اوہ عورتاں جنہاں دا پاک کلام چ ذکر اے—‏اَسی اوہناں توں کیہہ سکھنے آں؟‏

چلاؤ

پاک‌کلام دا جواب

بائبل چ بوہت ساریاں عورتاں دا ذکر کیتا گیا اے جنہاں دی زندگی تے غور کرن نال اَسی بوہت کجھ سکھ سکنے آں۔ (‏رومیوں 15:‏4؛‏ 2-‏تیمُتھیُس 3:‏16، 17‏)‏ ایس مضمون چ ایہناں وچوں کجھ عورتاں دی زندگی تے گل کیتی جائے گی جنہاں وچوں زیادہ‌تر نے ساڈے لئی چنگی مثال قائم کیتی جد کہ کجھ نے بھیڑی مثال قائم کیتی۔—‏1-‏کُرنتھیوں 10:‏11؛‏ عبرانیوں 6:‏12‏۔‏

آستر

آستر کون سی؟‏ اوہ اِک یہودی عورت سی جنہوں فارس دے بادشاہ ارتخششتا نے اپنی ملکہ بنان لئی چنیا سی۔‏

اوہنے کیہہ کیتا؟‏ اوہنے اپنی قوم نُوں مٹنِ توں بچا لیا۔ اوہنوں پتہ چلیا کہ بادشاہ نے ایہہ حکم دِتا اے کہ فلاں دن تے فارس دی سلطنت چ رہن والے سارے یہودیاں نُوں مار دِتا جائے۔اصل چ یہودیاں دے خلاف ایہہ سازش ہامان نے کیتی سی جیہڑا وزیرِاعظم سی۔ (‏آستر 3:‏13-‏15؛‏ 4:‏1،‏ 5‏)‏ آستر نے ایس سازش توں پردہ چُکن لئی اپنے اِک رشتے‌دار مردکی کولوں مدد لئی تے اپنی جان نُوں خطرے چ پا کے اپنے شوہر یعنی بادشاہ ارتخششتا نُوں ایس سازش بارے دَسیا۔ (‏آستر 4:‏10-‏16؛‏ 7:‏1-‏10‏)‏ فیر بادشاہ نے آستر تے مردکی نُوں اِک ہور حکم جاری کرن لئی کہیا جدے چ یہودیاں نُوں ایس گل دی اجازت دِتی گئی کہ اوہ اپنی جان بچان لئی لڑن۔ یہودیاں نے بڑی دلیری نال اپنے دُشمناں دا مقابلہ کر کے اوہناں نُوں ہرا دِتا۔—‏آستر 8:‏5-‏11؛‏ 9:‏16، 17‏۔‏

اَسی آستر توں کیہہ سکھنے آں؟‏ آستر نے دلیری، خاکساری تے سمجھ‌داری دی بڑی ودھیا مثال قائم کیتی۔ (‏زبور 31:‏24؛‏ فِلپّیوں 2:‏3‏)‏ بھانویں کہ اوہ بوہت سوہنی سی نالے ملکہ وی سی پر فیر وی اوہنے خاکساری نال دُوجیاں کولوں مشورہ تے مدد لئی۔ ایہدے علاوہ جدوں یہودیاں دی جان خطرے چ سی تے اوہنے بڑی سمجھ‌داری تے احترام نال اپنے شوہر نال گل کیتی تے ایہہ وی دَسیا کہ اوہ وی یہودی قوم توں وے۔‏

◂ آستر بارے ہور جانن لئی اُردو زبان چ ایہہ مضمون پڑھو:‏ ‏”‏اُنہوں نے خدا کے بندوں کے دِفاع کی خاطر قدم اُٹھایا‏“‏ تے ‏”‏اُنہوں نے سمجھ‌داری،‏ دلیری اور بے‌غرضی کا مظاہرہ کِیا۔‏‏“‏

ابیجیل

ابیجیل کون سی؟‏ اوہ نابال دی بیوی سی جیہڑا بڑا امیر تے بڑا بدلحاظ بندہ سی جد کہ ابیجیل بڑی ای‌سمجھ‌دار تے خاکسار سی۔ اوہ صرف سوہنی ای نئیں سی سگوں اوہدے چ اوہ خوبیاں وی سن جیہڑیاں خدا نُوں پسند نیں۔—‏1-‏سموئیل 25:‏3‏۔‏

اوہنے کیہہ کیتا؟‏ اوہنے اپنے گھرانے نُوں آن والی تباہی توں بچان لئی سمجھ‌داری نال کم لیا۔ اوہ تے نابال اِک ایہو جہے علاقے چ رہندے سن جتھے اِسرائیل دا اگلا بادشاہ داؤد اپنی جان بچان لئی چھپیاُ ہویا سی۔ جدوں داؤد تے اوہدے ساتھی اوتھے سن تے اوہناں نے نابال دی بھیڈاں دا خیال رکھیا کہ کوئی اوہناں نُوں چوری نہ کر لوَے ۔ فیر جدوں داؤد نُوں کھان پین دِیاں شیواں دی لوڑ پئی تے اوہنے اپنے کجھ بندے نابال کولوں اوہ شیواں منگن لئی بھیجے۔ پر نابال نے اوہناں دی بڑی بے‌عزتی کیتی تے شیواں دین توں اِنکار کر دِتا۔ ایس وجہ توں داؤد نُوں ایناں غصہ چڑھیا کہ اوہ تے اوہدے ساتھی، نابال تے اوہدے خاندان دے سارے بندیاں نُوں جانوں مارن ٹُر پئے۔—‏1-‏سموئیل 25:‏10-‏12،‏ 22‏۔‏

فیر جدوں ابیجیل نُوں پتہ چلیا کہ اوہدے شوہر نے کیہہ کیتا اے تے اوہنے فوراً قدم چُکیا۔اوہنے اپنے نوکراں دے ہتھ داؤد تے اوہدے ساتھیاں لئی کھان پین دِیاں شیواں گھلیاں تے نالے آپ وی داؤد کولوں معافی منگن گئی۔ (‏1-‏سموئیل 25:‏14-‏19،‏ 24-‏31‏)‏ پر جدوں داؤد نے اوہ شیواں ویکھیاں تے ایہدے توں اوہنوں اندازہ ہویا کہ ابیجیل کِنّی خاکسار تے کُھلے دل والی عورت اے۔ اوہنے اوہدے مشورے تے عمل وی کیتا جدے توں اوہ ایہہ سمجھ گیا کہ خدا نے ابیجیل دے ذریعے اوہنوں خون خرابہ کرن توں روک لیا اے۔ (‏1-‏سموئیل 25:‏32، 33‏)‏ ایہدے کجھ عرصے بعد نابال مر گیا تے داؤد نے ابیجیل نال ویاہ کر لیا۔—‏1-‏سموئیل 25:‏37-‏41‏۔‏

