Арӕх адӕни цӕсти лӕварӕн устур аргъ фӕууй, устур бартӕ кенӕ кадӕ кӕмӕн ес, уӕхӕн адӕймагӕй лӕвӕрд ку фӕууй, уӕд. Цӕхуӕндӕр лӕвар ба нин хъазар фӕууй, берӕ ке уарзӕн, уӕхӕн адӕймаг нин ӕй ке балӕвар кодта, уой туххӕй, кӕд цидӕр хумӕтӕг дзаума фӕууй, уӕддӕр. Уӕхӕн лӕвар адтӕй, фиццаг статьяй ке кой кодтан, еци къариндас циргъгӕнӕн. Хуцауи лӕварӕй ба ци ес зӕгъӕн?

Библи зӕгъуй: «Хуцау... ӕ еунӕг Фурти дуйнемӕ рарвиста, цӕмӕй уой фӕрци цардӕй хайгин уӕн» (1 Иоанни 4:9). Айдагъ уой туххӕй дӕр еци лӕварӕн устур аргъ ес. Дун-дуйней Хуцауӕй уӕлдӕр неке ӕй. Псаломзаргӕнӕг Хуцауи туххӕй уӕхӕн дзурдтӕ загъта: «Ду, ӕ ном Йеговӕ кӕмӕн ӕй, ӕрмӕстдӕр ду... дӕ Еунӕг Устур Хуцау, Хецау ӕгас зӕнхӕн» (Псалом 83:18). Мадта Хуцауӕй уӕлдӕр ка уа, уӕхӕн лӕваргӕнӕг нӕййес.

Уомӕй уӕлдай ма Хуцау ӕй нӕ Фидӕ (Исай 63:16). Кутемӕй? Е нин цард равардта, удта нӕбӕл тухсуй, фидӕ ӕ бӕдӕлттӕбӕл куд фӕттухсуй, уотӕ. Рагидзаманти Хуцау ӕ адӕни худта Ефрем, ӕма уони туххӕй загъта: «Гӕрр, Ефрем мӕ хъазар фурт, мӕ боцхаст бӕдолӕ нӕй? [...] ...Ӕ тӕрегъӕдмӕ кӕсгӕй мӕ зӕрдӕ скъудтӕ кӕнуй. Ӕз ин ӕнӕмӕнгӕ фӕттӕрегъӕд кӕндзӕн» (Йереми 31:20). Абони дӕр Хуцау ӕ адӕнмӕ уӕхӕн зӕрдӕ даруй. Е айдагъ алцигъон Сфӕлдесӕг нӕй, фал ма нӕ ӕновуд Фидӕ ӕма нӕ еузӕрдон Ӕмбал дӕр. Ӕ лӕвар дӕр нин уомӕ гӕсгӕ уотӕ хъазар ӕй.

Уӕлдай хъазар ма нин фӕууй, зӕрдиагӕй нин ке балӕвар кодтонцӕ, уӕхӕн лӕвар, нӕ хуӕрзтӕбӕл нин кӕмӕй федунцӕ, е нӕ, фал. Зӕрдиагӕй ка балӕвар кӕнуй, е фӕстӕмӕ нецӕмӕ фенгъӕлмӕ кӕсуй.

Хуцау ӕ фурти равардта, уомӕн ӕма нӕ уарзуй. «Хуцау нӕ ке уарзуй, уой уомӕй бавдиста, ӕмӕ ӕ еунӕг Фурти дуйнемӕ рарвиста»,– финст ӕй Библий. Цума цӕмӕн? Идарддӕр си финст ӕй: «Цӕмӕй уой фӕрци цардӕй хайгин уӕн» (1 Иоанни 4:9). Цума ни Хуцау естӕмӕй ихӕсгин адтӕй? Нӕ. «Киристе нӕ ке балхӕдта», е Хуцауи ’стур хуарзӕнхӕбӕл дзорӕг адтӕй (Ромӕгтӕмӕ 3:24).

Киристей нивонд Хуцауи ’стур хуарзӕнхӕбӕл дзорӕг цӕмӕн ӕй? Библи нин лӕдӕрун кӕнуй: «Хуцау нӕ ке уарзуй, уой... ӕвдесуй, Киристе мах туххӕй, тӕрегъӕдгунтӕ ма ку адтан, уӕд ке рамардӕй, уомӕй» (Ромӕгтӕмӕ 5:8). Хуцау нӕмӕ е ’стур хуарзӕнхи фӕрци е ’нхуси къох бадардта. Мах тӕрегъӕдгун адӕн ан ӕма уӕхӕн лӕвари аккаг уогӕ дӕр н’ адтан. Еци лӕварбӕл бафедун нӕ бон некӕд исуодзӕй. Мадта Хуцауи лӕвар е ’нӕкӕрон уарзтбӕл дзорӕг ӕй.

Еуӕй-еу лӕвӕрттӕн уӕлдай хъӕбӕрдӕр фӕййаргъ кӕнӕн, уомӕн ӕма ’й фӕззонӕн, ка нин ӕй балӕвар кодта, уомӕн куд хъазар ислӕудтӕй, уой. Кӕд ӕй ӕхецӕй ратудта, уӕд нин еци лӕвар уӕлдай хъазардӕр фӕууй.

