Den e articulo aki lo bo haya sa dicon ta importante pa sa

•  Pa ken bo ta manda mensahe

•  Kico bo ta manda den e mensahe

•  Ki ora bo ta manda mensahe

Tambe den e articulo aki tin:

•  Conseho practico

•  Kico abo lo haci

 Hopi hoben ta pensa cu ta imposibel pa biba sin manda mensahe. Ora bo ta manda mensahe, bo por keda den contacto cu tur hende den bo lista di contacto, basta bo mayornan no ta contra di esey.

 “Mi tata no ta gusta pa ami cu mi ruman muher papia cu mucha homber. Si nos haci esey mes, e mester ta na telefon di cas den sala caminda tin otro hende tambe.”​—Lenore.

 Bo mester sa cu si bo duna ken cu ta bo number, bo por haya bo den problema.

 “Si bo no paga tino ken tin bo number, bo por haya mensahe of potretnan cu bo no kier.”​—Scott.

 “Si un mucha homber ta manda mensahe tur ora bay pa un mucha muher, of viceversa, ta hopi facil pa haya sintimento pa e hende ey.”​—Steven.

 Bijbel ta bisa: “Hende sabi ta mira peliger y ta evit’e.” (Proverbionan 22:3, Beibel na papiamentu koriente) Si for di comienso bo tuma cierto medida, bo por spaar bo mes di hopi dolor di curason.

 Historia di bida real: “Ami cu un mucha homber tabata amigo y nos tabata manda hopi mensahe pa otro. Mi a bisa mi mes cu nos ta gewoon hopi ‘close’ cu otro. Mi no a pensa cu lo tabata un problema, te cu un dia el a bisa mi cu el a cuminsa gusta mi. Awor mi a realisa cu mi no mester a sali hopi cu ne y manda asina tanto mensahe p’e.”​—Melinda.

 Pensa riba esaki: Con Melinda su amistad cu e mucha homber lo a cambia despues cu e mucha homber a bis’e di su sintimentonan?

 Kico por a bay otro? Kico Melinda por a haci pa e cu e mucha homber por a djis keda amigo y nada mas?

 Ta hopi facil pa manda mensahe y ta leuk pa haya nan tambe. Pero, ta mesun facil tambe pa un hende compronde un mensahe na su manera.

 Bo mester sa cu ora bo ta manda mensahe, un hende por compronde bo robes.

 “Ora di manda mensahe, ta dificil pa sa cu ki emocion of tono e hende ta papia, hasta ora e ta uza emoticons. Esey por hiba na mal comprondemento.”​—Briana.

 “Mi conoce mucha muher cu a daña nan reputacion y cu ta conoci como mucha muher cu ta gusta flirt cu mucha homber. Bo ta mira esey na e tipo di mensahenan cu nan ta manda.”​—Laura.

 Bijbel ta bisa: “Hende husto ta pensa prome kico e contesta.” (Proverbionan 15:28, Beibel na papiamentu koriente) Kico nos por siña for di esey? Prome cu bo manda bo mensahe, lesa bon kico bo a skirbi.

 Bo mes por traha bo reglanan ora ta trata di manda mensahe; na moda di papia, bo ta forma bo propio etiketa.

 Bo mester sa cu ta importante pa bo tin regla ora di manda mensahe; sino bo por parce un hende sin manera, y hende lo hala for di bo.

 “Ta facil pa lubida bo reglanan ora bo ta manda mensahe. Tin bes mi ta papia cu un hende of sinta come y na mes momento mi ta manda mensahe.”​—Allison.

 “Ta peligroso pa stuur y manda mensahe. Si bo kita bo bista for di riba caminda, bo por causa un accidente.”​—Anne

 Bijbel ta bisa: “Tin un tempo stipula pa tur cos, ... un tempo pa keda keto y un tempo pa papia.” (Eclesiastes 3:1, 7, Beibel Santu) Esey ta conta tambe pa lesamento y mandamento di mensahe.

Pa ken bo ta manda mensahe

•  ;-) Obedece e reglanan di bo mayornan.​—Colosensenan 3:20.

•  ;-) No duna ken cu ta bo number. Na un manera nechi, nenga di duna bo informacion personal, manera number di telefon. Asina bo por siña bisa “no”, y esey lo yuda bo tambe como adulto.

•  ;-) No bira mucho familiar ora bo ta manda mensahe, pa otro hende no pensa cu ta flirt bo ta flirt cu nan. Nan por kere cu ta gusta bo ta gusta nan, y esey hopi biaha ta hiba na frustracion y tristeza.

 “Mi mayornan a mira cu mi ta uza mi telefon na un manera responsabel. Pesey nan ta confia cu mi ta wak bon prome cu mi hinca un hende su number di telefon den mi lista di contacto.”​—Briana.

Kico bo ta manda den e mensahe

•  ;-) Prome cu bo cuminsa skirbi e mensahe, puntra bo mes: Den e caso aki ta bon pa manda un mensahe? Kisas ta mihor pa haci un yamada of papia cu e hende personalmente.

•  ;-) No skirbi algo den e mensahe cu lo bo no a bisa personalmente. Sarah di 23 aña ta bisa: “Si bo no por bis’e cu boca, bo no mester mand’e via mensahe tampoco.”

 “Si un hende ta manda bo potret provocativo, bisa bo mayornan. Esey lo ta un proteccion pa bo y nan lo confia bo mas.”​—Sirvan.

Ki ora bo ta manda mensahe

•  ;-) Dicidi adelanta ki ora lo bo no uza bo celular. Un mucha muher cu yama Olivia ta bisa: “Mi no tin mi telefon hunto cu mi ora mi ta na mesa pa come of ora mi ta studia. Durante nos reunionnan cristian mi ta pag’e, pa mi no sinti mi tenta pa wak e cada rato.”

•  ;-) Tene cuenta cu otro hende. (Filipensenan 2:4) No manda mensahe ora bo ta combersando cu un hende.

 “Mi a pone regla pa mi mes. Por ehempel, mi no ta manda mensahe ora mi ta cu mi amigonan, a menos cu ta algo hopi importante. Tampoco mi no ta duna hende cu mi no conoce bon mi number.”​—Janelly.