Иоанны 20:1—31
20 Къуырийы фыццаг бон*+ та райсомӕй раджы, нырма талынг уыд, афтӕ, Марийӕ Магдалинӕ зӕппадзмӕ ’рбацыд ӕмӕ федта, чидӕр дур зӕппадзмӕ бахизӕнӕй кӕй афӕлдӕхта+.
2 Ӕмӕ азгъордта ӕмӕ ’рцыд Симон Петрмӕ ӕмӕ иннӕ ахуыргӕнинагмӕ+, Йесо кӕй уарзта, уымӕ, ӕмӕ сын загъта: «Нӕ Хицауы нын зӕппадзӕй+ ахастой, ӕмӕ йӕ цы фӕкодтой, уымӕн ницы зонӕм».
3 Уӕд Петр+ ӕмӕ иннӕ ахуыргӕнинаг зӕппадзмӕ ацыдысты.
4 Дыууӕйӕ дӕр азгъордтой, фӕлӕ иннӕ ахуыргӕнинаг тагъддӕр згъордта, ӕмӕ Петры разӕй фӕци ӕмӕ зӕппадзмӕ фыццаг бахӕццӕ.
5 Ӕмӕ ӕргуыбыр кодта, мидӕмӕ бакаст ӕмӕ дзы федта хӕцъилтӕ+, фӕлӕ мидӕмӕ нӕ бахызт.
6 Уӕдмӕ Симон Петр дӕр йӕ фӕдыл ӕрбахӕццӕ ӕмӕ зӕппадзмӕ мидӕмӕ бахызт. Ӕмӕ дзы федта хӕцъилтӕ+,
7 стӕй ма, Йесойы сӕр кӕмӕй уыди тыхт, уыцы хъуымацы гӕбаз дӕр, ӕрмӕст уый хӕцъилтимӕ нӕ уыд, фӕлӕ хицӕнӕй, тыхтӕй ӕвӕрд уыди.
8 Уӕд иннӕ ахуыргӕнинаг дӕр, зӕппадзмӕ фыццаг чи ’рбацыд, уый, мидӕмӕ бахызт. Ӕмӕ уыдӕттӕ куы федта, уӕд ӕй бауырныдта, Марийӕ сын цы загъта, уый.
9 Фыстад афтӕ кӕй зӕгъы, хъуамӕ мӕрдтӕй райгас уа, зӕгъгӕ, уый уӕд нӕма ӕмбӕрстой+.
10 Ӕмӕ уыцы дыууӕ ахуыргӕнинаджы фӕстӕмӕ сӕ хӕдзӕрттӕм ацыдысты.
11 Марийӕ та зӕппадзы цур лӕугӕйӕ баззад ӕмӕ куыдта. Ӕмӕ, кӕугӕйӕ, ӕргуыбыр кодта, зӕппадзмӕ бакӕсон, зӕгъгӕ,
12 ӕмӕ дзы федта дыууӕ зӕды+ урс дарӕсты. Сӕ иу бадт, Йесойы мард ӕвӕрд кӕм уыди, уым сӕрырдыгӕй, иннӕ та – къӕхтырдыгӕй.
13 Ӕмӕ йӕ зӕдтӕ бафарстой: «Хорз ус, цӕуыл кӕуыс?» Марийӕ сын загъта: «Мӕ Хицауы мын ахастой, ӕмӕ йӕ цы фӕкодтой, уымӕн ницы зонын».
14 Ацы ныхӕстӕ куы загъта, уӕд фӕстӕмӕ акаст ӕмӕ федта Йесойы лӕугӕ, фӕлӕ йӕ нӕ базыдта+.
15 Ӕмӕ йын Йесо загъта: «Хорз ус, цӕуыл кӕуыс? Кӕй агурыс?»+ Марийӕ йӕ дыргъдонгӕс фенхъӕлдта, ӕмӕ йын загъта: «Хорз лӕг, кӕд ӕй ды ахастай, уӕд мын ӕй зӕгъ, цы йӕ фӕкодтай, ӕмӕ йӕ ӕз рахӕссон».
16 Уӕд ӕм Йесо сдзырдта: «Марийӕ!»+ Ӕмӕ уӕд Марийӕ разылд ӕмӕ йын дзуттагау загъта: «Раввуни!»+ (ома «Ахуыргӕнӕг!»)
17 Йесо та йын загъта: «Ма мыл хӕц. Ӕз мӕ Фыдмӕ нӕма ссыдтӕн. Фӕлӕ ацу ме ’фсымӕртӕм+ ӕмӕ сын зӕгъ: „Ӕз цӕуын мӕ Фыдмӕ+ ӕмӕ уӕ Фыдмӕ, мӕ Хуыцаумӕ+ ӕмӕ уӕ Хуыцаумӕ“»+.