اَسی ابیجیل توں کیہہ سکھنے آں؟‏بھانویں کہ ابیجیل بوہت سوہنی تے امیر سی پر اوہ ایہناں گلاں دی وجہ توں اپنے آپ تے مان نئیں کردی سی۔ اوہ مسئلے نُوں حل کرن لئی اوس غلطی لئی وی معافی منگن نُوں تیار ہو گئی جیہڑی اوہنے کیتی وی نئیں سی۔ اوہنے اِک بوہت ای وڈے مسئلے نُوں بڑی سمجھ داری تے دلیری نال حل کیتا۔‏

◂ ابیجیل بارے ہور جانن لئی اُردو زبان چ ایہہ مضمون پڑھو:‏ ‏”‏اُنہوں نے سمجھ‌داری سے کام لیا۔‏‏“‏

اِیزِبل

ایزبل کون سی؟‏ اوہ اِسرائیلی بادشاہ اخی‌اب دی بیوی سی۔ پر اوہ اِک بُت‌پرست عورت سی تے کنعانیاں دے دیوتا بعل دی پوجا کر دی سی۔‏

اوہنے کیہہ کیتا؟‏ ملکہ اِیزِبل اِک بوہت ای بے‌رحم، دُوجیاں تے حکم چلان والی تے ظالم عورت سی۔ اوہنے نہ صرف بعل دی پوجا کیتی سگوں بدکاری نُوں وی ہوا دِتی نالے سچے خدا یہوواہ دی عبادت کرن والیاں دا ناں نشان مٹان دی وی کوشش کیتی۔—‏1-‏سلاطین 18:‏4،‏ 13؛‏ 19:‏1-‏3‏۔‏

اِیزِبل اپنی خواہشاں نُوں پورا کرن لئی جھوٹھ بولدی سی تے لوکاں نُوں جانو مروا دیندی سی۔ (‏1-‏سلاطین 21:‏8-‏16‏)‏ خدا نے اوہدے بارے پیشین‌گوئی کیتی سی کہ اوہ بڑی بھیڑی موت مرے گی تے اوہنوں دفنایا وی نئیں جائے گا۔—‏1-‏سلاطین 21:‏23؛‏ 2-‏سلاطین 9:‏10،‏ 32-‏37‏۔‏

اَسی ایزبل توں کیہہ سکھنے آں؟‏ اِیزِبل ساڈے لئی اِک بھیڑی مثال اے۔ اوہ اِک بدکار تے بے‌شرم عورت سی ۔ سانوں اوہدے توں عبرت حاصل کرنی چاہی دی اے۔‏

حنّہ

حنّہ کون سی؟‏ اوہ القانہ دی بیوی سی تے سموئیل دی ماں سی جیہڑا بعد چوں بنی‌اِسرائیل دا مشہور نبی بنیا۔—‏1-‏سموئیل 1:‏1، 2،‏ 4-‏7‏۔‏

اوہنے کیہہ کیتا؟‏ حنّہ بے‌اولاد سی تے ایس غم توں تسلی پان لئی اوہ خدا کولوں دُعا کردی سی۔ حنّہ دی اِک سوکن سی جدا ناں فننہ سی۔ فننہ دے بچے سن پر حنّہ اپنی شادی دے کئی سالاں‌بعد وی بے‌اولاد سی۔فننہ اوہنوں طعنے مار دی سی پر حنّہ تسلی پان لئی خدا کولوں دُعا کردی سی۔ اوہنے خدا کولوں ایہہ منت منی کہ جے اوہ اوہنوں اِک پُتر دَوے گا تے اوہ اوہنوں خیمۂ‌اِجتماع چ اوہدی خدمت لئی دے دَوے گی۔ خیمۂ‌اِجتماع اِک ایہو جیہا خیمہ سی جنہوں اوس زمانے چ بنی‌اِسرائیل خدا دی عبادت کرن لئی استمال کردے سن تے اوہ ایہنوں اِک تھاں توں دُوجی تھاں لے کے جا سکدے سن۔—‏1-‏سموئیل 1:‏11‏۔‏

خدا نے اوہدی دُعا دا جواب دِتا تے اوہنوں اِک پُتر دِتا جدا ناں حنّہ تے اوہدے شوہر نے سموئیل رکھیا۔حنہ نے اپنا وعدہ پورا کیتا تے سموئیل نُوں خیمۂ‌اِجتماع چ خدمت کرن لئی دے دِتا جد کہ اوس ویلے سموئیل بوہت چھوٹا سی۔ (‏1-‏سموئیل 1:‏27، 28‏)‏ حنّہ ہر سال سموئیل لئی اِک جبہُ بنا کے کھڑدی سی۔ فیر خدا نے حنّہ نُوں پنج ہور بچے دِتے جنہاں وچوں تِن پُتر تے دو دِھیاں سن۔—‏1-‏سموئیل 2:‏18-‏21‏۔‏

اَسی حنّہ توں کیہہ سکھنے آں؟‏ حنّہ نے دلوں خدا کولوں دُعا کیتی جدے توں اوہنوں اپنی مشکلاں نُوں برداشت کرن دی طاقت ملی۔ اوہنے 1-‏سموئیل 2:‏1-‏10 چ شکرگزاری دی جیہڑی دُعا منگی اوہدے توں ظاہر ہوندا اے کہ اوہ خدا تے کِنّاں مضبوط ایمان رکھدی سی۔‏

◂ حنّہ بارے ہور جانن لئی اُردو زبان چ ایہہ مضمون پڑھو:‏ ‏”‏اُنہوں نے خدا کے حضور اپنے دل کا حال کھول دیا۔‏‏“‏

حوا

حوا کون سی؟‏ حوا اوہ سب توں پہلی عورت سی جنہوں خدا نے بنایا سی تے جدا ذکر بائبل چ باقی عورتاں نالوں سب توں پہلے کیتا گیا اے۔‏

اوہنے کیہہ کیتا؟‏ حوا نے خدا دا حکم توڑ دِتا۔ اپنے شوہر آدم وانگوں اوہ وی اِک بے‌عیب انسان سی جنہوں اپنی مرضی نال فیصلے کرن دی آزادی سی تے جدے چ محبت تے حکمت ورگیاں خوبیاں پیدا کرن دی صلاحیت موجود سی۔ (‏پیدایش 1:‏27‏)‏ حوا جان دی سی کہ خدا نے آدم نُوں اِک ایہو جہے درخت بارے دَسیا اے جدا پھل اوہ دونویں نئیں کھا سکدے تے جے اوہ کھان گے تے اوہ مر جان گے۔ پر شیطان دے دھوکھے چ آ کے حوا ایس گل دا یقین کر بیٹھی کہ اوہ نئیں مرے گی۔ اوہنے ایس گل تے وی یقین کیتا کہ خدا دی گل نہ منن چ اوہدی بھلائی اے۔ ایس لئی اوہنے اوس درخت دا پھل کھا لیا تے اپنے شوہر نُوں وی کھوایا۔—‏پیدایش 3:‏1-‏6؛‏ 1-‏تیمُتھیُس 2:‏14‏۔‏

