Will, een Jugentlicha, sajcht: “Bloos aun de Bibel to denkjen kaun eenem aul enoolent woaren, wan eena nich weet, woo eena de Bibel läsen saul.”

 Woo kaun eena de Bibel läsen, daut eenem daut scheen jeit? Dis Artikjel woat die doatoo halpen.

•  Moak daut jeschräwne läwendich

•  Sieekj die Sachen deepa no

•  Waut aundre Jugentliche sajen

 Lot die doa nenn, wan du läsen deist. Du kaust daut soo aus dit doonen:

1.   Sieekj die waut ut, wua du wurscht jleichen mea äwa to weeten. Daut kaun uzhent eene Jeschicht sennen, waut du jleichst, ooda waut von de Evangelien ooda eent von de väajeläsde biblische Jeschichten opp jw.org.

2.   Läs de Jeschicht gaunz derch. Du kaust daut auleen doonen ooda met diene Frind ooda Famielje toop. Veleicht kaun eena dan daut Poat läsen, wäa de Jeschicht vetalt. Un de aundre doonen sikj jieda eena eene Persoon utläsen un krakjt daut läsen, waut dise Persoon sajcht.

3.   Proow mol waut von dise Iedeeen, waut hia komen:

   •   Mol Bilda von daut, waut du läsen deist, un schriew unja jieda Bilt, waut doa krakjt passieet.

   •   Kjikj, woo daut tooppaust. Läs die eenen Deena von Gott ut un unjasieekj, waut dee fa goodet deed, woo hee daut haud un waut fa Säajnungen dee kjrieech. Schriew die daut opp. Un dan kjikj, woo daut aula tooppaust.

   •   Stal die väa, de Jeschicht passieet nu jroz un du vetalst aundre, waut doa nu aules aunjeit. Bekjikj de Jeschicht von veschiedne Sieden. “Befroag” soo to sajen aul dee, waut en de Jeschicht met en wieren un waut dee jeseenen haben.

   •   Läst du von eenen Mensch, waut waut deed, waut nich rajcht wia? Dan denkj doaräwa no, woo daut wudd sennen utjekomen, wan dee daut aundasch jedonen haud. Saj wie mol, du denkjst äwa Petrus no, aus hee vestrieden deed, daut hee Jesus kjand (Markus 14:66-72). Woo wudd Petrus haben kunt bäta doamet omgonen, aus hee unja Druck wia?

   •   Wan du die doamet vesteist, kust du uk mol dit doonen: Schriew selfst eene Jeschicht opp von en onse Tiet, waut eena lota mau rajcht kunn nospälen. Dee saul sikj opp eene biblische Jeschicht stetten un soo sennen, daut eena doa uk waut von lieet (Reema 15:4).

 Wan du en eene Jeschicht no Kjlienichkjeiten sieekjst, woascht du väl wieetvollet lieren. Soogoa eent ooda twee Wieed kjennen en eene Jeschicht aul väl utmoaken.

 Toom Biespel vejlikj mol Matäus 28:7 met Markus 16:7.

•    Wuarom sajcht daut en Markus, daut Jesus sikj wudd von siene Jinja seenen loten un von Petrus?

•  Eene Iedee: Markus wia nich doa, aus daut passieed un veleicht haft Petrus am daut vetalt.

•  Daut wieetvolle, waut du lieren kaust: Wuarom mott Petrus daut beruicht haben, daut Jesus am wada seenen wull? (Markus 14:66-72). Woo wees Jesus, daut hee fa Petrus wull een woara Frint sennen? Woo kaust du Jesus nodoonen un uk een woara Frint fa aundre sennen?

 Wan du de Bibel läsen deist, un die daut läwendich moakst, un uk no Kjlienichkjeiten sieekjst, woat die daut väl scheena gonen.