Segun Bijbel, ta bon y hasta necesario pa stima bo mes na un grado rasonabel. E amor ey ta encera cuida, respeta y balora bo mes. (Mateo 10:31) Ademas, Bijbel ta mustra nos con pa pone amor propio na su debido luga y no pensa solamente riba nos mes.

Ken nos mester stima mas?

1.   Amor pa Dios mester ta na prome luga den nos curason. Bijbel ta bisa cu e mandamento di mas grandi ta: “Bo tin cu stima Jehova bo Dios cu henter bo curason.”—Marco 12:28-30; Deuteronomio 6:5.

2.   E di dos mandamento mas grandi ta: “Stima bo prohimo mescos cu bo mes.”—Marco 12:31; Levitico 19:18.

3.   Aunke Bijbel no tin un mandamento specifico cu ta bisa cu bo mester stima bo mes, e mandamento pa “stima bo prohimo mescos cu bo mes” ta mustra cu ta normal y bon pa bo tin un grado rasonabel di amor y respet propio.

Ken Hesus a stima mas?

 Hesus a mustra con nos por stima Dios, nos prohimo y nos mes na un manera balansa. Ademas, el a siña su discipelnan pa sigui su ehempel.​—Juan 13:34, 35.

1.   El a stima Jehova Dios prome y a biba pa haci Su boluntad. El a bisa: “Mi ta haci precies manera e Tata a manda mi haci, pa mundo por sa cu mi ta stima e Tata.”—Juan 14:31.

2.   Hesus a stima su prohimo. El a mustra esey ora el a yuda otro hende y hasta a duna su bida pa nan.​—Mateo 20:28.

3.   Hesus a mustra cu e ta stima su mes na un manera balansa ora el a aparta tempo pa descansa, come y pasa bon cu su discipelnan y otro hende cu tabata interesa den su mensahe.​—Marco 6:31, 32; Lucas 5:29; Juan 2:1, 2; 12:2.

Si mi stima otro hende mas cu mi mes, esey lo haci mi menos feliz of kita mi balor propio?

 No, pasobra nos tur a ser crea den imagen di Dios y su cualidad di mas importante ta amor sin egoismo. (Genesis 1:27; 1 Juan 4:8) Esey ta nifica cu nos a ser diseña pa mustra amor na otro hende. Aunke ta bon pa stima nos mes, nos lo ta realmente feliz si nos stima Jehova mas y focus riba yuda otro hende. Pesey Bijbel ta bisa: “Tin mas felicidad den duna cu den ricibi.”—Echonan 20:35.

 Hopi hende awe ta pretende cu pa bo ta feliz bo mester pone bo mes na prome luga. Nan a reemplasa “stima bo prohimo” pa “stima bo mes.” Sin embargo, realidad ta mustra cu nos salud ta mehora y nos lo ta feliz si nos sigui e conseho sabi aki di Bijbel: “Laga cada hende sigui busca, no su mes beneficio, sino esun di e otro persona.”—1 Corintionan 10:24.