اَسی حوا توں کیہہ سکھنے آں؟‏ حوا دی مثال توں اَسی ایہہ سکھنے آں کہ جے اَسی اپنی غلط خواہشاں بارے سوچدے رہنے آں تے ایہہ ساڈے لئی بوہت خطرناک ہو سکدا اے۔ حوا خدا دے حکم دے خلاف جا کے اوس چیز دی خواہش کرن لگ پئی جدے تے اوہدا کوئی حق نئیں سی۔—‏پیدایش 3:‏6؛‏ 1-‏یوحنا 2:‏16‏۔‏

دبورہ

دبورہ کون سی؟‏ اوہ اِک نبِیّہ سی جدے ذریعے خدا اپنے لوکاں نُوں دَسدا سی کہ اوہ اوہناں کولوں کیہہ چاہندا اے۔ خدا نے دبورہ نُوں اوہ مسئلے حل کرن لئی وی استمال کیتا جیہڑے اِسرائیلیاں چ کھڑے ہوندے سن۔—‏قضاۃ 4:‏4، 5‏۔‏

اوہنے کیہہ کیتا؟‏ دبورہ نبِیّہ نے دلیری نال خدا دے لوکاں دی حمایت کیتی۔ خدا دی رہنمائی چ اوہنے برق نُوں دَسیا کہ اوہ اپنے دُشمناں یعنی کنعانیاں نال لڑن لئی بنی‌اِسرائیل دی پیشوائی کرے۔ (‏قضاۃ 4:‏6، 7‏)‏ فیر جدوں برق نے دبورہ نُوں اپنے نال آن لئی کہیا تے اوہ ڈر کے پچھے نئیں ہٹی سگوں اوہ اوہدے نال جان لئی تیار ہو گئی۔—‏قضاۃ 4:‏8، 9‏۔‏

فیر جدوں خدا نے بنی‌اِسرائیل نُوں فتح بخشی تے دبورہ تے برق نے اِک گیت گایا جدے کجھ بول دبورہ نے کہے سن۔ ایس گیت چ اوہنے یاعیل تے کجھ ہور دلیر عورتاں دا ذکر کیتا جنہاں نیں کنعانیاں نُوں ہران چ اِک خاص کردار ادا کیتا۔—‏ قضاۃ 5 باب

اَسی دبورہ توں کیہہ سکھنے آں؟‏ دبورہ بڑی دلیر سی تے اوہدے چ دُوجیاں لئی قربانی دین دا جذبہ سی۔ اوہنے دُوجیاں دی حوصلہ‌افزائی کیتی کہ اوہ اِنج دے کم کرن جیہڑے یہوواہ نُوں پسند نیں۔ فیر جدوں دُوجے اِنج کردے سن تے اوہ اوہناں نُوں دل کھول کے شاباش وی دیندی سی۔‏

دلیلہ

دلیلہ کون سی؟‏ دلیلہ اوہ عورت سی جدے نال بنی‌اِسرائیل دے قاضی سمسون نُوں محبت ہو گئی سی۔—‏قضاۃ 16:‏4، 5‏۔‏

اوہنے کیہہ کیتا؟‏ اوہنے اوس رشوت نُوں قبول کیتا جیہڑی فلستیاں نے اوہنوں سمسون نُوں دھوکھا دین لئی دِتی سی۔ خدا بنی‌اِسرائیل نُوں فلستیاں دے ہتھوں چھڈان لئی سمسون نُوں استمال کر رہیا سی۔ فلستیاں نے لکھ کوششاں کیتیاں پر فیر وی اوہ سمسون نُوں اپنے وَس چ نہ کر سکے ایس لئی کہ خدا نے اوہنوں بوہت طاقت دی ہوئی سی۔ (‏قضاۃ 13:‏5‏)‏ ایس لئی فلستی افسراں نے دلیلہ کولوں مدد منگی۔‏

اوہناں نے دلیلہ نُوں رشوت دِتی کہ اوہ سمسون دی طاقت دا راز پتہ کرے تے فیر اوہناں نُوں دَسے۔ دلیلہ نے اوہناں کولوں پیسے لے لئے تے آخر کئی کوششاں بعد سمسون کولوں اوہدی طاقت دا راز باہر کڈھا لیا۔ (‏قضاۃ 16:‏15-‏17‏)‏ فیر اوہنے اوہ راز فلستیاں نُوں دَس دِتا تے فلستیاں نے سمسون نُوں پھڑ کے جیل چ پا دِتا۔—‏قضاۃ 16:‏18-‏21‏۔‏

اَسی دلیلہ توں کیہہ سکھنے آں؟‏ دلیلہ ساڈے لئی اِک بھیڑی مثال اے۔ پیسے دے لالچ چ آ کے اوہ خودغرض ہو گئی تے اوہنے خدا دے بندے نال دغابازی تے بے‌وفائی کیتی۔‏

راحب

راحب کون سی؟‏ اوہ اِک طوائف سی جیہڑی ملک کنعان دے شہر یریحو چ رہندی سی۔ فیر اوہ بعد چ یہوواہ خدا دی عبادت کرن لگ پئی۔‏

اوہنے کیہہ کیتا؟‏ راحب نے دو اِسرائیلی بندیاں نُوں اپنے گھر لُکا‌یا جیہڑے اوہدے شہر دی جاسوسی کرن آئے سن۔ اوہنے ایہہ ایس لئی کیتا کیونکہ اوہنے سُنیا سی کہ یہوواہ خدا نے کنج اپنے بندیاں نُوں مصریاں دی غلامی توں آزاد کرایا سی نالے فیر بعد چوں اموریاں دے حملے توں کیویں بچایا سی۔‏

راحب نے اِسرائیلی جاسوساں دی مدد کیتی تے اوہناں دی مِنت کیتی کہ جدوں اوہ یریحو تے حملہ کرن آن تے اوہ اوہنوں تے اوہدے گھر والیاں نُوں بچا لین۔ اوہناں جاسوساں نے راحب دی گل من لئی۔ پر اوہناں نے اوہدے اَگے کجھ شرطاں وی رکھیاں۔ اِک تے ایہہ سی کہ اوہ کسے نُوں وی اوہناں دے منصوبے بارے نہ دَسے، دُوجی ایہہ کہ اوہ تے اوہدے گھر والے اوس ویلے اوہدے گھر دے اندر ہون جدوں اوہ شہر تے حملہ کرن تے تیجی ایہہ کہ اوہ اپنے گھر دی باری دے باہر لال رنگ دی رَسی لٹکا دَوے جدے نال اوہناں دے گھر دی پچھان ہو سکے۔ راحب نے جاسوساں دی کہی ہوئی اِک اِک گل تے عمل کیتا تے اِنج اوہ تے اوہدا گھرانا بچ گیا۔

فیر راحب نے اِک اِسرائیلی بندے نال ویاہ کر لیا تے اوہنوں ایہہ شرف ملیاِ کہ اوہدے پُتر دی نسل توں بادشاہ داؤد تے فیر یسوع پیدا ہویا۔—‏یشوع 2:‏1-‏24؛‏ 6:‏25؛‏ متی 1:‏5، 6،‏ 16‏۔‏