18 Ӕмӕ Марийӕ Магдалинӕ ахуыргӕнинӕгтӕм ӕрбацыд ӕмӕ сын загъта: «Ӕз Хицауы федтон!» Стӕй ма сын радзырдта, уыдӕттӕ йын йӕхӕдӕг кӕй загъта, уый дӕр+.
19 Уыцы бон, къуырийӕн йӕ фыццаг бон+, йӕ ахуыргӕнинӕгтӕ изӕрӕй иумӕ ӕрӕмбырд сты. Ӕмӕ кӕд, дзуттӕгтӕй кӕй тарстысты+, уый тыххӕй дуӕрттӕ сӕхгӕдтой, уӕддӕр сӕм Йесо бацыд+, сӕ астӕу ӕрлӕууыд ӕмӕ сын загъта: «Фарнӕй хайджын ут!»+
20 Ӕмӕ сын афтӕ куы загъта, уӕд сӕм йӕ къухтӕ ӕмӕ йӕ фарс равдыста+. Ахуыргӕнинӕгтӕ сӕ Хицауы куы федтой, уӕд сӕ цинӕн кӕрон нал уыд+.
21 Ӕмӕ та сын Йесо ногӕй загъта: «Фарнӕй хайджын ут! Мӕ Фыд мӕн куыд рарвыста дунемӕ+, афтӕ уӕ ӕз дӕр ӕрвитын дунемӕ»+.
22 Уыцы ныхӕсты фӕстӕ сыл бафу кодта ӕмӕ сын загъта: «Схайджын ут Хуыцауы сыгъдӕг тыхӕй+.
23 Сымах йӕ тӕригъӕдтӕ кӕмӕн ныххатыр кӕнат+, уымӕн хатыргонд уыдзысты, кӕмӕн сӕ нӕ ныххатыр кӕнат, уымӕн та хатыргонд нӕ уыдзысты»+.
24 Йесо сӕм куы ’рбацыд, уӕд Фома+, дыууадӕс ахуыргӕнинагӕй сӕ иу, Фаззон кӕй хуыдтой, уый, семӕ нӕ уыд.
25 Ӕмӕ йын уый фӕстӕ иннӕ ахуыргӕнинӕгтӕ дзырдтой: «Мах Хицауы федтам!» Фӕлӕ сын уый загъта: «Цалынмӕ йын йӕ къухтыл зӕгӕлты фӕдтӕ мӕхи цӕстӕй нӕ фенон ӕмӕ ме ’нгуылдз уыцы фӕдтыл не ’рӕвӕрон ӕмӕ йын мӕ къух йӕ фарсыл нӕ авӕрон+, уӕдмӕ мӕ нӕ бауырндзӕн»+.
26 Аст боны фӕстӕ та йӕ ахуыргӕнинӕгтӕ хӕдзары иумӕ ӕрӕмбырд сты, ӕмӕ Фома дӕр уыди семӕ. Ӕмӕ кӕд дуар ӕхгӕд уыдис, уӕддӕр сӕм Йесо бацыд, сӕ астӕу ӕрлӕууыд ӕмӕ сын загъта: «Фарнӕй хайджын ут!»+
27 Ӕмӕ уый фӕстӕ Фомайӕн загъта: «Гъа, мӕнӕ ам ӕрӕвӕр де ’нгуылдз ӕмӕ мын мӕ къухтӕ фен, ӕмӕ дӕ къух+ мӕ фарсыл авӕр, ӕмӕ мауал дызӕрдыг кӕн, фӕлӕ дӕм уырнындзинад уӕд».
28 Ӕмӕ уӕд Фома загъта: «Мӕ Хицау ӕмӕ мӕ Хуыцау!»+
29 Йесо та йын загъта: «Кӕй мӕ федтай, уый тыххӕй дӕ бауырныдта? Амондджын сты, чи нӕ уыны ӕмӕ афтӕмӕй кӕй уырны, уыдон»+.
30 Уӕвгӕ, Йесо ма йӕ ахуыргӕнинӕгты раз ноджыдӕр бирӕ диссӕгтӕ сарӕзта, ӕмӕ уыдон ацы чиныджы фыст не сты+.
31 Фӕлӕ адӕттӕ фыст ӕрцыдысты+, цӕмӕй сымах уырна, Йесо кӕй у Чырысти, Хуыцауы Фырт, ӕмӕ уӕ кӕй уырны+, уымӕ гӕсгӕ йӕ номы фӕрцы цардӕй хайджын уат.