Pero esei no ta e úniko difikultatnan ku por tin. Tuma e kaso di Nicolas i Céline. E sukursal na Fransia a pidi nan pa bai na un otro kongregashon i nan a aseptá esei. Nan a bisa: “Na promé instante nos tabata hopi kontentu. Pero ku tempu nos a kuminsá sinti falta di nos amigunan. Nos no tabatin un amistat hopi será ku e rumannan den e kongregashon nobo ainda.” a Mirando tur e retonan ei, kiko por yuda nos kustumbrá ku un kongregashon nobo? Si bo nota ku tin ruman nobo den bo kongregashon, kiko abo por hasi pa yuda nan? I ora bo drenta un kongregashon nobo, kon bo por duna i risibí animashon?

KUATER PRINSIPIO KU POR YUDA BO

1. Konfia den Yehova. (Sal. 37:5) Ruman Kazumi ta biba na Hapon i e tabatin 20 aña den mesun kongregashon. Pero el a hañ’é tin ku kambia di kongregashon pasobra su esposo a haña overplaatsing. Kazumi a “pone tur kos den man di Yehova.” Kon el a hasi esei? El a bisa: “Kada biaha ku m’a sinti miedu, bashí òf anshá, mi tabata konta Yehova tur kos. I tur biaha ku m’a hasi esei, el a duna mi e forsa ku mi tabatin mester.”

Kiko mas bo por hasi pa konfia den Yehova? Un mata mester di awa i vitamina pa e krese. Asina tambe, nos tin ku nutri nos fe pa asina e por krese. Por ehèmpel, si regularmente nos hasi estudio personal, esei lo yuda nos trata ku kambionan den nos bida i tambe siña kos nobo ku nos por kompartí ku e rumannan den nos kongregashon nobo. Nicolas, menshoná anteriormente, a meditá riba Ábraham, Hesus i Pablo, kendenan a  hasi hopi sakrifisio pa hasi Yehova su boluntat. Anto esei a konvens’é aun mas ku Yehova lo yud’é.

2. No kompará. (Ekl. 7:10) Jules a muda di Benin pa Merka i e mester a kustumbrá ku un kultura kompletamente diferente. El a bisa: “Kada biaha ku mi tabata topa un hende nobo, mi a sinti ku mi mester a kont’é henter mi historia.” Komo ku e no a kustumbrá ku esaki na Benin, el a kuminsá evitá e rumannan. Pero despues ku el a konosé e rumannan mihó el a stòp di pensa asina. El a bisa: “Mi ta sinti ku unda ku bo bai na mundu, hende ta keda hende. Ta djis nan manera di papia i aktua ta diferente. Ta importante pa nos aseptá hende manera nan ta.” Pues no hasi komparashon ku bo kongregashon anterior. Wak kiko Anne-Lise, un pionero, a bisa: “M’a muda pa mi eksperensiá algu nobo i no pa mi haña presis loke m’a laga atras.”

Asta ansianonan tin ku evitá di hasi komparashon ku nan kongregashon anterior. E manera ku kosnan ta tuma lugá den e kongregashon no ta nesesariamente malu, mas bien nan ta djis diferente. Pues, lo ta sabí pa bo djis opservá kosnan den e kongregashon nobo promé ku bo bin ku sugerensia. (Ekl. 3:​1, 7b) Ta muchu mas mihó pa pone un bon ehèmpel na lugá di forsa bo opinion.—2 Kor. 1:24.

3. Enbolbé bo mes ku e kongregashon. (Flp. 1:27) Ora bo muda, ta bèrdat ku esei ta tuma hopi tempu i energia di bo. Pero, ta sumamente importante pa bo kuminsá bai e reunionnan mesora, si ta posibel, en persona. Pasobra si bo kongregashon nobo no mira bo ètòl òf kasi nunka, nan no por yuda bo. Lucinda, kende a muda ku su dos yu muhénan pa un stat grandi den Zùit Afrika a bisa: “M’a haña konseho pa sera ku e rumannan den mi kongregashon nobo, entre otro, traha den sirbishi ku nan i duna komentario na reunion. Asta nos a hasi nos kas disponibel pa tene e reunionnan pa sirbishi.”

Trahando “lado a lado” den tur e aktividatnan di kongregashon ku bo rumannan ta un bon manera pa fortalesé bo mes i otro ruman. Anne-Lise su ansianonan a konseh’é pa traha den sirbishi ku tur ruman. Kon a bai kuné? El a bisa: “M’a ripará hopi lihé ku esaki ta esensial pa sera ku e rumannan.” Ademas, ora bo partisipá den kosnan manera limpiesa i mantenshon di e Salòn di Reino, esei ta demostrá na e rumannan ku bo ta konsiderá esaki komo bo kongregashon. Mas kos bo hasi huntu ku bo kongregashon nobo, mas lihé e rumannan lo kustumbrá ku bo i mas lihé lo bo sinti ku esaki ta bo famia spiritual nobo.