اَسی راحب توں کیہہ سکھنے آں؟‏ بائبل چ راحب دے بارے چ دَسیا گیا اے کہ اوہنے ایمان دی بڑی ودھیا مثال قائم کیتی۔ (‏عبرانیوں 11:‏30، 31؛‏ یعقوب 2:‏25‏)‏ اوہدے نال جو کجھ ہویا اوہدے توں سانوں پتہ چلدا اے کہ یہوواہ کسے دا طرف‌دار نئیں سگوں اوہ معاف کرن والا خدا اے۔ اوہ اوہناں لوکاں نُوں برکت دیندا اے جیہڑے اوہدے تے بھروسا کردے نیں فیر بھانویں اوہناں دا تعلق کسے وی قوم یاں قبیلے نال ہوئے۔‏

راخل

راخل کون سی؟‏ اوہ لابن دی دھی سی تے یعقوب دی بیوی سی جنہوں اوہ بوہت پیار کردا سی۔‏

اوہنے کیہہ کیتا؟‏ راخل دی شادی یعقوب نال ہوئی سی تے اوہناں دے دو پُتر سن۔ ایہہ دو پُتر بنی‌اِسرائیل دے 12 قبیلیاں دے سرداراں چ شامل سن۔ راخل دی ملاقات یعقوب نال اوس ویلے ہوئی جدوں اوہ اپنے پیو دِیاں بھیڈاں دی دیکھ‌بھال کر رہی سی۔ (‏پیدایش 29:‏9، 10‏)‏ اوہ اپنی وڈی بھین لیاہ توں وی بوہتی سوہنی سی۔—‏پیدایش 29:‏17‏۔‏

یعقوب راخل نال بوہت پیار کردا سی تے اوہدے نال ویاہ کرن لئی اوہ سَت سال تک کم کرن لئی وی تیار ہو گیا سی۔ (‏پیدایش 29:‏18‏)‏ پر لابن نے دھوکھے نال یعقوب دا ویاہ پہلاں اپنی وڈی دھی نال کرا دِتا۔ فیر اوہنے یعقوب نُوں راخل نال ویاہ کرن دی وی اجازت دے دِتی۔—‏پیدایش 29:‏25-‏27‏۔‏

یعقوب لیاہ تے اوہدے بچیاں نالوں بوہتی محبت راخل تے اوہدے بچیاں نال کردا سی۔ (‏پیدایش 37:‏3؛‏ 44:‏20،‏ 27-‏29‏)‏ ایس وجہ توں اوہناں دونواں بھیناں چ دُشمنی ہو گئی۔—‏پیدایش 29:‏30؛‏ 30:‏1،‏ 15‏۔‏

اَسی راخل توں کیہہ سکھنے آں؟‏ راخل نے اپنی گھریلو زندگی چ آن والیاں مشکلاں نُوں ثابت قدمی نال برداشت کیتا تے کدی وی ایہہ امید نئیں چھڈی کہ خدا اوہدیاں دُعاواں سنے گا۔ (‏پیدایش 30:‏22-‏24‏)‏ اوہدی زندگی تے غور کرن نال سانوں ایہہ اندازہ ہوندا اے کہ جدوں اِک مرد یاں اِک عورت اِک توں زیادہ شادیاں کردے نیں تے گھر والیاں نُوں کنیاں مشکلاں دا سامنا کرنا پیندا اے۔راخل نُوں جنہاں مسئلیاں دا سامنا کرنا پیا اوہدے توں اَسی ایہہ ویکھ سکنے آں کہ خدا نے شادی دے حوالے نال جو وی معیار قائم کیتا سی اوہدے چ کِنّی حکمت پائی جاندی اے۔ تے اوہ معیار ایہہ سی کہ اِک آدمی دی صرف اِک بیوی ہوئے۔—‏متی 19:‏4-‏6‏۔‏

رِبقہ

رِبقہ کون سی؟‏ اوہ اِضحاق دی بیوی سی تے یعقوب تے عیسو اوہدے جڑواں پُتر سن۔‏

اوہنے کیہہ کیتا؟‏ رِبقہ نے اوس ویلے وی خدا دی مرضی تے عمل کیتا جدوں اِنج کرنا آسان نئیں سی۔ جدوں اوہ کھوہ چوں پانی کڈھ رہی سی تے اِک بندے نے اوہدے کولوں پین لئی پانی منگیا۔ رِبقہ نے فوراً اوس بندے نُوں پانی دِتا تے اوہنوں کہیا کہ اوہ اوہدے اُونٹھاں نُوں وی پانی پیائے گی۔ (‏پیدایش 24:‏15-‏20‏)‏ اوہ بندہ ابراہام دا نوکر سی تے بڑا لما سفر کر کے آیا سی ایس لئی کہ اوہ اپنے مالک دے پُتر اِضحاق لئی بیوی لبھ سکے۔ (‏پیدایش 24:‏2-‏4‏)‏ ایس کم لئی اوہنے دُعا چ خدا کولوں مدد وی منگی سی۔ جدوں اوس بندے نے ویکھیا کہ رِبقہ کنی محنتی تے مہمان‌نواز اے تے اوہ سمجھ گیا کہ خدا نے اوہدی دُعا دا جواب دے دِتا اے تے اوہ چاہندا اے کہ رِبقہ اِضحاق دی بیوی بنے۔—‏پیدایش 24:‏10-‏14،‏ 21،‏ 27‏۔‏

جدوں رِبقہ نے سُنیا کہ اوہ بندہ کیس مقصد لئی اوہناں دے کول آیا اے تے اوہ اوہدے نال جان لئی راضی ہو گئی تے اِضحاق نال شادی کر لئی۔ (‏پیدایش 24:‏57-‏59‏)‏ فیر اوہدے جڑواں پُتر ہوئے۔ خدا نے رِبقہ نُوں دَسیا کہ اوہدا وڈا پُتر عیسو اوہدے چھوٹے پُتر یعقوب دی خدمت کرے گا۔ (‏پیدایش 25:‏23‏)‏ ایس لئی جدوں اِضحاق نے اپنے وڈے پُتر عیسو نُوں برکت دین دا فیصلہ کیتا تے رِبقہ نے فوراً ایس گل نُوں یقینی بنایا کہ برکت یعقوب نُوں ملے کیونکہ اوہ جان دی سی کہ خدا وی ایہی چاہندا اے۔—‏پیدایش 27:‏1-‏17‏۔‏

اَسی ربقہ توں کیہہ سکھنے آں؟‏ رِبقہ اِک خاکسار، محنتی تے مہمان‌نواز عورت سی۔ ایہناں خوبیاں دی وجہ توں اوہ اِک چنگی ماں تے بیوی بن پائی تے وفاداری نال خدا دی خدمت کر پائی۔‏

