Разамонӕг совет ӕй фӕлтӕрдгун киристӕнтти минкъий къуар. Етӕ разамунд дӕттунцӕ ӕгас дуйней Йегови Ӕвдесӕнтӕн. Сӕ кустмӕ хауй дууӕ сӕйраг гъуддаги:

•   Дзуапп дӕттунцӕ нӕ организаци Библибӕл арӕзт публикацитӕ, фембӕлдтӕ ӕма скъолати фӕрци ци ахурадӕ дӕттуй, уобӕл (Лукай 12:42).

•   Разамунд дӕттунцӕ, ӕгас дуйнебӕл Йегови Ӕвдесӕнти кустӕн. Уомӕ хауй игъосун кӕнуни гъуддаг ӕма, нисайнӕгтӕ куд харзгонд цӕунцӕ, е.

 Разамонӕг совет архайуй, фиццаг ӕноси «апостолтӕ ӕма хестӕр нӕлгоймӕгтӕ» ци цӕветтон ниууагътонцӕ, уомӕ гӕсгӕ (Гъуддӕгтӕ 15:2). Етӕ рахӕссиуонцӕ, ӕгас ӕмбурдмӕ ка хаудтӕй, уӕхӕн ӕхсидзгӕ унаффитӕ. Еци еузӕрдон лӕггадгӕнгути хузӕн, Разамонӕг совети ци ӕнсувӕртӕ ес, етӕ дӕр сӕхе нӕ организацийӕн хецӕуттӕ нӕ кӕнунцӕ. Етӕ разамунд агорунцӕ Библий ӕма ’й лӕдӕрунцӕ, Йеговӕ Хуцау ӕмбурди сӕргъи Йесо Киристей ке исӕвардта (1 Коринфӕгтӕмӕ 11:3; Ефесӕгтӕмӕ 5:23).

 Разамонӕг совети ӕнцӕ: Гейдж Флигл, Геррит Лёш, Дейвид Сплэйн, Джеффри Джексон, Джеффри Уиндер, Кеннет Кук, Марк Сандерсон, Стивен Летт ӕма Сэмюэл Хёрд. Етӕ лӕггадӕ кӕнунцӕ сӕйраг хайади Уорвикки (Нью-Йорк, АЕШ).

 Разамонӕг совет искодта ӕхсӕз комитети ӕма аллихузи гъуддӕгтӕмӕ сӕ цӕстӕ дарунцӕ. Алкедӕр си лӕггадӕ кӕнуй еу кенӕ цалдӕр комитеттеми.

•   Координаторти комитет ӕ цӕстӕ даруй юридикон гъуддӕгтӕмӕ ӕма нӕ хуӕртӕ ӕма ӕнсувӕртӕн ӕнхус кӕнуй, сӕ дини туххӕй сӕ фӕдбӕл ку фӕззелунцӕ кенӕ ӕрдзон бӕллӕхтӕ ку ’рцӕуй, уӕд, кенӕ ба ӕвӕстиатӕй архайун кӕми фӕгъгъӕуй, ӕндӕр уӕхӕн уавӕрти.

•   Лӕггадгӕнгути ка иснисан кӕнуй, еци комитет ӕ цӕстӕ даруй, ӕгас дуйнебӕл дӕр Вефилти ка лӕггадӕ кӕнуй, уонӕмӕ.

•   Рауагъдади комитет дзуапп дӕттуй, ӕнӕгъӕнӕ дуйнебӕл дӕр Библибӕл арӕзт литературӕ уагъд куд цӕуй ӕма ӕмбурдтӕмӕ куд бахъӕртуй, уобӕл. Дзуапп ма дӕттуй залтӕ, тӕлмацгӕнгути офистӕ ӕма филиалти арӕзтадӕбӕл.

•   Игъосун кӕнунбӕл дзуапдӕттӕг комитет разамунд дӕттуй, «Хуцауи Паддзахади туххӕй... хуарз хабар игъустгонд» куд цӕуй, уомӕн (Матфеййи 24:14).

•   Ахурадон комитет цӕттӕ кӕнуй ӕмбурдтӕ ӕма нӕ организаций скъолати программитӕ, удта аллихузи аудио- ӕма видеоӕрмӕг.

•   Финсгути комитет цӕттӕ кӕнуй ӕууӕндундзийнадӕ федаргӕнӕн хуӕруйнаг ӕма ӕ гъос даруй, цӕмӕй мухури цӕуа ӕма нӕ сайти дӕр уа, удта ма ӕ гъос даруй, тӕлмацгӕнгути куст куд цӕуй, уомӕ дӕр.

 Разамонӕг совети ӕнсувӕртӕ ӕрмӕстдӕр аци комитети нӕ архайунцӕ, фал ма алли къуӕре дӕр фембӕлунцӕ, цӕмӕй радзубанди кӕнонцӕ, нӕ организаций ӕркӕсун кӕмӕ гъӕуй, еци гъуддӕгтӕбӕл. Еци фембӕлдти фӕдздзорунцӕ Финстади туххӕй ӕма фӕййархайунцӕ, цӕмӕй унаффитӕ ӕмвӕндӕй хӕссонцӕ, ӕма уой кӕнунцӕ Хуцауи сугъдӕг хъаури разамундмӕ гӕсгӕ (Гъуддӕгтӕ 15:25).

 Етӕ ӕнцӕ Разамонӕг совети комитеттӕн ка ӕнхус кӕнуй, еци ӕууӕнкгун киристӕнттӕ (1 Коринфӕгтӕмӕ 4:2). Етӕ ӕнцӕ фӕлтӕрдгун ӕма арӕхстгун, ӕма уой фӕрци сӕ бон ӕй, ци комитетмӕ сӕ иснисан кодтонцӕ, уоми ӕнхус кӕнун. Удта ма фӕуунцӕ алли комитетӕн дӕр къуӕре еу хатт, ка фӕууй, еци фембӕлди. Ӕма кӕд Разамонӕг совети ӕнхусгӕнгутӕ унаффитӕ нӕ фӕххӕссунцӕ, уӕддӕр информаци бацӕттӕ кӕнунцӕ ӕма сӕ гъуди фӕззӕгъунцӕ. Удта ма фенхӕст кӕнунцӕ комитет ци унаффӕ рахаста, уой ӕма сӕ гъос фӕддарунцӕ, еци унаффи фӕрци ци бантӕстӕй, уомӕ. Удта ма син Разамонӕг совет баихӕс кӕнуй аллихузи бӕстити хуӕртӕ ӕма ӕнсувӕрти бӕрӕг кӕнун ӕма радзубандитӕ цӕттӕ кӕнун, зӕгъӕн, ӕрвиланзон фембӕлди кенӕ студенттӕ Галаади скъола ке фӕцӕнцӕ, уой фӕдбӕл фембӕлди.