Sabiduria Cu Por Yuda Bo Tin un Bida di Famia Feliz
Matrimonio y yiu ta regalonan precioso di nos Creador. E kier pa nos tin un bida di famia feliz. Pues, pa medio di un antiguo buki sagrado, e ta duna nos conseho pa yuda nos tin un bida di famia mas mihor y mas feliz. Wak e sabiduria tras di e siguiente consehonan.
Esposonan, Stima Boso Esposa
“Esposonan mester stima nan esposa manera nan mes curpa. Esun cu ta stima su esposa ta stima su mes, pasobra ningun hende hamas a odia su mes curpa; ma e ta aliment’e y trat’e cu masha cariño.”—EFESIONAN 5:28, 29.
Un esposo ta cabes di su famia. (Efesionan 5:23) Pero, un bon esposo no ta bruto ni exigente. E ta balora su esposa, ta percura p’e materialmente y ta tene cuenta cu su necesidad emocional. E ta haci su best pa haci su esposa contento. Un bon esposo no ta insisti pa semper haci loke e kier. (Filipensenan 2:4) E ta comparti cu su esposa loke e ta pensa y sinti, y e ta scucha su esposa ora su esposa ta papia cu ne. E no ta “rabia amargamente” cu su esposa, y e no ta maltrat’e fisicamente ni hurt e emocionalmente.—Colosensenan 3:19.
Esposanan, Respeta Boso Esposo
“E esposa mester tin respet profundo pa su esposo.”—EFESIONAN 5:33.
Ora un esposa ta respeta su esposo y ta apoya su decisionnan, e ta contribui na paz den su famia. Si e esposo haci algo robes, e esposa no ta rebah’e. Mas bien, e ta keda trankil y ta sigui demostra respet. (1 Pedro 3:4) Ademas, ora e mester papia cu su esposo tocante un problema, e ta scoge un bon momento pa haci esey, y e ta papia cu su esposo na un manera respetuoso.—Eclesiastes 3:7.
Un Pareha Casa Mester Ta Fiel na Otro
“Un homber ... lo uni cu su esposa. Y nan lo bira un carni.”—GENESIS 2:24.
Ora un homber y un muher casa, nan ta forma un relacion di famia hopi cera. Pues, pa nan matrimonio por ta fuerte, un pareha casa mester haci esfuerso pa papia cu otro regularmente tocante nan sintimentonan y haci cos cariñoso pa otro. Ademas, nan mester ta fiel na otro, y no tene relacion sexual cu ningun hende cu no ta nan casa. Ora un esposo of esposa ta infiel, e ta causa su casa hopi dolor y caba cu e confianza di su casa. Esey por hasta kibra un famia.—Hebreonan 13:4.
Mayornan, Instrui Boso Yiunan
“Instrui un mucha den e caminda cu e mester cana, y hasta ora cu e bira bieu e lo no aparta su mes for di dje.”—PROVERBIONAN 22:6.
Dios a duna mayornan e responsabilidad pa instrui nan yiunan. Un di e cosnan cu nan tin cu siña nan yiunan ta con pa comporta nan mes. Ademas, nan mester pone un bon ehempel pa nan yiunan. (Deuteronomio 6:6, 7) Ora un mucha comporta su mes malo, un mayor sabi ta keda trankil. Un mayor mester ta “cla pa scucha, slow pa papia, slow pa rabia.” (Santiago 1:19) Si un mayor haya cu e tin cu corigi su yiu, e mester haci esey na un manera amoroso y no cu rabia.
Yiunan, Obedece Boso Mayornan
“Yiunan, obedece boso mayornan ... ‘Honra bo tata y bo mama.’”—EFESIONAN 6:1, 2.
Un yiu mester obedece su mayornan y trata nan cu respet profundo. Ora un yiu mustra honor na su mayornan, e ta haci su mayornan contento y ta contribui na paz y harmonia den su famia. Un yiu adulto ta honra su mayornan ora e haci sigur cu nan ta bon cuida. Esey ta inclui yuda nan mantene nan cas den bon condicion of duna nan yudansa financiero.—1 Timoteo 5:3, 4.
You May Also Like
CON BO POR LOGRA FELICIDAD DEN FAMIA?
Ken Por Yuda Boso Haya Felicidad den Matrimonio?
Dos pregunta simpel cu por yuda boso mehora boso matrimonio.
E TOREN DI VIGILANCIA
Con Bo Por Ta un Bon Esposo?
Esposonan mester percura bon pa nan famia, tanto materialmente como emocionalmente.
PREGUNTA CU BIJBEL TA CONTESTA
Kico Bijbel Ta Bisa Tocante Cuida Mayornan di Edad Avansa?
Bijbel ta menciona algun ehempel di homber y muher fiel cu a haci esey. Y Bijbel ta duna conseho practico cu por yuda esnan cu ta duna e cuido.