رُوت

رُوت کون سی؟‏ اوہ اِک موآبی عورت سی جنہے اپنے ملک تے اپنے دیوتاواں نُوں چھڈ دِتا تے ملک اِسرائیل چ جا کے یہوواہ دی عبادت کرن لگ پئی۔‏

اوہنے کیہہ کیتا؟‏ رُوت نے اپنی سس لئی بوہت محبت وکھائی۔ نعومی اپنے شوہر تے اپنے پُتراں نال اوس ویلے موآب چلی گئی سی جدوں ملک اِسرائیل چ کال پیا سی۔ اوہدے پُتراں نے اوتھے موآبی عورتاں نال ویاہ کر لیا جنہاں دے ناں رُوت تے عرفہ سن۔ فیر بعد چ نعومی دا شوہر تے اوہدے دونویں پُتر وی مر گئے تے اِنج نعومی، رُوت تے عرفہ تینوں بیوہ ہو گئیاں۔‏

نعومی نے اپنے ملک اِسرائیل جان دا فیصلہ کیتا جتھے ہن کال مُک گیا سی۔ رُوت تے عرفہ نے وی اپنی سس نال جان دا فیصلہ کیتا۔ پر نعومی نے اوہناں نُوں کہیا کہ اوہ اپنے رشتے‌داراں کول واپس ٹُر جان۔ فیر عرفہ تے اپنے رشتے‌داراں کول واپس چلی گئی۔ (‏رُوت 1:‏1-‏6،‏ 15‏)‏ پر رُوت اپنی سس نُوں چھڈ کے نئیں گئی۔ اوہ نعومی نال بوہت محبت کردی سی تے اوہدے خدا یہوواہ دی عبادت کرنا چاہندی سی۔—‏رُوت 1:‏16، 17؛‏ 2:‏11‏۔‏

رُوت اپنی سس دی وفادارسی تے بڑی محنتی سی۔ ایس لئی چھیتی ای شہر بیت‌لحم چ اوہدا بڑے چنگے لفظاں چ ذکر ہون لگ پیا۔ بوعز ناں دا اِک امیر زمین‌دار رُوت دِیاں ایہناں خوبیاں توں بوہت متاثر ہویا تے اوہنے دل کھول کے اوہنوں تے اوہدی سس نُوں کھان پین دِیاں شیواں دِتیاں۔ (‏رُوت 2:‏5-‏7،‏ 20‏)‏ فیر بعد چ رُوت دی شادی بوعز نال ہو گئی تے اوہنوں ایہہ شرف ملیا کہ اوہدے پُتر دی نسل چوں بادشاہ داؤد تے یسوع مسیح آئے۔—‏متی 1:‏5، 6،‏ 16‏۔‏

اَسی روت توں کیہہ سکھنے آں؟‏ رُوت اپنی سس تے یہوواہ خدا نال اینی محبت کردی سی کہ اوہ اپنے ملک تے اپنے گھر والیاں نُوں وی چھڈن لئی تیار سی۔ اوہنے مشکل توں مشکل گھڑی چ وی محنت نال کم کیتا تے اوہ اپنی سس تے خدا دی وفادار رہی۔‏

◂ رُوت بارے ہور جانن لئی اُردو زبان چ ایہہ مضمون پڑھو:‏ ‏”‏جہاں تُو جائے مَیں جاؤں گی‏“‏ تے ‏”‏تُو نیک سیرت عورت ہے۔‏‏“‏

سارہ

سارہ کون سی؟‏ اوہ ابراہام دی بیوی تے اِضحاق دی ماں سی۔‏

اوہنے کیہہ کیتا؟‏ سارہ نے شہر اُور دی آرام‌دہ زندگی چھڈی کیونکہ اوہ اوہناں وعدیاں تے پکا ایمان رکھدی سی جیہڑے خدا نے اوہدے شوہر نال کیتے سن۔ خدا نے ابراہام نُوں کہیا کہ اوہ شہر اُور نُوں چھڈ کے ملک کنعان چلا جاوے۔ خدا نے ابراہام نال وعدہ کیتا کہ اوہ اوہنوں برکت دَوے گا تے اوہنوں اِک وڈی قوم بنائے گا۔ (‏پیدایش 12:‏1-‏5‏)‏ اوس ویلے سارہ دی عمر شاید 60 سال توں اُتے سی۔ اوہدوں توں سارہ تے اوہدا شوہر ابراہام اِک تھاں توں دُوجے تھاں تمبو لا کے رہن لگ پئے۔‏

ایس طرحاں زندگی گزارنا خطرے توں خالی نئیں سی فیر وی سارہ نے یہوواہ دِیاں ہدیتاں تے عمل کرن چ ابراہام دا پورا پورا ساتھ دِتا۔ (‏پیدایش 12:‏10،‏ 15‏)‏ بوہت سالاں تک سارہ دی کوئی اولاد نئیں سی جدی وجہ توں اوہ بوہت دُکھی رہندی سی۔ پر خدا نے ابراہام نال وعدہ کیتا سی کہ اوہ اوہدی اولاد نُوں برکت دَوے گا۔ (‏پیدایش 12:‏7؛‏ 13:‏15؛‏ 15:‏18؛‏ 16:‏1، 2،‏ 15‏)‏ فیر خدا نے ابراہام نُوں کہیا کہ سارہ توں اوہدی اولاد ہووے گی۔ سارہ‌نے اوس ویلے اپنے پُتر نُوں جنم دِتا جدوں اوہدی بچے پیدا کرن دی عمر لنگھ گئی سی۔ اوس ویلے اوہ 90 سال دی سی تے اوہدے شوہر دی عمر 100 سال سی۔ (‏پیدایش 17:‏17؛‏ 21:‏2-‏5‏)‏ ابراہام تے سارہ نے اپنے پُتر دا ناں اِضحاق رکھیا۔‏

اَسی سارہ توں کیہہ سکھنے آں؟‏ ایہہ کہ اَسی خدا دے وعدیاں تے پورا بھروسا رکھئیے، اوہناں وعدیاں تے وی جنہاں بارے سانوں لگے کہ ایہناں دا پورا ہونا ممکن نئیں اے۔ (‏عبرانیوں 11:‏11‏)‏ سارہ نے بیویاں لئی بڑی ودھیا مثال قائم کیتی۔ اوہدی مثال توں ظاہر ہوندا اے کہ شادی دے بندھن چ احترام وکھانا بوہت ضروری اے۔—‏1-‏پطرس 3:‏5، 6‏۔‏

◂ سارہ بارے ہور جانن لئی اُردو زبان چ ایہہ مضمون پڑھو:‏ ‏”‏تُو خوب‌صورت عورت ہے۔‏‏“‏

شولمیت

شولمیت کون سی؟‏ اوہ پِنڈ چ رہن والی اِک سوہنی کُڑی سی جدا ذکر غزلُ‌الغزلات دی کتاب چ مِلدا اے۔ بائبل چ اوہدا ناں نئیں دَسیا گیا۔‏

