Yiu adulto tin e responsabilidad importante pa percura pa nan mayornan di edad avansa. Bijbel ta bisa cu yiu adulto mester “siña prome pa cuida nan hendenan di cas di acuerdo cu devocion na Dios y paga nan mayornan ... pa loke nan a haci pa nan, pasobra esey ta agradabel den bista di Dios.” (1 Timoteo 5:4) Ora yiu adulto ta haci sigur cu nan mayornan di edad avansa ta bon cuida, nan ta obedece tambe e mandamento di Bijbel pa honra nan mayornan.—Efesionan 6:2, 3.

 Bijbel no ta duna instruccion specifico tocante cuido di nos mayornan di edad avansa. Sinembargo, Bijbel ta menciona algun homber y muher fiel cu a haci esey. Ademas, Bijbel ta duna conseho practico cu por yuda esnan cu ta duna cuido.

•  Con algun persona den tempo biblico a percura pa nan mayornan di edad avansa?

•  Ki conseho practico den Bijbel por yuda esnan cu ta duna cuido?

•  Bijbel ta bisa cu mester cuida nos mayornan di edad avansa na cas?

 Nan a haci esey na varios manera, dependiendo di e circunstancia.

•   Jozef tabata biba leu for di su tata, Jacob. Ora a bira posibel, Jozef a percura pa su tata bin biba mas cerca di dje. E ora ey, Jozef a percura pa cas, cuminda y proteccion pa su tata di edad avansa.—Genesis 45:9-11; 47:11, 12.

•   Ruth a muda bay na e pais di su suegra y a traha duro pa percura p’e.—Ruth 1:16; 2:2, 17, 18, 23.

•   Hesus a scoge, net prome cu su morto, un hende pa cuida su mama, Maria. Maria probablemente tabata viuda e tempo ey.—Juan 19:26, 27. a

 Duna cuido na nos mayornan di edad avansa tin biaha por ta fisicamente y emocionalmente pisa. Pero Bijbel tin principio cu por yuda esnan cu ta duna e cuido aki.

•   Honra bo mayornan.

   Loke Bijbel ta bisa: “Honra bo tata y bo mama.”—Exodo 20:12.

   Con bo por aplica e principio aki? Bo por mustra honor na bo mayornan, si bo ta permiti nan ta independiente mas tanto cu nan circunstancianan ta permiti. Te con leu cu ta posibel, laga nan mes scoge e forma di cuido cu nan ta prefera. Ademas, bo ta honra nan si bo haci loke bo por pa yuda nan.

•   Sea comprensivo y cla pa pordona.

   Loke Bijbel ta bisa: “Prudencia di un hende ta haci cu e no ta rabia lihe, y pa laga un ofensa pasa ta su gloria.”—Proverbionan 19:11.

   Con bo por aplica e principio aki? Si un mayor di edad avansa papia malo cu bo of si ta parce cu e no ta aprecia e esfuerso cu bo ta haci pa cuid’e, pone bo mes un rato den su sapato. Puntra bo mes: Con ami lo a sinti si mi tabata den su situacion? Si bo ta comprensivo y cla pa pordona, lo bo evita di haci e situacion pio.

•   Inclui mas hende.

   Loke Bijbel ta bisa: “Pa falta di conseho plannan ta fracasa, ma cu hopi consehero nan ta wordo logra.”—Proverbionan 15:22

   Con bo por aplica e principio aki? Busca informacion tocante con pa trata cu e problemanan di salud cu bo mayornan tin. Haci investigacion pa haya sa ki yudansa profesional tin. Papia cu otro hende cu a percura pa nan mayornan di edad avansa. Si bo tin mas ruman, bo por pone un reunion pa boso papia tocante e necesidadnan di boso mayornan, con pa percura pa nan y con pa parti e responsabilidadnan.

•   Reconoce bo limitenan.

   Loke Bijbel ta bisa: “Sabiduria ta cerca e humildenan.”—Proverbionan 11:2.

   Con bo por aplica e principio aki? Sea consciente di bo limitenan. Por ehempel, tur hende ta limita na tempo y energia. E limitenan aki por pone cu bo no por percura pa bo mayornan manera lo bo a desea. Si cuido di bo mayornan di edad avansa ta bira demasiado pa bo so, sea realistico y pidi otro miembro di famia of hende profesional pa yuda bo.

•   Cuida bo mes tambe.

   Loke Bijbel ta bisa: “Ningun hende hamas a odia su mes curpa; ma e ta aliment’e y trat’e cu masha cariño.”—Efesionan 5:29.

   Con bo por aplica e principio aki? Aunke bo tin e responsabilidad di cuida bo mayornan, bo tin cu percura pa bo propio necesidadnan y si bo ta casa, pa esnan di bo famia tambe. Bo mester come bon, sosega bon y drumi suficiente. (Eclesiastes 4:6) Y de bes en cuando, tuma un pausa. Si bo haci esakinan, lo bo ta den mihor condicion—emocionalmente, mentalmente y fisicamente—pa cuida bo mayornan.

 Bijbel no ta duna ningun instruccion specifico cu ta mustra cu yiu mester cuida nan mayornan na cas. Algun famia ta scoge pa laga nan mayornan keda biba na cas mas tanto posibel. Pero, por yega e momento cu un cas di cuido lo ta un mihor opcion. E famia por reuni hunto pa dicidi kico ta mihor pa tur hende envolvi.—Galationan 6:4, 5