1, 2. (a) Ki ora un regalo tin gran balor pa bo personalmente? (b) Dicon nos por bisa cu e rescate ta e regalo di mas balioso cu lo bo por a haya?

CUA ta e mihor regalo cu bo a yega di haya? Un regalo no mester ta caro pa e ta importante. De echo, hende no necesariamente ta determina e berdadero balor di un regalo a base di cuanto e ta costa. Mas bien, ora un regalo ta haci bo felis of ta satisface un berdadero necesidad den bo bida, e tin gran balor pa bo personalmente.

² Di e tantisimo regalonan cu bo por spera di haya, tin un cu ta destaca riba tur. E ta un regalo di Dios pa humanidad. Yehova a duna nos hopi cos, pero su regalo di mas grandi na nos ta e sacrificio di rescate di su Yiu, Hesucristo. (Mateo 20:28) Manera nos lo bai mira den e capitulo aki, e rescate ta e regalo di mas balioso cu lo bo por a haya, pasobra e por trece masha hopi felicidad pa bo y por satisface bo necesidadnan di mas importante. E rescate realmente ta e expresion di mas grandi di Yehova su amor pa bo.

3. Kico ta e rescate, y kico nos tin cu compronde pa nos por aprecia e regalo balioso aki?

³ Simplemente bisa, e rescate ta Yehova su medio pa libra of salba humanidad for di pica y morto. (Efesionan 1:7) Pa capta nificacion di e siñansa biblico aki, nos tin cu repasa loke a sosode den hofi di Eden. Ta solamente si nos compronde loke Adam a perde na momento cu el a peca, nos por aprecia dicon e rescate ta un regalo asina balioso pa nos.

4. Kico bida humano perfecto a nifica pa Adam?

⁴ Ora Yehova a crea Adam, el a dun’e algo realmente precioso—un bida humano perfecto. Pensa un rato kico esaki a nifica pa Adam. Siendo crea cu un curpa y mente perfecto, nunca lo el a bira malo, bieu of muri. Como un hende perfecto, e tawatin un relacion special cu Yehova. Bijbel ta bisa cu Adam tawata un “yiu homber di Dios.” (Lucas 3:38) Pues Adam tawatin un relacion intimo cu Yehova Dios, mescos cu e relacion di un yiu cu un tata amoroso. Yehova a papia cu su yiu terenal, y a dun’e trabou for di cua e por a haya satisfaccion y tambe el a laga Adam sa kico e tawata spera di dje.—Genesis 1:28-30; 2:16, 17.

5. Kico Bijbel kiermen ora e ta bisa cu Adam a ser traha “segun e imagen di Dios”?

⁵ Adam a ser crea “segun e imagen di Dios.” (Genesis 1:27) Esei no a nifica cu Adam su aparencia a parce esun di Dios. Manera nos a siña den Capitulo 1 di e buki aki, Yehova ta un spirito invisibel. (Huan 4:24) Pues Yehova no tin un curpa di carni y weso. Siendo traha segun Dios su imagen a nifica cu Adam a ser crea cu cualidadnan manera esnan di Dios, entre nan, amor, sabiduria, husticia y poder. Adam tawata manera su Tata den un otro aspecto importante, e tawatin boluntad liber. Pues anto, Adam no  tawata manera un mashin cu por haci solamente loke e ta programa pa haci. Mas bien, e por a tuma decisionnan personal, y scohe entre loke ta bon y loke ta malo. Si el a scohe pa obedece Dios, lo el a biba pa semper den Paradijs riba tera.

