14 کلام انسان بن کے آیا تے ساڈے وچ رہیا تے اَسی اوہدی شان ویکھی، ایہو جہی شان جیہڑی اِک باپ وَلّوں اپنے اکلوتے پُتر* نُوں مِلدی اے۔ اوہدے تے خدا دی رحمت سی تے اوہ سچائی نال بھریا ہویا سی۔
15 (یوحنا نے اوہدے بارے گواہی دِتی تے ایہہ اعلان کیتا: ”ایہہ اوہی آدمی اے جدے بارے مَیں کہیا سی: ”جیہڑا میرے پچھے آ رہیا سی، اوہ میرے توں اَگے نکل گیا اے کیونکہ اوہ میرے توں پہلاں موجود سی۔““)
16 اوہ خدا دی عظیم رحمت نال بھریا ہویا اے۔ ایس لئی اوہنے سانوں بوہت زیادہ عظیم رحمت بخشی۔
17 شریعت تے موسیٰ دے ذریعے دِتی گئی۔ پر عظیم رحمت تے سچائی یسوع مسیح دے ذریعے ظاہر ہوئی۔
18 خدا نُوں کدی کسے انسان نے نئیں ویکھیا۔ پر اکلوتے پُتر نے سمجھایا کہ خدا کون اے کیونکہ اوہ خدا ورگا اے تے اوہدے سب توں نیڑے وے۔*
19 ایہہ اوہ گواہی اے جیہڑی یوحنا نے اوس ویلے دِتی جدوں یہودیاں نے یروشلیم توں کاہناں تے لاویاں نُوں اوہدے کول گھل کے پچھیا: ”تُوں کون ایں؟“
20 اوہنے اوہناں نُوں جواب دین توں اِنکار نہ کیتا سگوں صاف صاف کہیا: ”مَیں مسیح نئیں آں۔“
21 فیر اوہناں نے پچھیا: ”تے فیر کیہہ تُوں ایلیاہ ایں؟“ اوہنے کہیا: ”نئیں۔“ اوہناں نے فیر پچھیا: ”کیہہ تُوں اوہ نبی ایں جدے آن بارے پیشینگوئی کیتی گئی سی؟“ اوہنے جواب دِتا:”نئیں۔“
22 فیر اوہناں نے پچھیا: ”تُوں کون ایں؟ سانوں دَس تاکہ اَسی وی جا کے اوہناں نُوں دَس سکئے جنہاں نے سانوں گھلیا اے۔ تُوں اپنے بارے کیہہ کہنا ایں؟“
23 یوحنا نے جواب دِتا: ”مَیں اوہ بندہ واں جدے بارے یسعیاہ نبی نے کہیا سی کہ ویرانے چ کوئی اُچی آواز چ کہہ رہیا اے: ”یہوواہ دی راہ نُوں پدھرا کرو۔““
24 اوہناں کاہناں تے لاویاں نُوں فریسیاں نے گھلیا سی۔
25 اوہناں نے اوہنوں پچھیا: ”جے تُوں مسیح یاں ایلیاہ یاں اوہ نبی نئیں ایں جدے آن بارے پیشینگوئی کیتی گئی سی تے فیر تُوں لوکاں نُوں بپتسمہ کیوں دینا ایں؟“
26 یوحنا نے اوہناں نُوں جواب دِتا: ”مَیں تے پانی نال بپتسمہ دینا واں۔ پر تواڈے وچ اِک ایہو جیہا آدمی اے جنہوں تُسی نئیں جان دے۔
27 اوہ میرے بعد آ رہیا اے۔ مَیں تے اوہدی جُتی دے تسمے کھولن دے لائق وی نئیں۔“
28 ایہہ ساریاں گلاں بیتعنیاہ دے پِنڈ چ ہوئیاں۔ ایہہ پِنڈ دریائےیردن دے پار سی جِتھے یوحنا بپتسمہ دیندا سی۔
29 اگلے دن جدوں یوحنا نے یسوع نُوں اپنے وَل آندیاں ویکھیا تے اوہنے کہیا: ”اوہ ویکھو، خدا دا میمنا جیہڑا دُنیا دے گُناہ دُور لے جاندا اے۔
30 ایہہ اوہی اے جدے بارے مَیں کہیا سی: ”جیہڑا میرے پچھے آ رہیا سی، اوہ میرے توں اَگے نکل گیا اے کیونکہ اوہ میرے توں پہلاں موجود سی۔“
31 مَیں وی اوہنوں نئیں جاننا ساں۔ پر مَیں پانی نال بپتسمہ ایس لئی دینا واں تاکہ اوہ اِسرائیل تے ظاہر ہووے۔“
32 یوحنا نے ایہہ گواہی وی دِتی: ”مَیں ویکھیا کہ پاک روح کبوتر دی شکل چ اسمان توں اُتری تے اوہدے اُتے ٹھہر گئی۔
33 مَیں وی اوہنوں نئیں جاننا ساں۔ پر جنہے مینوں پانی نال بپتسمہ دین لئی گھلیا، اوہنے مینوں کہیا: ”جیس بندے تے تُوں پاک روح نُوں اُتردے تے ٹھہردے ویکھیں گا، اوہی پاک روح نال بپتسمہ دین والا ہوئے گا۔“
