•   Waut deit daut aun die, wan du hieescht, daut aundre flieekjen?

  •  Ekj woa daut nich mol en – ekj sie daut aul jewant.

  •  Daut baudat mie een beskje – oba ekj saj doawäajen nuscht.

  •  Ekj jleich daut nuscht – ekj kaun mie doa nich to wanen.

•   Woo foaken deist du flieekjen

  •  Newers

  •  Bieaun

  •  Sea foaken

•   Jleefst du, es daut sea schlemm, schlajchte Räd to haben?

  •  Nä

  •  Jo

 Waut jleefst du: Es flieekjen werkjlich soo schlajcht? Nu denkjst du veleicht: “Oba sea lang nich. Daut jeft noch väl waut schlemret enne Welt. Un dan uk noch – aula doonen je flieekjen!” Oba es daut werkjlich soo?

 Aus du daut jleefst ooda nich, daut jeft een deel Menschen, waut nich flieekjen un nich schlajchte Wieed brucken. Un dee weeten uk krakjt wuarom dee daut nich doonen wellen. Kjikj mol, woosoo dee daut nich doonen:

•  Daut jeit nich bloos om de Wieed. Woo du rätst wiest aundre, woo du werkjlich best. Wan du schlajchte Räd hast, kunn daut soo loten, daut du nuscht om aundre romjefst. Oba best du werkjlich soona, waut nuscht om aundre romjeft?

   De Schreft sajcht: “Waut utem Mul rut kjemt, kjemt utem Hoaten” (Matäus 15:18, “PB”).

•  Wan du flieekjen deist, woaren aundre veleicht schlajcht von die denkjen. Een Buak, waut doavon schrift, woo eena kaun schlajchte Räd tochloten, sajcht: “Waut vonne Räd eena haft, kaun väl doaraun doonen, wäa met ons well Frind sennen, woo sea onse Famielje un Oabeitspoatna ons respakjten, woo goot wie met aundre foadich woaren, aus wie eene Oabeit kjrieen ooda enne Oabeit veraunkomen, un woo Framde äwa ons denkjen.” En daut Buak sajcht daut uk noch: “Denkj mol doaräwa no, aus du veleicht wurscht met aundre noch bäta foadich woaren, wan du nich flieekjen deetst” (Cuss Control).

   De Schreft sajcht: “Hieet opp … to beleidjen” (Efeesa 4:31, “PB”).

•  Daut wiest nich, daut du een sea Browa best, wan du flieekjen deist. Dr. Alex Packer, waut doaräwa studieet, woo Jugentliche sikj vehoolen, schrift en een Buak: “Eena woat meed, von soone Menschen toohorchen, waut dän Tiet äwa flieekjen.” Un hee sajcht uk noch, daut Menschen, waut emma schlajchte Wieed brucken, “nich väl sposjet, kluaket ooda leeftoljet sajen”. Wan dee emma bloos deeselwje schlajchte Wieed brucken, woaren dee nich bätre Menschen woaren (How Rude!).

   De Schreft sajcht: “Kjeen schlajchtet Wuat saul ut junem Mul gonen” (Efeesa 4:29, “JHF”).

•  Nemm die väa, opptohieren met flieekjen. Proow mol, fa eene Moonat, nich mea schlajchte Wieet to brucken. Schriew die daut oppem Kalenda ooda opp een Blaut opp toom seenen, aus du daut uk werkjlich woascht doonen. Oba wan du west gaunz met flieekjen opphieren, woascht du secha noch aundret motten doonen. Biejlikj soont aus dit:

•  Jeff die nich met soont auf, wua schlajchte Räd väakjemt. De Schreft sajcht: “Schlajchte Jesalschoft vedoaft goode Aunjewanheiten” (1. Korinta 15:33, PB). Met “Jesalschoft” sent nich bloos Menschen jemeent; oba daut kjennen uk de Films sennen, waut du kjikjst, de Video-Gäms, waut du spälst, un de Musikj, waut du horchst. Kenneth, waut 17 Joa es, sajcht: “Wan eena een Leet hieet, waut eena sea jleicht, dan kaun eena leicht aunfangen mettosinjen, onen opptopaussen, daut doa Flieekjwieed mank sent.”

•  Wies, daut du aul kjlieekja jeworden best. Eenje brucken schlajchte Räd, wiels dee jleewen, dan hieet sikj an aul no eenen grooten Mensch. Oba daut es sea lang nich soo. Soone, waut aul kjlieekja jeworden sent, sent dee, “dee sikj doarenn jeeeft haben, tweschen goot un schlajcht to unjascheeden”, sajcht de Schreft (Hebräa 5:14, PB). Soone Menschen wudden kjeenmol schlajchte Räd haben, bloos toom daut aundre wunda von an jleewen sellen.

 De Woarheit es, daut schlajchte Räd dien Vestaunt un aules rom die bloos met schlajchte Jedanken schwiensch moakt. Un daut jeft aul äwajenuach von soone Menschen, waut schlajchte un schwiensche Jedanken haben! “Moak doa nich uk noch met”, sajcht dautselwje Buak, wua wie ea aul von räden. “Doo aules, waut du kaust, om reine Wieed to brucken, wan du met aundre Menschen vetalst. Du woascht die dan selfst väl bäta feelen un aundre Menschen woat daut väl scheena gonen, met die toop to sennen” (Cuss Control).