6. Ora Adam a desobedece Dios, kico el a perde, y con esei a afecta su desendientenan?

⁶ Ta bisto anto cu ora Adam a desobedece Dios y a keda condena na morto, el a paga un prijs hopi halto. Su pica a cost’e su bida humano perfecto hunto cu tur su bendicionnan. (Genesis 3:17-19) Lamentablemente, Adam a perde e bida precioso aki no solamente pa su mes sino tambe pa su futuro desendientenan. E Palabra di Dios ta bisa: “Door di un hende [Adam] pica a drenta den mundo, y morto door di pica, y asina morto a pasa pa tur hende, pasobra tur a peca.” (Romanonan 5:12) Si, nos tur a hereda pica for di Adam. Pesei Bijbel ta bisa cu el a ‘bende’ su mes y su desendientenan den sclabitud na pica y morto. (Romanonan 7:14) No tawatin ningun speransa pa Adam ni pa Eva pasobra deliberadamente nan a scohe pa desobedece Dios. Pero kico di nan desendientenan, cual ta inclui nos?

7, 8. Menciona e dos cosnan cu un rescate basicamente ta encera.

⁷ Yehova a sali na yudansa di humanidad pa medio di e rescate. Kico ta un rescate? E idea di rescate ta encera basicamente dos cos. Na prome luga, un rescate ta un prijs cu ta ser paga pa trece liberacion of pa cumpra algo bek. Lo por compar’e cu e prijs cu ta wordo paga pa libra un persona secuestra. Na di dos luga, den Bijbel un rescate ta e prijs cu ta cubri (of paga) e costo di algo. E ta mescos cu e prijs cu ta ser paga pa cubri e dañonan causa door di un lesion. Por ehempel, si un persona causa un accidente, lo e tin cu paga un suma cu ta coresponde completamente—of cu ta igual—cu e balor di loke el a daña.

 ⁸ Con lo ta posibel pa cubri e perdida enorme cu Adam a causa nos tur y libra nos for di sclabitud na pica y morto? Laga nos considera e rescate cu Yehova a percura y ki beneficionan abo por haya for di dje.

9. Ki clase di rescate tawata necesario?

⁹ Siendo cu ta un bida humano perfecto a bai perdi, ningun bida humano imperfecto hamas por a paga e prijs pa hay’e bek. (Salmo 49:7, 8) Loke tawatin mester ta un rescate di mesun balor cu loke a bai perdi. Esaki ta na harmonia cu e principio di husticia perfecto cu nos ta haya den e Palabra di Dios, cu ta bisa: “Bida pa bida.” (Deuteronomio 19:21) Pues, kico lo a cubri e balor di e bida humano perfecto cu Adam a perde? Tawatin mester di un otro bida humano perfecto como “e prijs di rescate” corespondiente.—1 Timoteo 2:6.

10. Con Yehova a percura e rescate?

¹⁰ Con Yehova a percura e rescate? El a manda un di su yiunan spiritual perfecto na tera. Pero Yehova no a manda djis cualkier criatura spiritual. El a manda esun di mas stima, su Yiu unigenito. (1 Huan 4:9, 10) Boluntariamente e Yiu aki a bandona su cas celestial. (Filipensenan 2:7) Manera nos a siña den e capitulo anterior di e buki aki, Yehova a haci un milager ora cu el a transferi e bida di e Yiu aki pa e matris di Maria. Pa medio di Dios su spirito santo, Hesus a nace como un hende perfecto y no tawata bou di e castigo di pica.—Lucas 1:35.

11. Con un hende so por a sirbi como rescate pa miyones di hende?

¹¹ Pero con un hende so por a sirbi como rescate pa hopi, de echo, pa miyones di hende? Wel pa cuminsa, con miyones di hende a bira pecado? Corda cu door di peca, Adam a perde e precioso bida humano perfecto cu e tawata posee. Pues e no por a pas’e pa su desendientenan. Na  luga di esei e por a pasa solamente pica y morto pa nan. Hesus, kende Bijbel ta yama “e ultimo Adam”, tawatin un bida humano perfecto, y nunca el a peca. (1 Corintionan 15:45) Den un sentido, Hesus a tuma e luga di Adam pa e por a salba nos. Door di sacrifica of entrega su bida humano perfecto y keda perfectamente obediente na Dios, Hesus a paga e prijs pa e pica di Adam. Pues Hesus a trece speransa pa e desendientenan di Adam.—Romanonan 5:19; 1 Corintionan 15:21, 22.