34 مَیں اپنی اَکھیں اِنج ہوندیاں ویکھیا تے گواہی دِتی کہ اوہی خدا دا پُتر اے۔“
35 اگلے دن یوحنا فیر اپنے دو شاگرداں نال کھلوتا ہویا سی
36 تے جدوں اوہنے یسوع نُوں لنگھدیاں ویکھیا تے اوہنے کہیا: ”اوہ ویکھو، خدا دا میمنا!“
37 ایہہ سُن کے دونویں شاگرد یسوع دے پچھے پچھے ٹُر پئے۔
38 جدوں یسوع نے مُڑ کے اوہناں نُوں اپنے پچھے آندیاں ویکھیا تے اوہناں نُوں پچھیا: ”تُسی کیہہ چاہندے او؟“ اوہناں نے کہیا: ”ربّی، تُوں کتھے ٹھہریا ہویا ایں؟“ (ربّی دا مطلب اے: ”اُستاد۔“)
39 یسوع نے اوہناں نُوں کہیا: ”تُسی آپ ای آ کے ویکھ لوو۔“ ایس لئی اوہ اوہدے نال گئے تے ویکھیا کہ اوہ کتھے ٹھہریا ہویا اے۔ اوہدوں دوپہر دے کوئی 4 وجے* ہوئے سن تے اوس دن اوہ دونویں اوہدے نال ای رہے۔
40 جیہڑے دو شاگرد یوحنا دی گل سُن کے یسوع دے پچھے گئے سن، اوہناں وچوں اِک شمعون پطرس دا بھرا اندریاس سی۔
41 اندریاس نے جاکے سب توں پہلاں اپنے بھرا شمعون نُوں لبھیا تے کہیا: ”سانوں مسیح مِل گیا اے۔“ (مسیح دا مطلب اے: ”مسح کیتا ہویا۔“*)
42 فیر اوہ اوہنوں یسوع کول لے گیا۔ یسوع نے اوہنوں ویکھ کے کہیا: ”تُوں یوحنا دا پُتر شمعون ایں۔ ہُن توں تیرا ناں کیفا ہوئے گا۔“ (کیفا نُوں یونانی چ پطرس کہندے نیں۔)*
43 اگلے دن یسوع گلیل جانا چاہندا سی۔ جدوں اوہنوں فِلپّس ملیا تے اوہنے اوہنوں کہیا: ”میرا شاگرد بن جا۔“
44 فِلپّس بیتصیدا شہر توں سی۔ اندریاس تے پطرس وی اوسے شہر دے سن۔
45 جدوں فِلپّس نتنایل نُوں ملیا تے اوہنے اوہنوں کہیا: ”سانوں اوہ آدمی مِل گیا اے جدے بارے موسیٰ دی شریعت تے نبیاں دِیاں کتاباں چ لکھیا ہویا اے۔ اوہدا ناں یسوع اے۔ اوہ یوسف دا پُتر اے تے ناصرت توں اے۔“
46 پر نتنایل نے اوہنوں کہیا: ”ناصرت توں؟ ایہہ کیویں ہوسکدا اے؟“* فِلپّس نے اوہنوں کہیا: ”تُوں آپ آ کے ویکھ لے۔“
47 یسوع نے نتنایل نُوں اپنے وَل آندیاں ویکھ کے کہیا: ”ویکھو! اِک سچا اِسرائیلی جدے چ کوئی کھوٹ نئیں اے۔“
48 نتنایل نے اوہنوں کہیا: ”تُوں مینوں کیویں جاننا ایں؟“ یسوع نے اوہنوں کہیا: ”ایس توں پہلاں کہ فِلپّس نے تینوں بلایا، مَیں تینوں اِنجیر دے درخت تھلے ویکھ لیا سی۔“
49 نتنایل نے کہیا: ”اُستاد* تُوں واقعی خدا دا پُتر ایں تے اِسرائیل دا بادشاہ ایں۔“
50 یسوع نے اوہنوں کہیا: ”کیہہ تُوں میرے تے ایس لئی ایمان لیایا ایں کیونکہ مَیں تینوں دَسیا اے کہ مَیں تینوں اِنجیر دے درخت تھلے ویکھ لیا سی؟ تُوں ایس توں وی وڈے وڈے کم ویکھیں گا۔“
51 ایہدے بعد یسوع نے کہیا: ”مَیں توانوں سچ کہنا واں کہ تُسی اسمان نُوں کُھلیا تے خدا دے فرشتیاں نُوں انسان دے بیٹے* کول تھلے آندیاں تے واپس اُتے جاندیاں ویکھو گے۔“
فٹ نوٹ
^ یاں، ”خدا ورگا سی۔“ ایس باب چ لفظ کلام یسوع دے اِک لقب دے طور تے استمال ہویا اے۔
^ یاں، ”کلام“ یعنی یسوع دے ناں۔
^ یاں، ”اوہ اِکو پُتر جنہوں خدا نے آپ بنایا سی۔“
^ یونانی چ: ”اوہدے سینے دے نال اے۔“
^ یونانی چ: ”دسواں گھنٹہ۔“
^ ”لفظاں دی وضاحت“ نُوں ویکھو۔
^ کیفا یاں پطرس دا مطلب اے: چٹان یاں پتھر۔
^ یونانی چ: ”بھلا ناصرت چوں وی کوئی چنگی چیز نکل سکدی اے؟“
^ یونانی چ: ”ربّی۔“
^ ”لفظاں دی وضاحت“ نُوں ویکھو۔
