خدا دی بادشاہی اسمان تے اِک حکومت اے۔‏ خدا ایس حکومت دے ذریعے زمین دیاں ساریاں حکومتاں نوں ختم کرے گا تاکہ اسمان دے نال نال زمین تے وی اوہدی مرضی پوری ہووے۔‏ ایہہ واقعی بوہت وڈی خوشخبری اے کیونکہ انساناں نوں اِک چنگی حکومت دی سخت ضرورت اے۔‏ خدا دی بادشاہی وچ زمین تے سارے لوک مِل جُل کے رہن گے۔‏​—‏دانی‌ایل 2:‏44؛‏ متی 6:‏9،‏ 10؛‏ 24:‏14 نوں پڑھو۔‏

ہر بادشاہی دا اِک بادشاہ ہوندا اے تے یہوواہ خدا نے یسوع مسیح نوں اپنی بادشاہی دا بادشاہ چُنیا اے۔‏​—‏مکاشفہ 11:‏15 نوں پڑھو۔‏

ویڈیو ‏”‏خدا دی بادشاہی کیہہ اے؟‏“‏ ویکھو۔‏

یسوع مسیح سب توں چنگے بادشاہ نیں کیونکہ اوہ رحم دل نیں تے ہمیشاں صحی کم کردے نیں۔‏ (‏متی 11:‏28-‏30‏)‏ اوہ اسمان توں پوری زمین تے حکومت کرن گے،‏ ایس لئی ذرا سوچو کہ اوہناں کول لوکاں دی مدد کرن لئی کِنّی طاقت اے۔‏ مُردیاں وچوں جی اُٹھن توں بعد یسوع مسیح اسمان تے واپس چلے گئے۔‏ اوتھے اوہناں نے یہوواہ خدا دے سجے ہتھ بیٹھ کے کجھ عرصے لئی انتظار کیتا۔‏ (‏عبرانیوں 10:‏12،‏ 13‏)‏ فیر وقت آؤن تے خدا نے اوہناں نوں حکومت کرن دا اختیار سونپیا۔‏​—‏دانی‌ایل 7:‏13،‏ 14 نوں پڑھو۔‏

خدا نے کجھ انساناں نوں یسوع مسیح نال اسمان تے حکومت کرن لئی چُنیا اے۔‏ پاک کلام وچ ایہناں نوں مُقدس لوک کہیا گیا اے۔‏ (‏دانی‌ایل 7:‏27‏)‏ ایس گروہ وچ سب توں پہلاں یسوع  دے وفادار رسولاں نوں شامل کیتا گیا۔‏ اوہدوں توں ای یہوواہ خدا وفادار آدمیاں تے عورتاں نوں مُقدس لوکاں دے طور تے چُن رہیا اے۔‏ ایہناں نوں وی یسوع مسیح وانگوں اسمانی بدن وچ زندہ کیتا جاندا اے۔‏​—‏یوحنا 14:‏1-‏3؛‏ 1-‏کُرنتھیوں 15:‏42-‏44 نوں پڑھو۔‏

کِنّے لوک اسمان تے جان گے؟‏ یسوع مسیح نے اوہناں نوں چھوٹا گلہ کہیا سی۔‏ (‏لُوقا 12:‏32‏)‏ اوہناں دی گنتی اِک لکھ چوالی ہزار اے تے اوہ یسوع مسیح نال مِل کے اسمان توں زمین تے حکومت کرن گے۔‏​—‏مکاشفہ 14:‏1 نوں پڑھو۔‏

خدا دی بادشاہی نے 1914 وچ اسمان تے حکمرانی شروع کیتی۔‏ * بادشاہ بنن توں بعد یسوع مسیح نے سب توں پہلاں شیطان تے اوہدے بُرے فرشتیاں نوں زمین تے سُٹ دِتا۔‏ ایس لئی شیطان بوہت غصے وچ اے تے زمین اُتے مصیبتاں دے پہاڑ ڈھا رہیا اے۔‏ (‏مکاشفہ 12:‏7-‏10،‏ 12‏)‏ اوہدوں توں انساناں دیاں تکلیفاں بوہت ودھ گئیاں نیں۔‏ ساڈے زمانے وچ جنگاں،‏ کال،‏ بیماریاں تے بھوچال ایس گل دا نشان نیں کہ خدا دی بادشاہی بوہت جلد زمین تے حکومت شروع کرن والی اے۔‏​—‏لُوقا 21:‏7،‏ 10،‏ 11،‏ 31 نوں پڑھو۔‏

اَج دُنیا بھر وچ خوشخبری دی منادی کیتی جا رہی اے۔‏ ایس کم راہیں خدا دی بادشاہی ساریاں قوماں وچوں اِک وڈی بِھیڑ نوں جمع کر کے اِک مُٹھ کر رہی اے۔‏ لکھاں حلیم لوک بادشاہ یسوع مسیح دی رعایا بن رہے نیں۔‏ جدوں خدا دی بادشاہی ایس دُنیا دے بُرے نظام نوں تباہ کرے گی تے خدا ایہناں لوکاں دی حفاظت کرے گا۔‏ ایس لئی خدا دی بادشاہی وچ برکتاں پاؤن لئی ضروری اے کہ اَسی یسوع مسیح دے حکماں نوں سکھ کے ایہناں تے عمل کرئیے۔‏​—‏مکاشفہ 7:‏9،‏ 14،‏ 16،‏ 17 نوں پڑھو۔‏

ایہہ بادشاہی اِک ہزار سال دے دوران انساناں لئی خدا دا مقصد پورا کرے گی تے پوری زمین نوں فردوس بنا دوے گی۔‏ ایہدے بعد یسوع مسیح بادشاہی دی واگ ڈور یہوواہ خدا دے حوالے کر دین گے۔‏ (‏1-‏کُرنتھیوں 15:‏24-‏26‏)‏ ایہہ خوشخبری جان کے تُسی خدا دی بادشاہی بارے کِنہوں دسنا چاہو گے؟‏​—‏زبور 37:‏10،‏ 11،‏ 29 نوں پڑھو۔‏