•  Wuarom kaun ekj nich bie de Sach bliewen?

•  Woo kaun ekj bäta bie de Sach bliewen?

•  Waut aundre Jugentliche sajen

 Elaine sajcht: “Ea läsd ekj emma een deel Bieekja, oba nu nich mea. Ekj jleich daut nich mol mea, lange Varzhen to läsen.”

 Miranda sajcht: “Wan mie een Video too langsom es, dan moak ekj daut bosja.”

 Jane sajcht: “Mau rajcht, wan ekj waut wichtjet doo un mien Fon dan kjlinjat, dan denkj ekj bloos noch doaraun: ‘Weet, wäa mie jeschräwen haft?’”

 Kjennen ellektroonische Sachen eenem daut schwoa moaken, bie de Sach to bliewen? Eenje sajen, jo. De Schriewa un Rotjäwa Nicholas Carr sajcht: “Je mea wie ons met daut Internet aufjäwen, je dolla wan wie ons Vestaunt aun, sikj auflenkjen to loten. Wie läsen haustich waut, onen daut wie werkjlich dän Kopp doabie haben.” a

 Besee wie ons nu mol dreeatlei, bie waut ons daut ellektroonische Jereetschoft auflenkjen kaun.

•   Wan wie met aundre vetalen. Eene Jugentliche, waut Maria heet, sajcht: “Eenje haben dän Tiet äwa daut Fon enne Henj un schriewen sikj met irjentwäm, spälen Gäms ooda sieekjen sikj em Internet rom, wan eena met dee vetalt, un dee horchen nich werkjlich too.”

•   Wan wie enne School sent. Daut Buak Digital Kids sajcht: “De mieeschte Schoolkjinja sajen, daut see daut ellektroonische Jereetschoft brucken, wan see enne School sent, toom aundre schriewen, em Internet romsieekjen un sikj Bilda ooda Videos aunkjikjen.” Dee brucken daut “fa soont, waut nuscht met de School to doonen haft.”

•   Wan wie Schooloabeit doonen. De 22-joascha Chris sajcht: “Daut schwanste es fa mie, nich dän Tiet äwa nom Fon to kjikjen, wan daut räst.” Wan du die von dien Fon auflenkjen latst, dan kaun de Schooloabeit, waut die jeweenlich eene Stund dieren wudd, bat dree Stund ooda lenja dieren.

 De Sach es: Wan du die von daut ellektroonische Jereetschoft auflenkjen un kontrollen latst, dan woat et fa die schwoa sennen, bie de Sach to bliewen.

•   Wan wie met aundre vetalen. De Schreft sajcht: “Jie sellen nich bloos no daut kjikjen, waut junt selfst intressieet, oba uk no daut, waut dän näakjsten intressieet” (Filippa 2:4, PB). Wan du aundre oppmoakjsom toohorchst, dan wiest du, daut du om dee bekjemmat best. Kjikj no dee, wan jie unjarenaunda vetalen, un lot die nich von dien Fon auflenkjen.

   Thomas sajcht: “Wan du met wäm vetalst, dan kjikj nich no dien Fon. Horch dän aundren oppmoakjsom too, un doaderch kaust du wiesen, daut du dän achst.”

   EENE IEDEE: Wan du en eene Vetal best, dan doo daut Fon doahan, wua du daut nich seenen kaust. Forscha sajen, wan eena daut Fon seenen kaun, kaun eenem daut auflenkjen von de Unjahoolunk, wiels eena dän Tiet äwa doaraun denkjt, daut doa woat waut nenkomen.

•   Wan wie enne School sent. De Schreft sajcht: “Siet väasechtich, woo jie horchen” (Lukas 8:18, PB). Wan du dit em Denkj helst un daut en diene School Internet jeft, dan doo nich no diene Norechten kjikjen ooda Gäms spälen ooda äwa Internet die met wäm schriewen, wan jroz School en es.

   Karen sajcht: “Proow, enne School bäta tootohorchen. Schriew die daut opp, waut de Liera sajcht. Un wan daut mäajlich es, dan sett wieda no väaren, daut du nich aufjelenkjt woascht.”

   EENE IEDEE: Schriew die Sachen opp Papia opp un nich em Komputa. Forscha sajen, wan eena daut deit, dan es eena weinja aufjelenkjt un eena kaun sikj daut bäta moakjen, waut eena lieet.

•   Wan wie Schooloabeit doonen. De Schreft sajcht: “Nemm Weisheit aun, saumel Vestentnis” (Spricha 4:5, PB). Daut bediet, deep doaräwa notodenkjen, waut du lieescht, un nich daut bloos bowenäwa to doonen, daut du kaust dän Test schriewen.

   Chris sajcht: “Wan ekj Schooloabeit doo, dan lot ekj mie nich von irjent Norechten auflenkjen, wiels ekj stal mien Tablet opp daut Zhetje un hab miene Jedanken gaunz bie daut, waut ekj doo. Wan ekj waut em Denkj hoolen well, dan schriew ekj mie daut opp.”

   EENE IEDEE: Doo diene Schooloabeit en soone Stow, waut rein un oppjeriemt es, soo daut du nich aufjelenkjt woascht.