12. Kico a keda proba door di Hesus su sufrimento?

¹² Bijbel ta describi en detaye e sufrimento cu Hesus a soporta prome cu su morto. El a haya sota hopi severo, el a ser claba cruelmente na un palo y a sufri un morto agonisante riba un staca di tormento. (Huan 19:1, 16-18, 30; wak e articulo di Apendix, “Dicon Cristiannan Berdadero No Ta Uza Crus den Adoracion”) Dicon tawata necesario pa Hesus sufri asina tanto? Den un capitulo mas despues den e buki aki, nos lo mira cu Satanas a cuestiona si Yehova lo tin sirbidonan humano cu lo keda fiel bou di prueba. Door di persevera fielmente apesar di gran sufrimento, Hesus a duna e mihor contesta posibel riba e desafio di Satanas. Hesus a duna prueba cu un hende perfecto cu tin boluntad liber por a mantene integridad perfecto na Dios sin importa kico Diabel haci. Yehova lo mester tawata hopi contento cu e fieldad di su Yiu stima!—Proverbionan 27:11.

13. Con e rescate a ser paga?

¹³ Con e rescate a ser paga? Riba e di 14 dia di e luna Hudiu nisan na aña 33 di nos era, Dios a permiti hende ehecuta su Yiu perfecto y sin pica. Di e manera ei Hesus a sacrifica su bida humano perfecto “un biaha pa semper.” (Hebreonan 10:10) Riba e di tres dia despues cu Hesus a muri, Yehova a resusit’e na bida como un persona spiritual. Den shelo, Hesus a presenta na Dios e balor di su  bida humano perfecto sacrifica como un rescate na fabor di e desendientenan di Adam. (Hebreonan 9:24) Yehova a acepta e balor di Hesus su sacrificio como e rescate necesario pa libra humanidad for di sclabitud na pica y morto.—Romanonan 3:23, 24.

14, 15. Pa haya “pordon di [nos] picanan”, kico nos tin cu haci?

¹⁴ Apesar di nos condicion pecaminoso, nos por ricibi bendicionnan sumamente balioso door di e rescate. Laga nos considera algun di e beneficionan tanto actual como den futuro di e regalo di mas grandi aki di Dios.

¹⁵ Pordon di pica. Door di imperfeccion hereda, nos tin un berdadero lucha pa haci loke ta corecto. Nos tur ta peca sea cu palabra of cu accion. Pero pa medio di Hesus su sacrificio di rescate, nos por ricibi “pordon di [nos] picanan.” (Colosensenan 1:13, 14) Sinembargo, pa nos haya e pordon ei, nos mester ta realmente arepenti. Tambe nos tin cu roga Yehova humildemente y pidie pordon a base di nos fe den e sacrificio di rescate di su Yiu.—1 Huan 1:8, 9.

16. Kico ta haci posibel cu nos por adora Dios cu un consenshi limpi, y ki balor un consenshi limpi tin?

¹⁶ Un consenshi limpi dilanti Dios. Un mal consenshi facilmente por hiba na desesperacion y por laga nos sinti cu nos no ta bal nada. Sinembargo, mediante e pordon cu a bira posibel door di e rescate, Yehova bondadosamente ta duna nos e oportunidad di ador’e cu un consenshi limpi apesar di nos imperfeccion. (Hebreonan 9:13, 14) Door di esaki nos por papia cu Yehova cu confiansa. Pues, nos por acerc’e libremente den oracion. (Hebreonan 4:14-16) Si nos mantene un consenshi limpi, esei ta duna nos pas mental, e ta promove respet propio y ta contribui na felicidad.

17. Ki bendicionnan a bira posibel pasobra Hesus a muri pa nos?

 ¹⁷ E speransa di bida eterno den un paradijs riba tera. Romanonan 6:23 ta bisa: “E pago di pica ta morto.” E mesun versiculo ta agrega: “Ma e don di gracia [of, regalo] di Dios ta bida eterno den Cristo Hesus, nos Señor.” Den Capitulo 3 di e buki aki, nos a trata e bendicionnan di e benidero Paradijs riba tera. (Revelacion 21:3, 4) Tur e futuro bendicionnan ei, incluso bida eterno den salud perfecto, a bira posibel pasobra Hesus a muri pa nos. Pa nos ricibi e bendicionnan ei, nos tin cu mustra cu nos ta aprecia e regalo di e rescate.

