Jesus rad de true Menschen, aus hee sien Läwen jeef, aus een Opfa (Matäus 20:28). Doawäajen woat Jesus en de Schreft uk “de Welt äa Heilant”, ooda Rada, jenant (1. Johanes 4:14, PB). Un de Schreft sajcht uk: “Doa es uk en sest kjeenem Radunk, wiels ons Menschen es unja däm Himmel sest kjeen Nomen jejäft, derch dän wie kjennen seelich woaren” (Aposteljeschicht 4:12, PB).

 Jesus deed “fa aule Menschen dän Doot schmakjen”, waut aun am jleewen (Hebräa 2:9, PB; Johanes 3:16). “Gott oba haft dän vom Doot oppjewoakt” un Jesus fua trigj nom Himmel aus een Jeist (Aposteljeschicht 3:15, PB). Un wiels Jesus nu em Himmel es, “kaun hee dee volstendich raden, dee derch am no Gott komen. Hee läft eewich un bät fa an” (Hebräa 7:25, PB).

Wuarom es daut needich, daut Jesus fa ons bät, ooda bie Gott fa ons ensteit?

 Wie sent aula Sinda (Reema 3:23). Wäajens de Sind, sent wie von Gott jetrant un motten aula stoawen (Reema 6:23). Oba Jesus es dee, waut “fa ons enstonen deit”. Hee steit fa aul dee en, waut aun am un aun sien Opfa jleewen (1. Johanes 2:1, PB). Daut meent, daut Jesus fa ons ver Gott kjemt, un Gott doano frajcht, daut hee no onse Jebäda horcht un sien Opfa aunnemt, om ons de Sinden to vejäwen (Matäus 1:21; Reema 8:34). Gott horcht no daut, waut Jesus am frajcht, wiels daut met sienen Wellen stemt. Gott schekjt je Jesus no de Ieed, “daut de Welt derch am kunn jerat woaren” (Johanes 3:17, PB).

Es daut jenuach, aun Jesus to jleewen toom jerat woaren?

 Nä. Doa es noch mea met en, aus bloos aun Jesus jleewen (Aposteljeschicht 16:30-31). De Schreft sajcht, daut “de Kjarpa onen Jeist doot es” un krakjt soo “es de Gloowen onen Woakjen doot” (Jakobus 2:26, PB). Wan wie wellen jerat woaren, mott wie noch mea doonen:

•   Wie motten von Jesus un von sienen Voda Jehova lieren (Johanes 17:3).

•   Wie motten emma mea Gloowen kjrieen aun dee beid (Johanes 12:44; 14:1).

•   Wie motten onsen Gloowen doaderch bewiesen, daut wie daut nokomen, waut Jehova un Jesus sajen (Lukas 6:46; 1. Johanes 2:17). Jesus lieed, daut nich aul dee jerat woaren, waut am “Har” nanen, oba bloos dee, “dee doa doonen, waut . . . [sien] Voda em Himmel haben well” (Matäus 7:21, PB, von ons dunkel jemoakt).

•   Wie motten fa wieda wiesen, daut wie Gloowen haben, uk wan daut mol schwoa es. Jesus säd: “Oba wäa bat aum Enj uthelt, woat jerat woaren” (Matäus 24:13, PB).