اوہنے کیہہ کیتا؟‏ شولمیت اوس چرواہے دی وفادار رہی جدے نال اوہ بوہت محبت کردی سی۔ (‏غزلُ‌الغزلات1:‏7؛ 2:‏16)‏ شولمیت اینی سوہنی سی کہ سلیمان بادشاہ وی اوہنوں اپنا دل دے بیٹھیا تے اوہنے اوہدا دل جتن دی بڑی کوشش کیتی۔ (‏غزلُ‌الغزلات 7:‏6‏)‏ دُوجیاں نے وی شولمیت نُوں بڑا مجبور کیتا کہ اوہ بادشاہ سلیمان دی محبت نُوں چُنے پر اوہنے اِنج کرن توں اِنکار کر دِتا۔ اوہ غریب چرواہے نال پیار کردی سی تے اوہدی وفادار رہنا چاہندی سی۔—‏غزلُ‌الغزلات 3:‏5؛‏ 7:‏10؛‏ 8:‏6‏۔‏

اَسی شولمیت توں کیہہ سکھنے آں؟‏ شولمیت بوہت سوہنی سی تے لوک وی اوہدے حسن دی بڑی تعریف کردے سن فیر وی اوہ مغرور نئیں ہوئی۔ اوہنے دُوجیاں دے دباؤ چ آ کے یاں پیسے تے شہرت دے لالچ چ آ کے چرواہے نال محبت کرنی نئیں چھڈی۔‏

لُوط دی بیوی

لُوط دی بیوی کون سی؟‏ بائبل چ اوہدا ناں نئیں دَسیا گیا۔ پر ایہدے چ ایہہ دَسیا گیا اے کہ اوہدیاں دو دِھیاں سن تے اوہ اپنے گھرانے نال شہر سدوم چ رہندی سی۔—‏پیدایش 19:‏1،‏ 15‏۔‏

اوہنے کیہہ کیتا؟‏ اوہنے خدا دی گل نئیں منی۔خدا نے فیصلہ کیتا کہ اوہ سدوم تے اوہدے آلے دوالے دے شہراں نُوں تباہ کرے گا کیونکہ اوتھے بُرائی بوہت زیادہ ودھ گئی سی۔ پر محبت دی وجہ توں خدا نے لُوط تے اوہدے گھر والیاں نُوں بچان لئی اپنے دو فرشتیاں نُوں بھیجیا۔—‏پیدایش 18:‏20؛‏ 19:‏1،‏ 12، 13‏۔‏

فرشتیاں نے لُوط تے اوہدے گھر والیاں نُوں کہیا کہ اوہ ایس علاقے چوں نکل جان تے پچھے مُڑ کے نہ ویکھن نئیں تے اوہ مر جان گے۔ (‏پیدایش 19:‏17‏)‏ لُوط دی بیوی نے پچھے مُڑ کے ویکھیا تے اوہ لُون دا بُت بن گئی۔—‏پیدایش 19:‏26‏۔‏

اَسی لُوط دی بیوی توں کیہہ سکھنے آں؟‏ لُوط دی بیوی نال جو کجھ ہویا اوہدے توں پتہ چلدا اے کہ سانوں دولت نال ایناں وی پیار نئیں کرنا چاہی دا کہ اَسی خدا دے حکماں نُوں توڑ دَئیے۔ یسوع مسیح نے لُوط دی بیوی نُوں اِک بھیڑی مثال کہیا۔ اوہنے کہیا کہ لُوط دی بیوی نُوں یاد رکھو۔—‏لُوقا 17:‏32‏۔‏

لیاہ

لیاہ کون سی؟‏ اوہ خدا دے بندے یعقوب دی پہلی بیوی سی۔ اوہدی چھوٹی بھین راخل یعقوب دی دُوجی بیوی سی۔—‏پیدایش 29:‏20-‏29‏۔‏

اوہنے کیہہ کیتا؟‏ لیاہ توں یعقوب دے چھ پُتر ہوئے۔ (‏رُوت 4:‏11‏)‏ یعقوب لیاہ نال نئیں سگوں راخل نال ویاہ کرنا چاہندا سی۔پر لابن نے یعقوب دا ویاہ راخل نال کرن دی بجائے لیاہ نال کرا دِتا۔ جدوں یعقوب نُوں پتہ چلیا کہ لابن نے دھوکھے نال اوہدا ویاہ لیاہ نال کر دِتا اے تے اوہنوں اوہدے تے بوہت غصہ چڑھیا۔ لابن نے اوہنوں جواب دِتا کہ اوہناں چ ایہہ رواج نئیں اے کہ وڈی دھی توں پہلاں چھوٹی دا ویاہ کیتا جائے۔ فیر اِک ہفتے بعد لابن نے یعقوب دی شادی راخل نال کر دِتی۔—‏پیدایش 29:‏26-‏28‏۔‏

یعقوب لیاہ توں بوہتا راخل نال پیار کردا سی۔ (‏پیدایش 29:‏30‏)‏ لیاہ نُوں یعقوب وَلّوں زیادہ محبت تے توجہ نئیں مل رہی سی۔ خدا نے ویکھیا کہ لیاہ دے دل تے کیہہ گزر رہی اے ایس لئی اوہنے اوہنوں چھ پُتر تے اِک دھی دِتی۔—‏ پیدایش 29:‏31‏۔‏

اَسی لیاہ توں کیہہ سکھنے آں؟‏ لیاہ نے خدا تے بھروسا رکھیا تے اوہدے کولوں دُعا کیتی۔ اوہدی گھریلو زندگی چ بوہت سارے مسئلے چل رہے سن پر اوہ ایس گل نُوں نئیں بھلیُ کہ خدا نے کیہڑے طریقیاں نال اوہدی مدد کیتی اے۔ (‏پیدایش 29:‏32-‏35؛‏ 30:‏20‏)‏ اوہنوں جیہڑیاں مشکلاں دا سامنا کرنا پیا اوہناں توں اَسی ایہہ ویکھ سکنے آں کہ جدوں اِک مرد یاں اِک عورت اِک توں زیادہ ویاہ کردا اے تے اوہدے گھر والیاں نُوں کنیاں مشکلاں دا سامنا کرنا پیندا اے۔ خدا نے اوس زمانے چ ایس بندوبست نُوں برداشت کیتا پر شادی دے حوالے نال اوہدا معیار ایہہ ای اے کہ اِک شوہر دی صرف اِک بیوی ہوئے تے اِک بیوی دا صرف اِک شوہر ہوئے۔—‏متی 19:‏4-‏6‏۔‏

مارتھا

مارتھا کون سی؟‏ اوہ لعزر تے مریم دی بھین سی۔ اوہ تینوں بھین بھرا یروشلیم دے نیڑے اِک پِنڈ چ رہندے سن جدا ناں بیت‌عنیاہ سی۔‏

