Woo kaun Jesus sien Opfa väle looskjeepen?

AUFSPÄLEN

Waut de Schreft doatoo sajcht

Derch Jesus sien Opfa, kaun Gott de Menschen von Sind un Doot friemoaken ooda raden. De Schreft sajcht, daut Jesus ons derch sien Bloot looskoft (Efeesa 1:7; 1. Petrus 1:18-19). Doawäajen säd Jesus uk, hee wia jekomen, om “sien Läwen hantojäwen, väle loostokjeepen” (Matäus 20:28, PB).

Wuarom wia daut needich, “väle loostokjeepen”?

De ieeschta Mensch, Adam, wia volkomen. Daut meent, hee wia onen Fäla un onen Sind. Hee haud kunt fa emma läwen. Oba hee vespäld daut, wäajens hee mootwellich Gott ojjehuarsom wia (1. Mose 3:17-19). Aus hee dan Kjinja haud, orwen dee de Sind von am met (Reema 5:12). Doawäajen sajcht de Schreft, daut Adam sikj selfst un uk siene Kjinja aun de Sind un dän Doot “vekoft” haud (Reema 7:14, PB). Un wäajens dee aula Sinda wieren, kunn kjeena daut trigjkjeepen, waut Adam vespält haud (Psalm 49:8-9).

Gott jaumad daut äwa Adam siene Nokomen, wiels dee onen Hopninj wieren (Johanes 3:16). Oba wiels Gott jerajcht es un sikj uk emma aun siene jerajchte Jesazen helt, kunn hee nich bloos eefach soo de Menschen äare Sinden äwaseenen ooda vejäwen (Psalm 89:15; Reema 3:23-26). Gott leeft aule Menschen. Un doawäajen sorjd hee fa eene Wajch, daut hee de Menschen de Sinden vejäwen kunn un lota mau rajcht wudd halpen kjennen, verheipts nich mea to sindjen (Reema 5:6-8). Doatoo wia Jesus sien Opfa needich.

Woo kunn Jesus de Menschen looskjeepen?

Wan de Schreft von “looskjeepen” ooda “Leesjelt” rät, dan sent doa dise dree Sachen met en:

Daut meent, doa mott een Pries jetolt (4. Mose 3:46-47).
Wan daut betolt woat, woat wäm friejemoakt ooda erleest (2. Mose 21:30).
Daut mott krakjt soo väl em Wieet sennen aus daut, waut daut betolen saul. a

Well wie mol seenen, woo Jesus Christus derch sien Opfa, dise dree Sachen erfelt haft.

Eenen Pries jetolt. No de Schreft no, sent de Christen derch eenen “Pries jekoft” (1. Korinta 6:20; 7:23, PB). De Pries es Jesus sien Bloot. Hee jeef sien Läwen, om met sien Bloot “von aule Menschenstam un Sproaken un Velkja, een Volkj fa sikj to kjeepen” (Openboarunk 5:8-9, PB).
Friejemoakt. Jesus sien Opfa es de Pries, waut jetolt es toom daut wie von de Sind “jerat sent” (1. Korinta 1:30, PB; Kolossa 1:14; Hebräa 9:15).
Krakjt soo väl em Wieet. Jesus sien Opfa wia krakjt soo väl em Wieet aus daut, waut Adam vespält haud, un daut wia: een Menschenläwen onen Sind (1. Korinta 15:21-22, 45-46). De Schreft sajcht: “Soo aus derch eenen Mensch [Adam] sien onjehuarsom sennen väle to Sinda worden, soo woaren derch dän eenen [Jesus Christus] sien jehuarsom sennen, väle jerajcht jemoakt” (Reema 5:19, PB). Daut moakt ons dietlich, woo de Doot von eenen Mensch, väle Sinda looskjeepen kaun. Jesus sien Opfa es mau rajcht daut “Leesjelt fa aule Menschen”, waut daut doonen, waut needich es, om daut an daut kaun togood komen (1. Timotäus 2:5-6, PB).

a En de Schreft jäwen de originale Wieed, waut met “looskjeepen” äwasat woaren, de Iedee von eenen Pries ooda een wieetvollet Dinkj, waut aus Tolinj jejäft woat. Biejlikj daut hebräische Wuat kafár meent eefach “toodakjen”. Foaken woat daut jebrukt, wan daut om Sinden toodakjen jeit, daut meent, dee gaunz to vejäwen (Psalm 65:3, NW). Daut Hauptwuat kófer bediet: daut, waut jetolt woat, om dän gaunzen Pries tootodakjen, ooda om wäm frietokjeepen (2. Mose 21:30). Un krakjt soo es daut uk met daut griechische Wuat líétron, waut jeweenlich met “looskjeepen” äwasat woat. Daut kaun uk met “Leesjelt” äwasat woaren (Matäus 20:28, JHF). De griechische Schriewa brukten dit Wuat, wan see doamet sajen wullen, daut een Pries jetolt wort toom wäm friekjeepen, waut em Kjrich faustjenomen wort ooda toom eenen Sklow friemoaken.