4. Sera amistatnan nobo. (2 Kor. 6:​11-13) E mihó manera ku bo por haña amigu nobo ta si bo mustra ku bo ta realmente interesá den nan. P’esei, hasi sigur pa traha  tempu promé i despues di reunion pa bai serka e rumannan pa bo siña konosé nan. Hasi bo esfuerso pa kòrda nan nòmber. Ora bo kòrda hende su nòmber i bo ta amigabel i fásil pa papia kuné, hende lo sinti gana di sera amistat ku bo.

No anshá pa bira un hende ku bo no ta djis pa e rumannan aseptá bo. Na lugá di esei, laga e rumannan mira kon bo ta. Hasi manera Lucinda, kende a bisa: “Nos tin bon amistatnan den kongregashon pasobra nos a tuma e promé stap pa invitá nan na nos kas.”

“RISIBÍ OTRO GUSTOSAMENTE”

Algun hende ta sinti nan hopi inkómodo ora nan drenta un Salòn di Reino i ta mira yen kara ku nan no konosé. Pues, kiko bo por hasi pa yuda nan sinti nan bon biní? Bo tin ku sigui Apòstel Pablo su konseho i “risibí [nan] gustosamente, meskos ku Kristu tambe a risibí [bo] gustosamente.” (Rom. 15:7) Anto ora e ansianonan imitá Kristu, nan tambe por yuda e rumannan sinti nan bon biní. (Wak e kuadro “ Ora di Bai un Kongregashon Nobo.”) Pero ta henter e kongregashon, asta e muchanan, por laga e rumannan nobo sinti nan na kas.

Ta bèrdat ku pa laga un hende sinti nan bon biní ta bon pa mustra nan hospitalidat. Pero e ta enserá tambe duna yudansa práktiko. Por ehèmpel un ruman ku nos lo yama Sandra, a tuma tempu pa mustra un ruman muhé nobo kon e stat ta i kon pa usa transporte públiko. Loke Sandra a hasi tabatin un efekto hopi grandi riba e ruman i a yud’é adaptá.

UN MANERA PA KRESE SPIRITUALMENTE

Segun un dalakochi ta madurá, e ta kita su kueru bieu vários biaha. E tin ku hasi esaki promé ku e por bula. Asina tambe ora ku un hende bai un kongregashon nobo nan tin ku kita kualke preokupashon ku ta stroba nan di, den un sentido, habri nan alanan  den e kongregashon nobo. Nicolas i Céline a bisa ku muda pa un kongregashon nobo ta “un bon entrenamentu . . . Adaptá na hende nobo i un ambiente diferente ta forsa bo kultivá kualidatnan nobo.” Jean-Charles, menshoná na kuminsamentu, a konta kon su famia a benefisiá: “E kambio a yuda nos yunan krese den nan amistat ku Yehova. Den un par di luna nos yu muhé a kuminsá haña asignashon durante e reunion di den siman i nos yu hòmber a bira un publikadó no batisá.”

Pero kiko si abo no tin ku muda? Kiko si bo no por bai sirbi den un otro kongregashon ku mester di yudansa? Esei no mester stroba bo di apliká e sugerensianan den e artíkulo akí. Siendo ku bo ta den bo mes kongregashon, kuminsá di nobo. Segun ku bo ta konfia den Yehova, enbolbé bo mes ku e kongregashon dor di invitá rumannan pa traha ku bo den sirbishi i forma amistat nobo òf fortalesé esnan ku bo tin kaba. Kisas bo por dal e promé stap pa yuda un publikadó nobo òf un ruman ku mester di yudansa na un manera práktiko. Komo ku amor ta identifiká un berdadero kristian, ora bo yuda otro hende, esei lo hala bo mas serka di Yehova. (Huan 13:35) Bo por ta konvensí ku “e tipo di sakrifisionan ei ta agradá Dios.”—Heb. 13:16.

Apesar di e retonan, hopi ruman a logra hasi un kambio di kongregashon, i a bai bon ku nan. Esei por pasa ku abo tambe. Anne-Lise a bisa: “M’a siña habri mas ku mi rumannan ora m’a kambia di kongregashon.” Awor Kazumi ta konvensí ku ora bo muda “bo por sinti kon Yehova ta yuda bo na maneranan ku nunka bo a eksperensiá promé.” Anto kon a para ku Jules? El a bisa: “E amistatnan ku m’a forma a yuda mi sinti mi na kas. Awor mi ta sinti mi asina será ku mi kongregashon, ku lo ta duru si mi tin ku bai.”