اوہنے کیہہ کیتا؟‏ مارتھا یسوع دی پکی دوست سی۔ پاک کلام چ دَسیا گیا اے کہ یسوع نُوں مارتھا، مریم تے لعزر نال بوہت پیار سی۔ (‏یوحنا 11:‏5‏)‏ مارتھا اِک مہمان‌نواز عورت سی۔ اِک واری جدوں یسوع اوہناں دے گھرگیا تے مریم یسوع دے پیراں چ بیٹھ کے اوہدیاں گلاں سُن رہی سی جد کہ مارتھا یسوع لئی کھان پین دا بندوبست کر رہی سی۔جدوں مارتھا نے ویکھیا کہ مریم اوہدے نال کم چ مدد نئیں کرا رہی تے اوہنے یسوع نُوں اوہدی شکایت کیتی۔ یسوع نے بڑے پیار نال مارتھا دی سوچ نُوں صحی کیتا۔—‏لُوقا 10:‏38-‏42‏۔‏

فیر جدوں لعزر بوہت بیمار ہو گیا تے مارتھا تے اوہدی بھین مریم نے یسوع نُوں پیغام بھیجیا کہ اوہ اوہناں کول آئے کیونکہ اوہناں نُوں یقین سی کہ یسوع اوہناں دے بھرا نُوں ٹھیک کر سکدا اے۔ (‏یوحنا 11:‏3،‏ 21‏)‏ پر لعزر فوت ہو گیا۔ بعد چ جدوں یسوع مارتھا تے اوہدی بھین دے کول آیا تے مارتھا نے یسوع نال ایہو جہیاں گلاں کیتیاں جدے توں پتہ چلدا اے کہ اوہ اوس وعدے تے پکا ایمان رکھدی سی جیہڑا بائبل چ مُردیاں نُوں زندہ کرن بارے کیتا گیا اے۔ ایہدے علاوہ اوہ ایس گل تے وی پکا یقین رکھدی سی کہ یسوع اوہدے بھرا نُوں زندہ کر سکدا اے۔—‏یوحنا 11:‏20-‏27‏۔‏

اَسی مارتھا توں کیہہ سکھنے آں؟‏ مارتھا دُوجیاں دی مہمان‌نوازی کرن چ کوئی کسر نئیں چھڈ دی سی۔ جدوں اوہدی اِصلاح کیتی گئی تے اوہنے اوہنوں خوشی نال قبول کیتا۔ اوہنے کُھل کے اپنے احساسات دَسے تے اپنے ایمان دا اظہار کیتا۔‏

◂ مارتھا بارے ہور جانن لئی اُردو زبان چ ایہہ مضمون پڑھو:‏ ‏”‏مَیں یقین رکھتی ہوں۔‏‏“‏

مریم (‏مارتھا تے لعزر دی بھین )‏

مریم کون سی؟‏ اپنے بھرا لعزر تے بھین مارتھا وانگوں مریم دی وی یسوع نال پکی دوستی سی۔‏

اوہنے کیہہ کیتا؟‏ مریم نے کئی وار وکھایا کہ اوہ خدا دے پُتر یسوع دی دلوں قدر کردی اے۔ اوہنے ایس گل تے ایمان ظاہر کیتا کہ یسوع اوہدے بھرا لعزر نُوں مرن توں بچا سکدا اے۔ مریم اوس ویلے اوتھے ای سی جدوں یسوع نے لعزر نُوں زندہ کیتا۔ مارتھا نُوں اوس ویلے مریم تے غصہ آیا جدوں اوہنے کم کرن چ اوہدی مدد نئیں کیتی سی سگوں یسوع کول بیہہ کے اوہدیاں گلاں سُن رہی سی۔ پر یسوع نے مریم نُوں ایس گل لئی شاباش دِتی کہ اوہنے کسے دُوجے کم نالوں پاک کلام دِیاں سچائیاں سکھن نُوں اہمیت دِتی۔—‏لُوقا 10:‏38-‏42‏۔‏

اِک واری مریم نے دل کھول کے یسوع دی مہمان‌نوازی کیتی۔ اوہ اِک بوہت مہنگا خوشبودار تیل لے کے آئی تے یسوع دے سر تے پیراں تے پان لگ پئی۔ (‏متی 26:‏6، 7‏)‏ اوتھے موجود دُوجے لوک ایس گل تے ناراض ہوئے کہ مریم نے ایناں قیمتی تیل ضائع کر دِتا اے۔ پر یسوع نے مریم دے حق چ بولدے ہوئے کہیا:‏ساری دُنیا وچ جتھے وی خوش‌خبری دی مُنادی کیتی جائے گی اوتھے ایس عورت دی یاد چ ایس کم دا وی ذکر کیتا جائے گا۔—‏متی 24:‏14؛‏ 26:‏8-‏13‏۔‏

اَسی مریم توں کیہہ سکھنے آں؟‏ مریم نے اپنے اندر مضبوط ایمان پیدا کیتا۔ اوہنے خدا دی عبادت نُوں دُوجے کماں توں زیادہ اہمیت دِتی۔ اوہ یسوع دا ایناں احترام کردی سی کہ اوہ اوہدی خاطر اپنی قیمتی چیز وی قربان کرن توں پچھے نئیں ہٹی۔‏

مریم مگدلینی

مریم مگدلینی کون سی؟‏ اوہ یسوع مسیح دی اِک وفادار شاگرد سی۔‏

اوہنے کیہہ کیتا؟‏ مریم مگدلینی اوہناں کئی عورتاں چوں اِک سی جیہڑیاں یسوع تے اوہدے شاگرداں نال خوش‌خبری دی مُنادی کرن لئی دُور دُور جاندیاں سن۔ اوہ دل کھول کے یسوع تے اوہدے شاگرداں دی خدمت کردی سی۔ (‏لُوقا 8:‏1-‏3‏)‏ اوہ زمین تے یسوع دی خدمت دے ختم ہون تک اوہدی پیروی کردی رہی تے اوس ویلے وی یسوع توں دُور نہ ہوئی جدوں یسوع نُوں سُولی دِتی گئی۔ اوہنوں اوہناں لوکاں چ شامل ہون دا شرف ملیا جنہاں نے یسوع نُوں مُردیاں چوں جی اُٹھن توں بعد سب توں پہلاں ویکھیا۔—‏یوحنا 20:‏11-‏18‏۔‏

اَسی مریم مگدلینی توں کیہہ سکھنے آں؟‏ مریم مگدلینی نے دل کھول کے یسوع دی مدد کیتی، مُنادی دے کم چ مدد کیتی تے اوہدی وفادار رہی۔‏

مریم (‏موسیٰ دی بھین)‏

مریم کون سی؟‏ اوہ موسیٰ تے ہارون دی بھین سی۔ اوہ اوہناں عورتاں چ سب توں پہلی عورت سی جدا ذکر بائبل چ اِک نبِیّہ دے طور تے ہویا اے۔

اوہنے کیہہ کیتا؟‏ اِک نبِیّہ دے طور تے اوہ لوکاں نُوں خدا دا پیغام سُناندی سی۔ اوہنوں بنی‌اِسرائیل چ اِک خاص مقام حاصل سی تے اوہنے اوس ویلے اِسرائیلی آدمیاں نال مل کے فتح دا گیت گایا جدوں خدا نے مصری فوج نُوں بحیرۂ‌قلزم چ غرق کر دِتا سی۔—‏خروج 15:‏1،‏ 20، 21‏۔‏

