E tribulacion grandi lo ta e periodo di mas dificil cu humanidad lo experencia. Segun profecia di Bijbel, esaki lo sosode durante “e ultimo dianan”, of “e tempo di fin.” (2 Timoteo 3:1; Daniel 12:4) Lo e bay ta “un tribulacion manera no a yega di sosode nunca, for di principio di Dios su creacion te cu awor, y cu lo no sosode nunca mas tampoco.”—Marco 13:19; Daniel 12:1; Mateo 24:21, 22.

Sucesonan durante e tribulacion grandi

•   Destruccion di religion falso. Den un rato di ora religion falso lo ser destrui. (Revelacion 17:1, 5; 18:9, 10, 21) Ta e podernan politico representa pa Nacionnan Uni lo haci esey y asina cumpli cu e boluntad di Dios.​—Revelacion 17:3, 15-18. a

•   Atake riba religion berdadero. Un coalicion (of grupo) di nacionnan, cu e vision di Ezekiel ta yama “Gog di tera di Magog”, lo purba di elimina esnan cu ta pertenece na e religion berdadero. Sinembargo, Dios lo proteha su sirbidornan.—Ezekiel 38:1, 2, 9-12, 18-23, Beibel Santu.

•   Humanidad ta ser husga. Hesus lo husga humanidad y “lo e separa hende for di otro, mescos cu un wardador ta separa carne for di cabrito.” (Mateo 25:31-33) Hesus lo basa su sentencia riba e echo cu si un hende a apoya Hesus su “rumannan”, esta, esnan cu lo goberna cu ne den cielo.—Mateo 25:34-46.

•   Reunimento di esnan cu lo goberna cu Hesus den cielo. Hende fiel cu Dios a scoge pa goberna cu Cristo lo finalisa nan bida riba Tera y lo resucita pa biba den cielo.​—Mateo 24:31; 1 Corintionan 15:50-53; 1 Tesalonicensenan 4:15-17.

•   Armagedon. “E guera cu lo tuma luga riba e gran dia di Dios, e Todopoderoso” ta ser yama tambe “e dia di Jehova.” (Revelacion 16:14, 16; Isaias 13:9; 2 Pedro 3:12) Hende cu Cristo a condena lo ser destrui. (Sofonias 1:18; 2 Tesalonicensenan 1:6-10) Esaki ta inclui destruccion di e sistema politico rond mundo cu Bijbel ta pinta como un bestia salbahe cu shete cabes.​—Revelacion 19:19-21.

Sucesonan despues di e tribulacion grandi

•   Satanas y su demoñonan ta ser encarcela. Un angel poderoso lo tira Satanas y su demoñonan “den e abismo.” Ey nan lo keda den un estado inactivo cu ta parecido na morto. (Revelacion 20:1-3) Ta comosifuera Satanas lo ta den prizon; lo e no por influencia niun hende.​—Revelacion 20:7.

•   E Mil Aña ta cuminsa. E Reino di Dios lo cuminsa su reinado di 1000 aña y lo trece bendicionnan grandi pa humanidad. (Revelacion 5:9, 10; 20:4, 6) “Un multitud grandi” cu ningun hende no por conta lo “sobrevivi e tribulacion grandi” pa mira e cuminsamento di e Mil Aña.—Revelacion 7:9, 14; Salmo 37:9-11.