18. Dicon nos mester ta gradicido na Yehova cu el a duna e rescate?

¹⁸ Dicon nos mester ta sumamente gradicido na Yehova pa e rescate? Wel, un regalo ta mas precioso ainda ora cu e dunado mester a sacrifica su tempo, y haci hopi esfuerso of gasto pa duna nos e regalo. Nos ta keda profundamente conmovi ora nos mira cu un regalo ta un expresion di e dunado su amor sinsero pa nos. Di tur regalo, e rescate ta esun di mas precioso, pasobra Dios a haci e sacrificio di mas grandi den historia door di a dun’e. Huan 3:16  ta bisa: “Dios a stima mundo asina tanto, cu el a duna su Yiu unigenito.” E rescate ta e prueba mas sobresaliente di Yehova su amor pa nos. Tambe e ta prueba di Hesus su amor, pasobra boluntariamente el a entrega su bida na nos fabor. (Huan 15:13) Pesei e regalo di e rescate mester combence nos cu Yehova y su Yiu ta stima nos como hende individual.—Galationan 2:20.

19, 20. Den ki maneranan bo por demostra cu bo ta aprecia Dios su regalo di e rescate?

¹⁹ Pero con abo por demostra cu bo ta aprecia Dios su regalo di e rescate? Na prome luga, siña mas tocante e Gran Dunador, Yehova. (Huan 17:3) Un estudio di Bijbel haciendo uzo di e publicacion aki lo yuda bo haci esei. Segun cu bo conocemento di Yehova ta aumenta, bo amor p’e lo bira mas profundo. Anto na su turno, e amor ei lo duna bo e deseo di agrad’e.—1 Huan 5:3.

²⁰ Demostra cu bo tin fe of ta kere den Hesus su sacrificio di rescate. Hesus mes a bisa: “Esun cu kere den e Yiu tin bida eterno.” (Huan 3:36) Con nos por demostra cu nos ta kere of tin fe den Hesus? No djis cu boca so. “Fe sin obranan ta morto”, segun Santiago 2:26. Si, berdadero fe ta keda proba pa medio di “obranan”, es decir, pa medio di nos accionnan. Un manera pa demostra cu nos ta kere of tin fe den Hesus ta door di haci nos best pa imit’e no solamente den loke nos ta bisa sino tambe den loke nos ta haci.—Huan 13:15.

21, 22. (a) Dicon nos mester asisti na e conmemoracion anual di e Cena di Señor? (b) Kico e Capitulonan 6 y 7 lo splica?

²¹ Asisti na e conmemoracion anual di e Cena di Señor. Riba e anochi di 14 di nisan di aña 33, Hesus a introduci un conmemoracion special cu Bijbel ta yama “e Cena di Señor.” (1 Corintionan 11:20; Mateo 26:26-28) Esaki ta ser yama tambe e Memorial (of, Conmemoracion) di e morto di Cristo. Hesus a institui e pa yuda su apostelnan  corda—y tambe tur cristian berdadero cu a bin despues di nan—cu pa medio di su morto como un ser humano perfecto, el a duna su bida como un rescate. Relaciona cu e conmemoracion aki, Hesus a ordena: “Haci esaki na mi recuerdo.” (Lucas 22:19) Tenemento di e Memorial ta recorda nos di e gran amor cu tanto Yehova como Hesus a demostra en conexion cu e rescate. Nos por mustra nos aprecio pa e rescate door di ta presente na e Conmemoracion anual di e morto di Hesus. *

²² E rescate aki cu Yehova a percura ta en berdad un regalo sumamente balioso. (2 Corintionan 9:14, 15) E regalo tan precioso aki por beneficia asta e hendenan cu a muri. E Capitulonan 6 y 7 lo splica con.