کجھ وقت بعد مریم تے ہارون موسیٰ دے خلاف گلاں کرن لگ پئے۔ ہوسکدا اے کہ اوہ اِنج غرور تے حسد چ آ کے کرن لگ پئے۔ اوہ جو کجھ وی کہہ رہے سن خدا اوہنوں سُن رہیا سی تے اوہنے اوہناں دی سختی نال درستی کیتی۔ (‏گنتی 12:‏1-‏9‏)‏ اوہنے مریم نُوں کوڑھ دی بیماری لا چھڈی کیونکہ شاید اوہ منفی گلاں نُوں ہوا دے رہی سی۔ جدوں موسیٰ نے مریم دی شفا لئی خدا کولوں اِلتجا کیتی تے خدا نے اوہنوں ٹھیک کر دِتا۔ سَت دن سب توں دُور کلّے رہن توں بعد مریم نُوں دُبارہ توں بنی‌اِسرائیل دے وچ رہن دی اجازت مل گئی۔—‏گنتی 12:‏10-‏15‏۔‏

پاک کلام توں پتہ چلدا اے کہ مریم نے درستی نُوں قبول کیتا۔ ایہدے صدیاں بعد خدا نے مریم دے خاص شرف دا ذکر کردے ہوئے بنی‌اِسرائیل نُوں یاد دَوایا:‏ میں تواڈے اَگے اَگے موسیٰ، ہارون تے مریم نُوں گھلیا۔—‏میکاہ 6:‏4‏۔‏

اَسی مریم توں کیہہ سکھنے آں؟‏ مریم نال جو کجھ ہویا، اوہدے توں پتہ چلدا اے کہ خدا اوہناں گلاں نُوں بڑے دھیان نال سُن دا اے جیہڑے اوہدے بندے اِک دُوجے نال یا فیر اِک دُوجے دے بارے کردے نیں۔ اوہدی مثال توں اَسی ایہہ وی سکھنے آں کہ سانوں غرور تے حسد توں بچنا چاہی دا اے کیونکہ ایہہ ایہناں دی وجہ توں دُوجیاں دی نیک‌نامی نُوں داغ لگ سکدا اے۔‏

مریم (‏یسوع دی ماں)‏

مریم کون سی؟‏ اوہ اِک کنواری یہودی کُڑی سی جنہے یسوع نُوں پیدا کیتا سی۔اوہ خدا دے اِک معجزے دے ذریعے حاملہ ہوئی سی۔‏

اوہنے کیہہ کیتا؟‏ مریم نے بڑی خاکساری نال خدا دی مرضی تے عمل کیتا۔ اوہدی منگنی یوسف ناں دے بندے نال ہوئی سی۔ اوہدوں اوہدی منگنی ہوئی ہوئی سی جدوں فرشتہ اوہدے کول آیا تے اوہنے اوہنوں دَسیا کہ اوہ حاملہ ہوئے گی تے اوہدے توں مسیح پیدا ہوئے گا جدا لوک لمے چر توں اِنتظار کر رہے نیں۔ (‏لُوقا 1:‏26-‏33‏)‏ اوہنے خوشی خوشی خدا وَلّوں مِلن والی ایس ذمے‌داری نُوں قبول کیتا۔ یسوع دے پیدا ہون توں بعد مریم تے یوسف دے چار ہور پُتر تے گھٹو گھٹ دو دِھیاں ہوئیاں۔ ایہدا مطلب اے کہ مریم ساری زندگی کنواری نئیں رہی۔ (‏متی 13:‏55، 56‏)‏ خدا نے اوہنوں اِک بوہت وڈا شرف دِتا پر فیر وی اوہنے کدی وی اپنی وڈیائی نئیں کیتی، نہ ای اوس ویلے جدوں یسوع زمین تے سی تے نہ ای مسیحی کلیسیا دے قائم ہون توں بعد۔‏

اَسی مریم توں کیہہ سکھنے آں؟‏ مریم خدا دی وفادار بندی سی تے اوہنے خوشی نال اوس ذمے‌داری نُوں قبول کیتا جنہوں نبھانا آسان نئیں سی۔ اوہ صحیفیاں دا چنگا علم رکھدی سی۔جدوں مریم نے لُوقا 1:‏46-‏55 چ لکھیا گلاں کہیاں تے اوہنے گھٹو گھٹ 20 صحیفیاں دا حوالہ دِتا۔‏

◂ مریم بارے ہور جانن لئی اُردو زبان چ ایہہ مضمون پڑھو:‏ ‏”‏ہم مریم کی مثال سے کیا سیکھ سکتے ہیں؟‏‏“‏

یاعیل

یاعیل کون سی؟‏ اوہ حبر ناں دے اِک آدمی دی بیوی سی جیہڑا اِسرائیلی نئیں سی۔ یاعیل نے بڑی دلیری نال خدا دے بندیاں دا ساتھ دِتا۔‏

اوہنے کیہہ کیتا؟‏ یاعیل نے اوس ویلے فوراً کاروائی کیتی جدوں کنعانی فوج دا سردار سیسرا اوہدے خیمے چ پناہ لین آیا۔ بنی‌اِسرائیل دی فوج نے سیسرا نُوں جنگ چ بڑی بُری طرحاں ہرایا تے ہن اوہ اپنی جان بچان لئی لکنُ دی کوئی تھاں لبھ رہیا سی۔ یاعیل نے سیسرا نُوں کہیا کہ اوہ اوہدے خیمے چ آ کے لکُ جائے تے تھوڑا آرام کر لوَے۔ فیر جدوں سیسرا سوں گیا تے یاعیل نے اوہنوں مار دِتا۔—‏قضاۃ 4:‏17-‏21‏۔‏

یاعیل نے جو کجھ کیتا اوہدے نال اوہ پیشین‌گوئی پوری ہوئی جیہڑی دبورہ نبِیّہ نے کیتی سی۔ اوہنے کہیا سی:‏ [‏یہوواہ]‏ سیسرا نُوں اِک عورت دے ہتھ ویچ دَوے گا۔ (‏قضاۃ 4:‏9‏)‏ یاعیل نے جیہڑا کم کیتا اوہدے لئی اوہدی تعریف چ کہیا گیا کہ اوہ سب عورتاں توں مبارک ہووے گی۔—‏قضاۃ 5:‏24‏۔‏

اَسی یاعیل توں کیہہ سکھنے آں؟‏ یاعیل نے صحی کم کرن لئی فوراً قدم چُکیا تے دلیری وکھائی۔ اوہدے اوہدی مثال توں پتہ چلدا اے کہ خدا اپنی پیشین‌گوئی نُوں پورا کرن لئی واقعیات دا رُخ جدھر چاہوے موڑ سکدا اے۔‏

اوہ زمانہ جدے چ ایہہ عورتاں رہندیاں سن