Хуцау равардта «ӕ еунӕг Фурти» (Иоанни 3:16). Тӕккӕ хъазардӕр ин ка адтӕй, уой мах туххӕй нӕ бавгъау кодта. Хъӕбӕр берӕ рӕстӕг, Хуцау Дун-дуйне ку кодта, уӕд Йесо ӕ хӕццӕ хъиамӕт кодта ӕма ӕ Фидӕн адтӕй «е ’стур цийнӕ» (Ӕмбесӕндтӕ 8:30). Йесо адтӕй ӕ «уарзон Фурт», удта «цӕстӕй фӕууинӕн ке нӕййес, еци Хуцауи хузӕн» (Колоссӕгтӕмӕ 1:13–15). Кӕрӕдзебӕл хъӕбӕр баст адтӕнцӕ.

Фал Хуцау «ӕ Фурти нӕ бавгъау кодта» (Ромӕгтӕмӕ 8:32). Йеговӕ нӕ бавгъау кодта, хъазардӕр ин ка адтӕй, уой. Еунӕг лӕвӕр дӕр ин уотӕ хъазар не ’слӕудтӕй!

Лӕвар ма нин уӕлдай хъазар фӕууй, хъӕбӕр нӕ ка гъудӕй, уӕхӕн ку разиннуй, уӕд. Зӕгъӕн, хъӕбӕр хъазар хуасӕ балхӕнун дӕ багъудӕй. Цӕмӕй ӕй балхӕнай, уӕхӕн ба дӕмӕ нӕ. Фал разиндтӕй, дӕ бӕсти ибӕл ка бафиста, уӕхӕн адӕймаг, ӕма дин уой фӕрци дӕ цард фӕййервӕзун кодта. Еци лӕварӕн, ӕвӕдзи, аргъ дӕр н’ адтайдӕ! Уотӕ нӕй?

Библи зӕгъуй: «Адами фудӕй адӕн еугурӕйдӕр куд мӕлунцӕ, уотӕ Киристей фӕрци ба еугурӕйдӕр райгас уодзӕнцӕ» (1 Коринфӕгтӕмӕ 15:22). Адами байзӕддӕгтӕ ке ан, уомӕ гӕсгӕ мӕлӕн ӕма нӕхе бон нӕй незтӕй ӕма мӕлӕтӕй исуӕгъдӕ ун, удта Хуцауи хӕццӕ бафедаун ӕма ин кӕдзос цӕсгонӕй ковун. Ӕнӕнхӕст адӕймаги бон нӕй нӕдӕр ӕхе, нӕдӕр еске райгас кӕнун. Библи куд зӕгъуй, уомӕ гӕсгӕ «еуемӕн дӕр ӕ бон нӕй е ’нсувӕри балхӕнун ӕма е ’нсувӕри туххӕй Хуцауӕн бафедун» (Псалом 49:7, 8). Ӕнхус нӕ ӕнӕмӕнгӕ гъӕуй, уомӕн ӕма нивонди аргъ хъӕбӕр устур ӕй. Нӕхе хъауритӕй ӕй неци хузи бафистайанӕ ӕма нӕ мӕгур уавӕрӕй некӕд исуӕгъдӕ адтайанӕ.

Йегови уарзт ӕнӕкӕрон ке ӕй, уомӕ гӕсгӕ адӕни бӕсти еци «хъазар хуасӕбӕл» бафиста ӕма сӕ мӕлӕтӕй фӕййервӕзун кодта. Ӕма нур Киристей нивонди фӕрци «еугурӕйдӕр райгас уодзӕнцӕ». Цума уомӕн куд ес гӕнӕн? Библи ӕй куд лӕдӕрун  кӕнуй, уомӕ гӕсгӕ «Йесой тог кӕдзос кӕнуй ӕгас тӕрегъӕдтӕй дӕр». Киристей нивондбӕл ку ӕууӕндӕн, уӕд нӕ тӕрегъӕдтӕ хатиргонд ӕрцӕудзӕнцӕ ӕма ӕносон цардӕй исхайгин уодзиан (1 Иоанни 1:7; 5:13). Фал ка нӕбал ӕй, еци уарзон хеуӕнттӕн ба Киристей нивонд цӕбӕл дзорӕг ӕй? 1 Коринфӕгтӕмӕ 15:21 финст ӕй: «Мӕлӕт адӕймаги фудӕй куд фӕззиндтӕй, уотӕ мӕрдтӕ дӕр адӕймаги [Йесо Киристей] фӕрци игас кӕнунцӕ».

Киристей нивондӕй хъазардӕр лӕвар нӕййес. Уӕхӕн лӕвар нин ка искодта, еци Хуцау Йеговӕй уӕлдӕр ӕма кадгиндӕр неке ӕй. Е ’нӕкӕрон уарзти хӕццӕ неци ес рабарӕн. Адӕни туххӕй ма уӕхӕн устур аргъ еске бафиста? Тӕрегъӕд ӕма мӕлӕтӕй нӕ ка исуӕгъдӕ кодтайдӕ, уӕхӕн лӕварӕй хъӕбӕрдӕр ма нӕ ци гъудӕй? Куд ӕй уинӕн, уотемӕй еунӕг лӕварӕн дӕр рабарӕн нӕййес, Хуцау нин ци лӕвар искодта, уой хӕццӕ.