Armagedon ta referi na e guera final entre e gobiernonan humano y Dios. E gobiernonan aki y hende cu ta apoya nan ta opone Dios pasobra nan ta nenga di somete nan mes na Dios su gobernacion. (Salmo 2:2) E guera di Armagedon lo caba cu tur gobierno humano.—Daniel 2:44.

 E palabra “Armagedon” ta aparece un biaha so den Bijbel na Revelacion 16:16. Un profecia den e buki di Revelacion ta bisa cu na “e luga cu na Hebreo yama Armagedon”, “e reynan di henter e Tera habita” lo reuni “hunto pa e guera cu lo tuma luga riba e gran dia di Dios, e Todopoderoso.”—Revelacion 16:14.

 Ken lo bringa den e guera di Armagedon? Hesucristo lo dirigi un ehercito di angel cu lo derota e enemigonan di Dios. (Revelacion 19:11-16, 19-21) E enemigonan di Dios ta esnan cu ta bay contra su autoridad y cu ta falt’e respet.—Ezekiel 39:7.

 Armagedon lo tuma luga literalmente na Medio Oriente? No. E guera di Armagedon lo no tuma luga na un sitio specifico, mas bien lo e abarca henter Tera.—Jeremias 25:32-34; Ezekiel 39:17-20.

 Armagedon (na Hebreo Har Meghiddohnʹ) ta nifica “Sero di Meguido.” Meguido tabata un stad na Israel di antiguedad. Historia ta revela cu diferente gueranan decisivo a tuma luga den bisindario di Meguido, y Bijbel ta papia di algun di e gueranan ey. (Huesnan 5:19, 20; 2 Reynan 9:27; 23:29) Pero, Armagedon no por ta referi na e area literal den bisindario di Meguido di antiguedad. Dicon? Pasobra eynan no tin un sero grandi, y e Vaye di Jezreel no ta suficiente grandi pa contene tur esnan cu lo bringa contra Dios. Pues, Armagedon ta mas bien un situacion den cua e nacionnan ta uni pa hiba un guera final contra Dios su gobierno.

 Kico lo sosode durante Armagedon? Nos no sa con Dios lo uza su poder pa bringa e guera. Pero e por uza e armanan cu el a yega di uza den pasado, manera hagel, temblor, yobida fuerte cu inundacion, candela y suafel, lamper y maleza. (Job 38:22, 23; Ezekiel 38:19, 22; Habacuk 3:10, 11; Zacarias 14:12) Ademas, e confusion cu lo reina e tempo ey lo pone cu algun di Dios su enemigonan lo mata otro. Pero finalmente nan lo realisa cu ta Dios ta bringa contra nan.—Ezekiel 38:21, 23; Zacarias 14:13.

 Armagedon lo ta fin di mundo? Armagedon lo no caba cu nos planeta, ya cu hende lo biba pa semper riba Tera. (Salmo 37:29; 96:10; Eclesiastes 1:4) Pues, en bes di caba cu humanidad, Armagedon lo salb’e, pasobra “un multitud grandi” cu ta sirbi Dios lo sobrevivi.—Revelacion 7:9, 14; Salmo 37:34.

 Tin biaha, ora Bijbel uza e palabra “mundo”, e ta referi na hende malbado cu ta contra Dios. (1 Juan 2:15-17) Pues, ta e mundo ey Armagedon lo caba cu ne.—Mateo 24:3.

 Na ki tempo Armagedon lo tuma luga? Ora Hesus a papia di e “tribulacion grandi” cu lo culmina den Armagedon, el a bisa: “Pa loke ta e dia y ora ey, ningun hende no sa, ni e angelnan di cielo ni e Yiu, sino e Tata so.” (Mateo 24:21, 36) Sinembargo, Bijbel ta mustra cu Armagedon lo tuma luga durante Hesus su presencia invisibel cu a cuminsa na 1914.—Mateo 24:37-39.